މިދިޔަ މަހު ގްރީން ފަންޑުން 60 މަޝްރޫއަކަށް 154.9 މިލިއަން ރުފިޔާ ހޭދަކޮށްފައިވާ ކަމަށް ފިނޭންސް މިނިސްޓްރީގެ ތަފާސް ހިސާބުތަކުން ދައްކައިފިއެވެ.

ފިނޭންސް މިނިސްޓްރީއިން ހާމަކޮށްފައިވާ ގޮތުގައި މިދިޔަމަހު ޚަރަދުކޮށްފައިވާ މިންވަރަކީ މިދިޔަ ޖުލައިމަހު ގްރީން ފަންޑުން ކުރި ޚަރަދާ އަޅާބަލާއިރު، %378 އިތުރު އަދަދެކެވެ. ސެޕްޓެމްބަރުމަހު ގްރީން ފަންޑުން 39 މަޝްރޫޢަކަށް، 32.4 މިލިއަން ރުފިޔާ ޚަރަދުކޮށްފައެވެ.

ފިނޭންސް މިނިސްޓްރީން އާއްމުކޮށްފައިވާ ގްރީން ފަންޑު ރިޕޯޓުގެ ތަފާސްހިސާބުތައް ދައްކާގޮތުން އޮކްޓޯބަރުމަހު 60 މަޝްރޫޢަކަށް ޚަރަދުކޮށްފައިވާއިރު، އޭގެތެރޭގައި ފެނާއި ނަރުދަމާގެ މަސައްކަތްތަކާއި ގޮނޑުދޮށް ޙިމާޔަތްކުރުމުގެ މަސައްކަތްތަކުގެ އިތުރުން ކުނި މެނޭޖްކުރުމުގެ މަޝްރޫއުތައް ހިމެނެއެވެ.

އެގޮތުން ގްރީން ފަންޑުން އޮކްޓޫބަރު މަހު އެންމެ ބޮޑު ހޭދައެއް ކޮށްފައިވަނީ ށ.ކޮމަންޑޫ ގޮނޑުދޮށް ހިމާޔަތްކުރުމުގެ މަޝްރޫޢަށެވެ. އެ މަޝްރޫއަށް އެކަނި 91.1 މިލިއަން ރުފިޔާ ޚަރަދުކޮށްފައިވެއެވެ. 

އޭގެ އިތުރުން ޕްރޮވިޝަން އޮފް ވޯޓަރ ސަޕްލައި، ސެނިޓޭޝަން އެންޑް ވޭސްޓު މެނޭޖްމަންޓު، އޮފިޑު ފޭސް -2 – 7.5 މިލިއަން ރުފިޔާ، ތ.ވޭމަންޑޫ ފެނުގެ ނިޒާމް ޤާއިމްކުރުމަށް 6.7 މިލިއަން ރުފިޔާ، ރ.އިންނަމާދޫ ފެނުގެ ނިޒާމް ޤާއިމްކުރުމަށް 6.4 މިލިއަން ރުފިޔާ، އަދި ށ ފީވަކުގެ ފެނުގެ ނިޒާމު ގާއިމުކުރުމަށް 6.2 މިލިއަން ރުފިޔާ ވަނީ ޚަރަދުކޮށްފައެވެ. 

މިއަހަރުގެ ފުރަތަމަ 10 މަސް ދުވަސްތެރޭ 820 މިލިއަން ރުފިޔާ ގްރީން ފަންޑަށް ލިބިފައިވާއިރު، އޭގެ ތެރެއިން 727 މިލިއަން ރުފިޔާ ވަނީ ޚަރަދުކޮށްފައެވެ. އަދި އޮކްޓޯބަރުމަހުގެ ނިޔަލަށް ގްރީން ފަންޑުގައި ހުރީ 801 މިލިއަން ރުފިޔާއެވެ.

ގްރީން ފަންޑަކީ ތިމާވެއްޓާ ގުޅުންހުރި މަސައްކަތްތައް ކުރުމަށް މާލީ އެހީ ހޯދުމަށް، ރާއްޖެ އަންނަ ފަތުރުވެރިންގެ އަތުން ނަގަމުން އަންނަ ޓެކްހެކެވެ. މި ޓެކްސް ރިސޯޓްތަކާއި، ގެސްޓްހައުސްއާއި ސިޓީ ހޮޓާތަކާއި ސަފާރީތަކަށް އަންނަ ފަތުރުވެރިންވެސް ދައްކަންޖެހެއެވެ.