އެހެންމީހުންގެ އުނި ސިފަތަކާއިގެން އަވަދިނެތި އުޅުމުގެ ބަދަލުގައި އަމިއްލަ ނަފްސު އިޞްލާޙު ކުރެވޭތޯ މަސައްކަތް ކުރުމަށް މިއަދުގެ ހުކުރުޚުތުބާގައި ގޮވާލައިފިއެވެ.

އަމިއްލަ ނަފްސު އިސްލާހު ކުރުމަށް އިސަކަން ދިނުމަށް ހާއްސަކޮށް މިއަދު ދިން ހުތުބާގައި ބުނީ އިންސާނާގެ ކަރާމަތަށް އުނިކަން ލިބިދާނެ ކަންކަމުން އޭނާގެ ނަފްސު ސަލާމަތްކޮށް ރައްކާތެރި ކުރުމަށް އިސްލާމްދީން ވަނީ ބާރުއަޅާފައިވާ ކަމަށެވެ.

"އެހެންމީހުންގެ އުނި ސިފަތަކާއިގެން އަވަދިނެތި އުޅުމުގެ ބަދަލުގައި އަމިއްލަ ނަފްސު އިޞްލާޙު ކުރެވޭތޯ މަސައްކަތް ކުރާށެވެ! އަހުރެމެންގެ ކޮންމެމީހެއްގެ ކިބައިގައި ވެސް އުނި ސިފަތައް ހުންނާނެތެވެ. ޢައިބުތައް ހުންނާނެތެވެ. އެންމެންނަށް ވެސް ކުށް ކުރެވޭނެތެވެ. އިސްކަން ދޭންވީ އަމިއްލަ ނަފްސު އިޞްލާޙު ކުރުމަށެވެ. އިސްލާމްދީން އަންގަވަނީ، އެހެން މީހުންގެ ޢައިބުތައް ފޮރުވައި ވަންހަނާކުރުމަށެވެ." ހުތުބާގައި ބުނެފައިވެއެވެ.

Advertisement

މިއާއެކު ހުތުބާގައި ބުނީ މީހުން ބޭޒާރުކުރުމަށްޓަކައި އެމީހުންގެ ވީޑިޔޯތަކާއި ފޮޓޯތައް ސިއްރުން ނަގައިގެން ސޯޝަލްމީޑިއާއަށް ލައި، އެމީހުން ބޭޒާރު ކުރުމަކީ ރަސޫލާ ޞޢވ ގެ ބަސްފުޅާ ޚިލާފް ޢަމަލެއް ކަމަށާ އެއީ ޤިޔާމަތް ދުވަހު މާތްރަސްކަލާނގެ އެފަދަ މީހުން ބޭޒާރުކުރައްވާނެ ކަމެއް ކަމަށެވެ. 

"މިއަދު ޙާލަތަށް ބަލާއިރު ބައެއް މީހުންގެ މަސައްކަތަކީ، އަބަދުމެ، މީސްތަކުންގެ އުނި ސިފަތައް ހޯދައި، ސޯޝަލްމީޑިއާގައި އެކަންކަން ހާމަކުރުމެވެ. ބައެއްފަހަރަށް އެމީހުން މީސްތަކުންނަށް މަލާމާތްކުރަނީ، މީހުންގެ ޙާލަތާއި ސިފައާ ބެހޭގޮތުންނެވެ.އަނެއްބައި ފަހަރަށް މަލާމަތްކޮށް ނެތިމޮށެނީ، މީހުންގެ ޙަސަބާއި ނަސަބާއި ބެހޭގޮތުންނެވެ، އެފަދަ މީހުން ދެކޭގޮތުގައި، އެމީހުންނަކީ އެއްވެސް އުނި ސިފައެއް ނެތް ފުރިހަމަ ބައެކެވެ، އެހެން މީހުންނަކީ އުނި ބައެކެވެ." ހުތުބާގައި ބުނެފައިވެއެވެ. 

މީގެ އިތުރުން ހުތުބާގައި ބުނީ، އަނިޔާވެރިކަމަކީ ތަފާތު ސިފަސިފައިގައިވާ ކަމެއް ކަމަށާ، އޭގެ ތެރޭގައި ޢަމަލުން ކުރާ އަނިޔާއާއި، ބަހުން ކުރާ އަނިޔާއާއި ނަފްސާނީ ގޮތުން ކުރާ އަނިޔާވާ ކަމަށެވެ. އަދި ޢަމަލުން ކުރާ އަނިޔާގެ ތެރޭގައި، މީހުންގެ ނަފްސަށާއި، އަބުރަށާއި މުދަލަށާއި، އަދި އެ މީހުންގެ ޙައްޤުތަކަށް އަރައިގަތުން ވާ ކަމަށާއި މީހުންނަށް ފުރައްސާރަކުރުމަކީ އެމީހުންގެ ނަފްސަށް ދެވޭ އަނިޔާއެއް ކަމަށެވެ.