ނުކުޅެދުންތެރިކަން ހުންނަ މީހުން ގިންތިކުރުމަކީ، އެމީހުންގެ ޙާލަތު ދެނެގަނެވި އެހީތެރިކަން ފޯރުކޮށްދިނުމަށް ފަސޭހަވާނެކަމެއްކަމަށް ނޭޝަނަލް ސޯޝަލް ޕްރޮޓެކްޝަން އެޖެންސީ، އެންސްޕާގެ ސީއީއޯ މަރްޔަމް ޝަފީޤް ވިދާޅުވެއްޖެއެވެ.

އެންސްޕާގެ ސީއީއޯ މަރްޔަމް ޝަފީޤް ވިދާޅުވީ، ނުކުޅެދުންތެރިކަން ހުންނަ މީހުން ގިންތިކުރާނީ އެމީހެއްގެ ނުކުޅެދުންތެރިކަން ހުރި މިންވަރަށް ބަލައިގެން ކަމަށެވެ. އަދި އެކަން ކުރާނީ ޑޮކްޓަރުން މެދުވެރިކޮށް ކަމަށާއި، އެކަމަށް ޚާއްސަ ރަޖިސްޓްރީއެއް އެކުލަވާލުމުގެ މަސައްކަތް މިހާރު ކުރަމުން އަންނަ ކަމަށް މަރްޔަމް ޝަފީޤް ވިދާޅުވިއެވެ.

މަރްޔަމް ވިދާޅުވީ ނުކުޅެދުންތެރިކަން ހުންނަ މީހުން ގިންތި ކުރުމަކީ އެލަވަންސް ދިނުމުގެ އިތުރަށް، އެމީހުންނަށް އެތައް ފައިދާއެއް ވާނެ ކަމެއްކަމަށެވެ.

Advertisement

މިހާރު ނުކުޅެދުންތެރިކަން ހުންނަ މީހުންނަށް ޚިދުމަތް ދިނުމުގައި ދިމާވާ އެންމެ ބޮޑު އެއް ގޮންޖެހުމަކީ ވަކިވަކި މީހުންގެ ތަފްސީލްތައް ހޯދަން އެހުންކަމަށާއި، ނަމަވެސް އެމީހުން ގިންތި ކޮށްފައި ހުރުމަކީ ބަލި މީހުން ދެނެގަނެވި، އެމީހުންނަށް ފަސޭހައި ޚިދުމަތްތައް ދެވޭނެ މަގެއް ކަމަށް މަރްޔަމް ވިދާޅުވިއެވެ.

އެގޮތުން ނުކުޅެދުންތެރިކަން ހުންނަ މީހުންނަށް ބޭނުންވާ ގޮނޑިއާއި، ހިއަރިން އެއިޑް އަދި އެނޫންވެސް ކަންކަން ބޭނުންވެފައިވާ މީހުން އެކަމަށް އެދުމުގެ ކުރިން އެމީހުން ދެނެގަނެވި އެޚިދުމަތް ފޯރުކޮށްދެވުން އަވަސްވެގެން ދާނެކަންވެސް އޭނާ ފާހަގަކުރެއްވިއެވެ. 

އަންނަ އަހަރަށް ލަފާކުރާ ދައުލަތުގެ ބަޖެޓުގައި ވަނީ ނުކުޅެދުންތެރިކަން ހުންނަ މީހުން ގިންތިކޮށް، އެމީހުންނަށް ދައުލަތުން ދެމުން އަންނަ އެލަވެންސް ބޮޑުކުރުމަށް ހިމަނާފައެވެ.

ރާއްޖޭގެ އާބާދީގައި 36000 އަށްވުރެ ގިނަ ނުކުޅެދުންތެރިކަމުގެ އެކި ޙާލަތު ކުރިމަތިވެފައިވާ މީހުންނަށް ސަރުކާރުން ދެއްވަމުން ގެންދަވާ އިނާޔަތްތައް ބޮޑުކުރުމަށް ނިންމަވާފައިވާކަން ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިޙުވެސް ވަނީ ޢިއުލާންކުރައްވާފައެވެ.

އެ ބަދަލު އަންނަ އަހަރުގެ ބަޖެޓުގައި ހިމަނާފައިވާއިރު، އަންނަ އަހަރުގެ ބަޖެޓުން މި ބަޔަށް ކުރެވޭ ހޭދަ މިއަހަރަށްވުރެ %6 އިތުރުވާނެ ކަމަށް ވަނީ ލަފާކޮށްފައެވެ.