2023 ވަނަ އަހަރުގެ ރިޔާސީ އިންތިހާބުގައި ކައިރިވެފައި ވަނިކޮށް، ސަރުކާރާ އި އަމިއްލަ ފަރާތްތަކާ ދެމެދު ވެފައިވާ އެއްބަސްވުންތަކާ ގުޅިގެން އުފެދިފައިވާ މައްސަލަތައް ޙައްލުކުރުމުގައި ޢަމަލުކުރާނެ ގޮތުގެ އުސޫލެއް ކަނޑައެޅުމާއި ގުޅިގެން ޕީޕީއެމްގެ ނާއިބު ރައީސް އަދި ރައްޔިތުންގެ މަޖިލީހުގެ ނައިފަރު ދާއިރާގެ އަހްމަދު ޝިޔާމް ސަރުކާރަށް ފާޑުވިދާޅުވެއްޖެއެވެ. 

އެއްބަސްވުންތަކާ ޚިލާފުވުމުން ލިބޭ ގެއްލުމުގެ ބަދަލުދޭނެ އުސޫލަށް ޢަމަލުކުރަން ފެށުމާއި ގުޅިގެން ޝިޔާމް މިއަދު ކުރެއްވި ޓުވީޓެއްގައި ވިދާޅުވީ، ބަދަލުދޭ އުސޫލެއް ހަދާފައި ވަނީވެސް، އެފަދަ އުސޫލެއް އުފަން ނުކޮށް އެތައް ސަތޭކަ މިލިޔަން ރުފިޔާއެއް ބެހުމަށްފަހުގައި ކަމަށެވެ. 

"އިންތިޚާބު އަހަރާ ދިމާކޮށް އަނެއްކާވެސް ރައްޔިތުންގެ ފައިސާ ބަހާ ހުސްކުރަންއުޅޭ ކަހަލަ. މީގެކުރިން ބެހިފައިސާގެ ޔައުމިއްޔާތައްވެސް އަޅުގަނޑުމެން ހޯދާ އެ މައްސަލަތައް ބަލާނަން." ޝިޔާމް ވިދާޅުވިއެވެ. 

ރައީސް އޮފީހުން އިއްޔެ ނެރެފައިވާ ބަދަލުދޭ އުސޫލުގައި ބުނެފައިވާ ގޮތުގައި، އެއީ، ސަރުކާރާއި އަމިއްލަ ފަރާތްތަކާ ދެމެދު ވެފައިވާ އެކިއެކި އެއްބަސްވުންތަކާމެދު، ޤާނޫނާއި، ގަވާއިދާއި، ސަރުކާރުން އާންމުކޮށް ޢަމަލުކުރަމުންދާ އުސޫލުތަކާ ޚިލާފަށް އަދި އެއްވެސް ހަމަހަމަކަމެއް އިންސާފުވެރިކަމެއް ނެތި، ވަކި ފަރާތަކަށް ނުވަތަ ފަރާތްތަކަކަށް އަމާޒުކޮށްގެން ސަރުކާރުން ޢަމަލުކޮށްފައި ވުމުގެ ސަބަބުން ގެއްލިފައިވާ ވިޔަފާރީގެ ފުރުޞަތަށް ބަދަލު ހަމަޖައްސައިދީ، މާލީ ގެއްލުން ލިބިފައިވާނަމަ، އެފަދަ ގެއްލުމަކަށް ޢަދުލުވެރިކަމާއި ހާމަކަމާއެކު އަދި ދައުލަތުން އުފުލަންޖެހިދާނެކަމަށް އަންދާޒާކުރެވޭ މާލީ ބުރަ ވީވަރަކުން ކުޑަކުރުމާއެކު، ގެއްލުމުގެ ބަދަލު ހަމަޖައްސައިދީ ނުވަތަ ގެއްލުމުގެ ބަދަލު ދީ، މައްސަލަތައް ޙައްލުކުރުމުގައި ޢަމަލުކުރާނެ ހަމަތަކާއި އިޖުރާއަތުތައް ބަޔާންކުރުމަށް ޓަކައި އެކުލަވައިލައިފައިވާ އުސޫލެއް ކަމަށެވެ. 

އެ އުސޫލުގެ ދަށުން ސަރުކާރާއި އަމިއްލަ ފަރާތްތަކާ ދެމެދު ކޮށްފައިވާ ވިޔަފާރި މުޢާމަލާތްތަކަށް ހަދައިފައިވާ އެއްބަސްވުންތަކުގެ ތެރެއިން، 7 އޮގަސްޓު 2008 އިން ފެށިގެން އުސޫލަށް ޢަމަލުކުރަން ފަށާ ތާރީޚާ ދެމެދު، އެ އެއްބަސްވުމަކާމެދު އުފެދިފައިވާ މައްސަލަތައް ހައްލުކުރެވިގެންދާނެ ކަމަށް ބުނެފައިވެއެވެ.

ރައީސް އޮފީހުން މިފަދަ އުސޫލެއް ނެރެ އިއްޔެ އަމަލުކުރަން ފަށާފައިވާއިރު، އެ އުސޫލު ނެރުމުގެ ކުރިންވެސް އެފަދަ މައްސަލަތަކުގައި ސަރުކާރުން ބަދަލު ދީފައިވާ ކަމަށް ބުނެ ސަރުކާރަށް ވަނީ ފާޑުކިޔުންތައް އަމާޒުވެފަ އެވެ.