ގަތަރުގައި މިހާރު ކުރިއަށްދާ ވޯލްޑް ކަޕް 2022 ގައި މިއަދު އާޖެންޓީނާ އާއި ދެކޮޅަށް ކުޅެ ސައުދީ އަރަބިއްޔާއިން މެޗު ކާމިޔާބު ކުރުމާއި ގުޅިގެން، މާދަމާ އަކީ އެ ގައުމަށް ބަންދު ދުވަހެއްގެ ގޮތުގައި ކަނޑައަޅައިފިއެވެ. 

ސައުދީ އަރަބިއްޔާގެ ނޫސްތަކުން ރިޕޯޓް ކޮށްފައިވާ ގޮތުގައި ސައުދީ އަރަބިއްޔާގެ ސަރުކާރުގެ އަދި އަމިއްލަ މުއައްސަސާތަކުގައި މަސައްކަތްކުރާ މުވައްޒަފުންނާއި ތައުލީމް ޙާޞިލް ކުރާ އެންމެހައި ދަރިވަރުންނަށް މާދަމާ އަކީ ބަންދު ދުވަހެއްގެ ގޮތުގައި ސައުދީ ރަސްގެފާނު ސަލްމާން ބިން އަބްދުލް އަޒީޒް ވަނީ ކަނޑައަޅުއްވާފައެވެ.  

އަދި ރަސްގެފާނު ސަލްމާން އެ ނިންމުން ނިންމަވާފައި މިވަނީ، މިއަދު އާޖެންޓީނާ އާއި ދެކޮޅަށް ސައުދީން ވާދަކުރި މެޗުގައި، އެ ޓީމު ބަލިކޮށް ސައުދީން ހޯދި ފަހުރުވެރި އަދި ތާރީޚީ ކާމިޔާބީ ފާހަގަކުރުމުގެ ގޮތުން ކަމަށްވެސް ސައުދީ ނޫސް ތަކުން ރިޕޯޓް ކޮށްފައިވެއެވެ. 

މިފަހަރުގެ ގަތަރު ވޯލްޑްކަޕް ކާމިޔާބުކުރާނެ ކަމަށް ގިނަ ބަޔަކު އިއްތިފާގުވި އާޖެންޓީނާ ކުޅުނު ފުރަތަމަ މެޗުގައި ސައުދީ އަރަބިއްޔާގެ އަތުން ބަލިވެފައިވަނީ 2-1 ގެ ތަފާތަކުންނެވެ. މި ނަތީޖާ ވެގެން ގޮސްފައިވަނީ ގިނަ ބަޔަކު ހައިރާން ކުރުވި، އަދި އާޖެންޓީނާގެ ގިނަ ސަޕޯޓަރުންނަށް ގަބޫލުކުރަން ވެސް ދަތިވި ނަތީޖާއަކަށެވެ.