ދިވެހިރާއްޖޭގައި ގަވައިދާއި ޚިލާފަށް އުޅޭ ބިދޭސީން ބޭތިއްބުމަށް ތަރައްގީކުރާ ޑިޓެންޝަން ސެންޓަރު އަންނަ އަހަރު އޮޕަރޭޝަނަށް ގެނެވޭނެކަމަށް ސަރުކާރުން ބުނެފިއެވެ.
ބިދޭސީން ބޭތިއްބުމަށް ސަރުކާރުން ތަރައްގީ ކުރާ ޑިޓެންޝަން ސެންޓަރަކީ 250 އާއި 300 ދެމެދުގެ މީހުންގެ ޖާގައިގެ ތަނެކެވެ. މިއީ އެމްޓީސީގެ އިޖްތިމާއީ ޒިންމާގެ ދަށުން އަޅާ ސެންޓަރެކެވެ.
ބިދޭސީންގެ މައްސަލަ ހައްލުކުރުމަށް 2019 ވަނަ އަހަރުން ފެށިގެން ސަރުކާރުން ވަނީ މަސައްކަތް ފަށައިފައެވެ. ކޯވިޑް-19 އާއި ގުޅިގެން އެ މަސައްކަތް މަޑުޖެހިފައި އޮތް ނަމަވެސް، އަލުން އެ މަސައްކަތް ފަށައިގަނެފައިވާކަަން ސަރުކާރުން ވަނީ ހާމަކޮށްފައެވެ.
ކޯވިޑްގެ ތެރޭގައިވެސް ބިދޭސީންގެ މައްސަލަ ހައްލުކުރުމަށް ގިނަ މަސައްކަތްތަކެއް ކުރެވުނެވެ. އެގޮތުން ބިދޭސީން ރެގިއުލަރައިޒްކުރުމުގެ ޕްރޮގްރާމްގެ ތެރެއިން 13000 މީހުން ގަވާއިދުގެތެރެއަށް ފައްތާ އަލުން މަސައްކަތްކުރުމުގެ ހުއްދަ ސަރުކާރުންވަނީ ދީފައެވެ.
އަދި އެޙާލަތުގައި ހުއްދަ ނެތި އުޅެމުންދިޔަ މީހުންގެ ތެރެއިން 24000 ބިދޭސީން ފުރުވާލާފައިވާކަމަށް ސަރުކާރުން ބުނެފައިވެއެވެ.
ގަވައިދާއި ޚިލާފަށް ރާއްޖޭގައި އުޅޭ ބިދޭސީންގެ މައްސަލަ ހައްލުކުރުމަށް ޑިޓެންޝަން ސެންޓަރެއް ގައިމްކުރުމުގެ މަސައްކަތް ސަރުކާރުން ކުރަމުންދާއިރު، އަންނަ އަހަރުގެ ކުރީކޮޅު އެތަން އޮޕަރޭޝަނަށް ގެނެވޭނެކަމަށް ސަރުކާރުން ވަނީ ބުނެފައެވެ.
އެ ސެންޓަރަކީ ބައިނަލްއަޤުވާމީ މިންގަނޑުތަކާއި އެއްގޮތަށް ގާއިމްކުރެވޭ ސެންޓަރެއް ކަމުގެ ޔަގީންކަންވެސް ސަރުކާރުން ވަނީ ދީފައެވެ.
ބިދޭސީންގެ މައްސަލަ ޙައްލުކޮށް އެމީހުންނާއި ގުޅިގެން ނިކުންނަމުންދާ އެކި ބާވަތުގެ ކުށްތައް ހުއްޓުވުމަކީ ސަރުކާރުން ޚާއްސަ އިސްކަމެއް ދީގެން ކުރިއަށްގެންދާ މަސައްކަތެކެވެ. އަދި އެ މައްސަލަތައް ހައްލުކުރުމަށް ސަރުކާރުގެ ކަމާ ގުޅުންހުރި ހުރިހާ އިދާރާތަކުންވެސް ގުޅިގެން މަސައްކަތް ކުރަމުންދާކަމަށް ސަރުކާރުން ވަނީ ބުނެފައެވެ.
Advertisement
This content is created and paid for by advertisers and does not involve Voice Journalists
