ކުރިއަށް އޮތް ރިޔާސީ އިންތިހާބު އެމްޑީޕީން ކާމިޔާބު ކުރުމަށް އޮތް ހަމައެކަނި ޗޮއިސްއަކީ ރައީސް އިބްރާހީމް މުހައްމަދު ޞާލިހް ކަމަށާ އެނޫން ގޮތަކަށް ވަކާލާތު ކުރައްވަނީ އިދިކޮޅު ޕީޕީއެމަށް ވެރިކަން ދޫކޮށްލަން ބޭނުންވާ ފަރާތްތަކުން ކަމަށް ބުނެ އެމްޑީޕީގެ ރައީސް މުހައްމަދު ނަޝީދާއި އެ ފެކްޝަނުގެ މެންބަރުންނަށް މަރަދޫ ދާއިރާގެ މެންބަރު އިބްރާހިމް ޝަރީފް (މަވޯޓާ) ބަހުގެ ހަމަލާތަކެއް ދެއްވައިފިއެވެ. 

ރައީސް ޞާލިހަށް ވަރަށް ބޮޑަށް ތާއީދުކުރައްވައި މަވޯޓާ މިއަދު ކުރެއްވި ޓުވީޓުތަކެއްގައި ވިދާޅުވީ އެމްޑީޕީއަށް ކުރިއަށް އޮތް ރިޔާސީ އިންތިހާބު ކާމިޔާބު ކުރުމަށް ރައީސް ސޯލިހު ނޫން ޗޮއިސްއެއް ނެތް ކަމަށާއި އެއީ ހަމައެކަނި ޗޮއިސް ކަމަށެވެ.

އެއާއެކު އިކޮނޮމިކް މިނިސްޓަރު އަދި އެ ޕާޓީގެ ޗެއާޕާސަން ފައްޔާޒު އިސްމާއިލް އަދި ރައިސް ނަޝީދުގެ އިތުރުން، ފިނޭންސް މިނިސްޓަރ އިބްރާހިމް އަމީރު ޓެގްކުރައްވައި، 2023 އަށް އޮތް ހަމައެކަނި ޗޮއިސްއަކީ ރައީސް ސޯލިހު ކަން ތަކުރާރު ކުރައްވައި މަވޯޓާ ވިދާޅުވީ ކޮވިޑުގެ ދަތި ހާލަތުގައިވެސް އެމަނިކުފާނު ތަފާތު ދައްކަވާފައިވާ ކަމަށެވެ.

Advertisement

އަދި އޭގެ އިތުރުން، އޭނާ ވިދާޅުވީ, މިވަގުތު ކަންނަން އޮތް ގޮތަށް ބަލައި، 2023 އަށް އެންމެ އެކަށީގެންވާ ކެންޑިޑޭޓަކީ ރައީސް ސޯލިހު ކަމަށެވެ. އެހެނީ އެމަނިކުފާނު ވަނީ ކޯލިޝަން ލީޑަރުންނާއި އިދިކޮޅާއެކު ވެސް ހަރުދަނާ ގޮތެއްގައި މަސައްކަތް ކުރެވޭނެ ލީޑަރެއްކަން ސާބިތުކޮށްދީފައިވާ ކަމަށާއި، ކޯލިޝަންގެ އިތުބާރު އޮތް އެމްޑީޕީގެ އެހެން ކެންޑިޑޭޓެއް ވެސް ނެތްކަމަށް އޭނާ ވިދާޅުވި އެވެ.

"އެމްޑީޕީން ރިޔާސީ އިންތިހާބު ކާމިޔާބު ކުރަން ބޭނުންނަމަ ތަފާތު ފިކުރުގެ މީހުންނާ އެކުވެސް މަސައްކަތް ކުރުމުގެ ހުނަރާއި ގާބިލުކަން ހުރި، ދަތި އުނދަގޫ ދަނޑިވަޅުގައި ވެސް ޑިސިޝަންތައް ނަންގަވަން ކެރޭ ލީޑަރެއް ނެރެން ޖެހޭ. އެފަދަ ލީޑަރަކަށް ފެންނަން ހުރީ ރައީސް ސޯލިހު. އެއީ ޗޮއިސްއަކީ،" މަވޯޓާ ވިދާޅުވި އެވެ.

އެހެން ކަމުން، 2023 ވަނަ ރިޔާސީ އިންތިހާބު އެމްޑީީޕީ އަށް ކާމިޔާބު ކުރެވެން އޮތް ހަމަ އެކަނި ގޮތަކީ ރައީސް ޞާލިހު އިންތިހާބުގައި ވާދަކުރެއްވުން ކަމަށާ، އަދި ނޫން ގޮތަކަށް ވަކާލާތު ކުރައްވަނީ އިދިކޮޅު ޕީޕީއެމައަށް ވެރިކަން ދޫކޮށްލަން ބޭނުންވާ ފަރާތްތައް ކަމަށްވެސް ޝަރީފް ވިދާޅުވިއެވެ. 

2023 ވަނަ އަހަރުގެ ރިޔާސީ އިންތިހާބަށް އެމްޑީޕީން ވާދަކުރާނެ ކެންޑިޑޭޓަކު ކަނޑައެޅުމަށް ބާއްވާ ޕްރައިމަރީގައި ރައީސް ޞާލިހާއި، ނަޝީދުވެސް ވާދަ ކުރައްވާނެކަން އިއުލާން ކުރައްވާފައިވާއިރު، އެކަމާއި ގުޅިގެން އެ ޕާޓީ ދެބައިވެ، ސަރުކާރަށް ތާއީދުކުރާ މެންބަރުންނާއި ކުރީގެ ރައީސް ނަޝީދަށް ތާއީދުކުރައްވާ މެންބަރުންގެ މެދުގައި ވަނީ ވަރަށް ބޮޑަށް ހިޔާލު ތަފާތުވެފައެވެ. އެގޮތުން ރައީސް ސޯލިހަށް ދެވަނަ ދައުރެއް ދޭންޖެހޭ ކަމަށް އެމަނިކުފާނަށް ތާއީދުކުރައްވާ މެންބަރުން ވިދާޅުވަމުން ގެންދަވާއިރު، ރައީސް ނަޝީދުގެ ފެކްޝަން އެކަމާ ދެކޮޅެވެ.