ގައުމީ ދާރުލް އާސާރަށް 70 އަހަރު ފުރުމާއި ގުޅިގެން އެ ތަނަށް ވަނުމުގެ ފުރުސަތު އާންމުންނަށް ހުޅުވާލައިފިއެވެ. 

ނެޝަނަލް ސެންޓަރފޯ ކަލްޗަރަލް ހެރިޓޭޖުން ބުނި ގޮތުގައި ދާރުލް އާސާރަށް 70 އަހަރު ފުރުމާއި ގުޅިގެން އެތަން ބަލާލުމުގެ ފުރުސަތު ވަނީ އާންމުންނަށް ހުޅުވާލާފައެވެ. 

އަދި އެ ފުރުސަތުގައި ވަރަށް ގިނަ ބަޔަކު ދާރުލްއާސާރަށް ވަންނަމުންދާކަމަށް އެ ސެންޓަރުން ވަނީ ބުނެފައެވެ. 

ދާރުލްއާސާރުގައި އެތަނަށް ޒިޔާރާތް ފަރާތްތަކަށް ފެންނާނެހެން އެކި ކޮށާރުތައް ތައްޔާރުކޮށްފައި ހުރެއެވެ. 

އޭގެ ތެރޭގައި އިސްލާމްދީނުގެ އަލިކަން އައުމުގެ ކުރިޔަށް ނިސްބަތްވާ އާސާރުތައް ހިމެނެއެވެ. 

މީ ދިވެހިރާއްޖެއަށް އިސްލާމް ދީނުގެ އަލިކަން އައުމުގެ ކުރިން އުޅުނު އޭރުގައި ދިވެހިން ގަބޫލުކުރަމުން ދިޔަ އެކި ދީން ތަކަށް ނިސްބަތްވާ މީހުން އަޅުކަން ކުރުމުގައި ބޭނުން ކޮއްފައިވާ އެކިކަހަލަ އާސާރުތަކާއި އަދި ރާއްޖޭގެ އެކި ސަރަހައްދުތަކުގައި އެމީހުން އަޅުކަން ކުރުމަށްޓަކައި ގާއިމް ކޮއްފައި ހުރި ދާގަބަ އާއި ވޭރު ފަދަ ތަންތަނުން ގެނެވިފައި ހުރި އެކި ކަހަލަ އާސާރުތަކެވެ.

ބުނެވޭގޮތުގައި ގާތް ގަނޑަކަށް 250 ހަށް ވުރެ ގިނަ މިކަހަލަ ދާގަބަ އަދި ވޭރު ފަދަތަންތަން މިއަދާއި ހަމައަށް ވެސް ހޯދިފައި އެބަހުއްޓެވެ. މިއީ ދާރުލްއާސާރުގައިވެސް އެންމެގިނަ އާސާރު ހިމެނޭ އެންމެ ބޮޑު އެއް ކަލެކްޝަން އެވެ.

އޭގެއިތުރުން ލޮއިކަނަވާރުގެ ކޮޝާރުގައި ހިމަނާލެވިފައި ހުންނާނީ ވަރަށް ފަހަކާއި ޖެހެންދެންވެސް ދިވެހިންގެ ދިރިއުޅުމުގައި އެކިކަންކަމުގައި ބޭނުން ކުރެވިފައި ހުރި ލޮއިގެ އެކިބާވަތްތައް ބޭނުންކޮއްގެން ތައްޔާރު ކޮށްފައި ހުރި އެކިކަހަލަ އާސާރުތައް އެތަނުގައި ހުރެއެވެ. 

ފައިސާއާއި ނޫޓު ކޮށާރާއި، އަކުރުތަކުގެ ކޮށާރާއި ކަޑު ފަޅު ކޮށާރުގެ އިތުރުން ރަހުންނާއި ރަނިންގެ ކޮށާރުތަކާއި، ލިޔެލާޖެހި އާސާރުތަކުގެ ކޮށާރުތަކާއި ގުރުއާން ކޮށާރުވެސް ދާރުލް އާސާރުގައި ވަނީ ގާއިމްކޮށްފައެވެ.