އިންޑިއާ އާއި ޗައިނާ އަކީ އެއް ފިއްސަކުން ކުލަ ޖެއްސޭނެ ދެގައުމު ނޫން ކަމަށް ވިދާޅުވެ، ރައްޔިތުންގެ މަޖިލީހުގެ ރައީސް އަދި ކުރީގެ ރައީސް މުހައްމަދު ނަޝީދު އިންޑިއާއަށް ތަޢުރީފް ކުރައްވައި، ޗައިނާ އަށް އަނެއްކާވެސް ތުހުމަތުތަކެއް ކުރައްވައިފިއެވެ. 

ނަޝީދުގެ ތުހުމަތު އަނެއްކާވެސް ޗައިނާއަށް އަމާޒުވެފައި މިވަނީ ހަސަން ކުރުސީގެ ނަމުގައި ހިންގާ ޓްވީޓާ އެކައުންޓަކުން ކުރި ޓްވީޓަކަށް ދެއްވި ރައްދެއްގަ އެވެ.

ހަސަން ކުރުސީގެ ނަމުން ހިންގާ ޓުވިޓާ އެކައުންޓުން ކޮށްފައިވާ ޓުވީޓެއްގައި ބުނީ، ޗައިނާއަށްވެސް، އިންޑިއާއަށްވެސް އަބަދު މިރާއްޖެއަށް ލޯނު އެހީ ނުދެވޭނެ ކަމަށެވެ. އެކަން ތަކުރާރު ވާނަމަ ދިވެހީންގެ ހަރުމުދާ އެ ގައުމުތަކަށް ދޭން ޖެހޭ ހިސާބަށް ކަންކަން ހިނގައިދާނެ ކަމަށެވެ. އެ ހަރު މުދާ ތަކުގެ ތެރޭގައި، ސީޕޯޓް ތަކާއި އެއާޕޯޓް ތައްވެސް ހިމެނޭނެ ކަމަށް ހަސަން ކުރުސީގެ އެ ޓުވީޓުގައި ބުނެފައިވެއެވެ. 

ހަސަން ކުރުސީގެ ނަމުގައި ހިންގާ ޓްވީޓާ އިން ވެރިފައިވެސް ކޮށްފައިވާ އެ އެކައުންޓަކީ ރައީސް ނަޝީދު ކަމަށް އެމްޑީޕީގެ ވެސް ބައެއް ބޭފުޅުން ވިދާޅުވާއިރު، މީގެ ކުރިންވެސް، އަދި ހަސަން ކުރުސީގެ އެ ޓުވީޓަށް ރައްދު ދެއްވަމުންވެސް ރައީސް ނަޝީދު ވަނީ އެއީ އެމަނިކުފާނުގެ އެކައުންޓެއް ނޫން ކަމަށް ވިދާޅުވެފައެވެ.  

އެއާއެކު، އިންޑިއާ އާއި ޗައިނާއަކީ އެއް ހަމައެއްގައި މިނޭނެ ދެ ގައުމެއް ނޫން ކަން ފާހަގަ ކުރައްވަމުން އިންޑިއާއަށް ތައުރީފު ކުރައްވާ ނަޝީދު ވިދާޅުވީ އިންޑިއާއިން ދިވެހީންނަށް އެހީތެރިވެ ދެނީ މިނިވަން ކަމާއެކު ތަަރައްގީގައި ކުރިއަށް ދިއުމަށް ކަމަށެވެ. އެހެންނަމަވެސް، ޗައިނާގެ އެހީގެ މަގުސަދަކީ އެ ގައުމުގެ ބޭނުންތަކަށް ފުރުސަތު ފަހިކޮށް ދަރަނި ދަންތުރައެއްގައި ޖެެއްސުން ކަމަށްވެސް ނަޝީދު ތުހުމަތު ކުރެއްވިއެވެ. 

މީގެ ކުރިންވެސް އިންޑިއާ އަށް ކުރެއްވި ދަތުރުފުޅެއްގައި އެ ގައުމުގެ ނޫހަކަށް ދެއްވި ބަސްދީގަތުމެއްގައި ރައީސް ނަޝީދު ވަނީ، އިންޑިއާ އާއި ރާއްޖެއާއި ދެމެދު އޮންނަ ގުޅުމަށް ވަރަށް ބޮޑަށް ތައުރީފް ކުރައްވައި، ޗައިނާއިން މަސައްކަތް ކުރަނީ ދިވެހިރާއްޖެ ދަރަނީގެ ދަންތުރައެއްގައި ޖައްސަން ކަމަށް ވިދާޅުވެފައެވެ.