އެއްވެ އުޅުމުގެ ހައްގު ހަނިކުރުން އުވާލުމަށް މަޖިލީހަށް ހުށައަޅާފައި އޮންނަތާ 3 އަހަރު ފާއިތުވެގެން ގޮސްފައިވާކަމަށް ވިލިމާލޭ ދާއިރާގެ މެމްބަރު އަހްމަދު އުޝާމް ވިދާޅުވެއްޖެއެވެ.
އެއްވެ އުޅުމުގެ ގާނޫނަށް 2016 ވަނަ އަހަރު ގެނައި އިސްލާހުގައިވާ ގޮތުން މާލޭގައި ހުއްދަ ހޯދުމެއް ނެތި އެއްވެވޭނީ ސަރުކާރުން ކަނޑައަޅާ ތަންތަނުގައި އެކަންޏެވެ. ސަރުކާރުން ކަނޑައަޅާފައިވަނީ ހުއްދަ ހޯދުމެއް ނެތި އެއްވެވޭނީ މާލޭގެ ކާނިވާ ސަރަހައްދުގައި ކަމަށެވެ.
އެ މާއްދާ އުވާލުމަށް މަޖިލީހަށް ވަނީ ހުށައަޅާފައެވެ.
އޭގެއިތުރުން ގާނޫނުގެ އެ މާއްދާ ބާތިލްކުރަން ހައި ކޯޓަށް ދުސްތޫރީ މައްސަލައެއް ހުށައަޅާފައިވާއިރު، އެ މައްސަލައިގެ އަޑުއެހުމެއްވެސް ވަނީ ބާއްވާފައެވެ.
ކޯޓުގައި ކުރިއަށް ގެންދިޔަ އެ އަޑުއެހުމުގައި ދައުލަތުގެ ފަރާތުން ބުނީ އެއްވެ އުޅުމުގެ މިނިވަންކަން ހަނިކުރެވޭ ގޮތަށް ގާނޫނުގައި އޮތް އޮތުން އުވާލަން ރައްޔިތުންގެ މަޖިލީހަށް ބިލެއް ހުށަހަޅާފައިވާތީ، ގާނޫނުގެ އެ ބައި ބާތިލްކުރުމުގެ މައްސަލަ ހައި ކޯޓުން ނުބަލަން އެދޭކަމަށެވެ.
ދައުލަތުގެ އެ ހުށައެޅުމާއި ގުޅިގެން އުޝާމު ކުރެއްވި ޓްވީޓެއްގައި ވަނީ ބޮޑެތި ފާޑުކިޔުންތަކެއް އަމާޒު ކުރައްވާފައެވެ.
އޭނާ ވިދާޅުވީ ދައުލަތުން ޝަރީއަތުގެ މަޖިލީހުގައި ދެއްކީ ލަދުވެތި ވާހަކަތަކެއް ކަމަށެވެ.
އެއްވެ އުޅުމުގެ ހައްގު ހަނިކުރުން އުވާލުމަށް ރައްޔިތުންގެ މަޖިލީހަށް ހުށައަޅާފައި އޮންނަތާ ތިން އަހަރު ފާއިތުވެގެން ގޮސްފިކަމަށާއި، އެ ބިލުގެ މަސައްކަތް ހުއްޓުވާފައި އޮތީ ސަރުކާރުގެ ނުފޫޒުން ކަމާމެދު ޝައްކު ނުކުރައްވާކަމަށްވެސް އުޝާމު ވިދާޅުވިއެވެ.
އުޝާމުގެ އިތުރުން ސަރުކާރު ހިންގާ މައި ޕާޓީ އެމްޑީޕީގެ ބައެއް މެމްބަރުންވެސް ވަނީ ދައުލަތުގެ އެ ހުށައެޅުމާއި ގުޅިގެން ނުރުހުން ފާޅުކުރައްވާފައެވެ.
އެގޮތުން ރައްޔިތުންގެ މަޖިލީހުގެ އުނގޫފާރު ދާއިރާގެ މެމްބަރު މުހައްމަދު ވަހީދު (ވައްޑެ) ވިދާޅުވީ، އެއްވެ އުޅުމުގެ ހައްގު ހަނިކުރުމަކީ އެމްޑީޕީގެ އަސާސާއި ޚިލާފުކަމެއް ކަމަށެވެ.
އެއްވެ އުޅުމުގެ ހައްގު ހުއްޓުވާފައި އޮތުމަކީ އެމްޑީޕީގެ އަސާސްތަކާއި ޚިލާފަށް ޕާޓީ ހިންގަން މަސައްކަތް ކުރާކަމުގެ މިސާލެއްކަމަށް އޭނާ ވިދާޅުވިއެވެ.
Advertisement
This content is created and paid for by advertisers and does not involve Voice Journalists
