ހެންވޭރު ހުރި ގެއެއްގައި ބަނގުރާ ކައްކަން ތިއްބައި އޮކްޓޯބަރ މަހު ހައްޔަރު ކުރި އިންޑިޔާގެ ދެ މީހުންވަނީ ރާއްޖެއަށް ނާދެވޭ ގޮތަށް ޑީޕޯޓް ކޮށްލާފައި ކަމަށް ފުލުހުން ބުނެފިއެވެ.
ހެންވޭރު ރޯޝަނީ މަގުގައި ހުރި ގެއަކުން ދުން އަރާ ކަމަށް ފުލުހުންނަށް ރިޕޯޓް ކުރުމާއި ގުޅިގެން އެމްއެންޑީއެފް އާއި ފުލުހުން ބާރުގެ ބޭނުން ކޮށްގެން އެގެއަށް ވަދެފައިވާ ކަމަށާ، އަދި އެގެއަށް ވަދެ ބެލި ބެލުމުން އެގޭ ތެރެއިން ދުން އަރަމުން ދިޔައީ ބަނގުރާ ކައްކަމުން ދާތީކަން އެނގިފައިވާ ކަމަށް އޮކްޓޯބަރ 13 ވަނަ ދުވަހު ފުލުހުން މައުލޫމާތު ދީފައިވެއެވެ. އަދި ބަނގުރާ ކައްކަން ބޭނުންކުރާ ގިނަ ސާމާނު ތަކެއް އެގެއިން ފެނިފައިވާކަމަށްވެސް ފުލުހުން ބުންޏެވެ.
މި މައްސަލާގައި ހައްޔަރުކުރީ އިންޑިއާގެ ދެ މީހުންކަމަށްވާ ސެލްވަމް ޕަވާޑައި އަދި ސުންޑްރަމުރްތީ ކެސަވަންއެވެ. އެ ދެ މީހުންގެ ބަންދާމެދު ގޮތެއް ނިންމުމަށް ކުރިމިނަލް ކޯޓަށް ހާޒިރުކުރުމުން 30 ދުވަހުގެ މުއްދަތަކަށް އެދެ މީހުން ބަންދުކުރަން އެ ކޯޓުގެ ޤާޟީ ޙަސަން ސަޢީދު އަމުރުކުރެއްވިއެވެ.
އަދި އެމީހުންގެ ބަންދުގެ މުއްދަތު މިހާރު ހަމަވެފައިވާއިރު، އެކަމާއި ގުޅިގެން ފުލުހުންގެ މީޑިއާ އޮފިޝަލް 'ވޮއިސް' އަށް މައުލޫމާތު ދެއްވަމުން ވިދާޅުވީ، އެ ދެމީހުންގެ ތެރެއިން ސުންޑްރަމުރްތީއަށް، ރާއްޖެއަށް ނާދެވޭ ގޮތަށް ޑީޕޯޓް ކުރުމަށް މިމަހު 13 ވަނަ ދުވަހު އިމިގްރޭޝަން އާއި ހަވާލު ކުރެވިފައިވާ ކަމަށެވެ.
އަދި ހަމަ އެ ދުވަހު ސެލްވަމް ޕަވާޑައި ވެސް އޭނާގެ ސްޕޮންސާ މެދުވެރިކޮށް، ދެން ރާއްޖެއަށް ނާދެވޭ ގޮތަށް ފޮނުވާލެވިފައިވާ ކަމަށް ފުލުހުންގެ މީޑިއާ އޮފިޝަލް ވިދާޅުވިއެވެ.
Advertisement
This content is created and paid for by advertisers and does not involve Voice Journalists
