މިއަދާ ހަމައަށްވެސް އާއިލާގެ އެއްވެސް މީހަކަށް ވަަަޒީފާާ ހޯދައިދޭން އެދިފައި ނުވާނެ ކަމަށާ، އެފަދައިން އެދިގެން ދީފައިވާ އެއްވެސް ސިޔާސީ/އެނޫންވެސް ވަޒީފާއެއް ނޯންނާނެކަމަށް ގަލޮޅު ދެކުނު ދާއިރާގެ މެންބަރު މީކާއީލް އަހްމަދު ނަސީމް ވިދާޅުވެއްޖެއެވެ.
އެމްޑީޕީގެ އެތެރޭގެ މައްސަލަތައް ގިނަވެ ޕާޓީ ދެ ފެކްޝަނަކަށް ބެހިގެން ދިޔައިރު، މީކާޢިލް ހުންނެވީ ރައްޔިތުންގެ މަޖިލީހުގެ ރައީސް މުހައްމަދު ނަޝީދު ގެ ފެކްޝަނާއި އެކުގައެވެ. އެގޮތުން އޭރު، އޭނާ ދިޔައީ ސަރުކާރަށާއި، ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހަށް ތާއީދުކުރައްވާ މެންބަރުންނަށް ވަރަށް ބޮޑަށް ފާޑުވިދާޅުވަމުންނެވެ.
އަދި، ސަރުކާރުން ފޮނުވާހާ ބިލަކަށް އެމްޑީޕީގެ ސަރުކާރުގެ ފެކްޝަނުގެ މެންބަރުން ތާއީދުކޮށް އެ ބިލު ފާސްކުުރުމަށް ވޯޓު ދެނީ އެ ބޭފުޅުންގެ ޢާއިލާ މީހުންނަށް ސަރުކާރުންނާއި ސަރުކާރުގެ ކުންފުނިތަކުން ވަޒީފާ ހަމަޖައްސައިދޭތީ ކަމަށާ، އެގޮތުން އެފަދަ ކަމެއްގައި ކޮށްލާ ކޮންމެ ފޯން ކޯލަކާއި އެކު ވޯޓުދޭ ކޮޅު ބަދަލުވެ، ބިލަށް ތާއީދުކޮށް ނަގާ އަތްވެސް މަތިވަމުންދާކަމަށް ވިދާޅުވެ އޭނާ މީގެ ކުރިން ވަނީ ވަރަށް ބޮޑަށް ފާޑުވިދާޅުވެ ވާހަކަ ދައްކަވާފައެވެ.
އެހެން ނަމަވެސް ފަހަކަށް އައިސް އެފަދައިން ސަރުކާރަށް ފާޑުވިދާޅުވެ ވާހަކަ ދައްކަވާ މަންޒަރު ނުފެންނައިރު، ރައީސް ނަޝީދު ގެ ފެކްޝަނުގެ ބައެއް މެންބަރުން އެމްޑީޕީގެ ވިޕްލައިނާއި ޚިލާފްވާ އިރު ވެސް އޭނާ ވިޕްލައިނާ އެއްގޮތަށް ސަރުކާރުން ފޮނުވާ ބިލު ތަކަށް އަންނަނީ ވޯޓު ދެމުންނެވެ.
މިކަމާއި ގުޅިގެން އޭނާއަށް ފާޑުކިޔައި، ވިޕްލައިނާއި ޚިލާފަށް ވޯޓު ނުދެއްވައި، ކުރިންގެ ބަސްމަގު ބަދަލުވީ ޢާއިލާ މީހަކަށް ވަޒީފާއެއް ލިބުމުންތޯ އަހައި އިސްމާއީލް ޒަރިޔަންދު ކުރި ޓުވީޓަކަށް ރައްދު ދެއްވަމުން މީކާޢީލް ވިދާޅުވީ، އެއީ ވަރަށް ޒިންމާދާރުކަން ކުޑަ ތުހުމަތެއް ކަމަށެވެ.
"މިއަދާ ހަމައަށް އާއިލާގެ އެއްވެސް މީހަކަށް އަޅުގަނޑު އެދިގެން ހޯދި އެއްވެސް ސިޔާސީ/އެނޫންވެސް ވަޒީފާއެއް ނޯންނާނެކަން ވަރަށް ކެރިގެން ބުނަން. ޕާޓީގެ ވިޕްލައިނާއި އެއްގޮތަށް އަމަލުކުރުމަކީ އަބަދުވެސް ގަބޫލުކުރާ އުސޫލު." މީކާޢިލް ވިދާޅުވި އެވެ.
ވިޕްލައިނާއި ދެކޮޅަށް ވޯޓު ނުދެއްވަން މީކާއިލް ނިންމަވައި އެގޮތަށް ޢަމަލު ކުރައްވަމުން ދާއިރު، އެމްޑީޕީގެ ރައީސް ނަޝީދުގެ ފެކްޝަނުގެ މެންބަރުން އަންނަނީ އެބޭފުޅުންނާއި ދެކޮޅަށް ފިޔަވަޅު އެޅި ނަމަވެސް ވިޕްލައިނާއި ދެކޮޅަށް ވޯޓު ދެއްވާނެ ކަމަށް ބުނެ އެފަދައިން ޢަމަލު ކުރައްވަމުންނެވެ.
Advertisement
This content is created and paid for by advertisers and does not involve Voice Journalists
