ހުޅުމާލޭ ދެވަނަ ފިޔަވަހި ތަރައްގީ ކުރި އިރު، ކުރީގެ ރައީސް ޔާމީން އަބްދުލްގައްޔޫމް ގެ ސަރުކާރުން އެކަން ކުރައްވާފައިވަނީ އެކަށީގެންވާ ޕްލޭނެއް ނެތި ކަމަށް ރައީސް އޮފީހުގެ ތަރުޖަމާނު މިއުވާން މުހައްމަދު ވިދާޅުވެއްޖެއެވެ.  

މިއަދު ރައީސް އޮފީހުގައި ކުރިއަށްދިޔަ ނޫސްވެރިންގެ ބައްދަލުވުމުގައި ވާހަކަ ދައްކަވަމުން މިއުވާން ވިދާޅުވީ، ފާއިތުވި ހަފްތާތެރޭގައި ރައީސުލްޖުމްހުރިއްޔާގެ ނާއިބު، ފައިސަލް ނަސީމް ހިޔާ ސަރަހައްދުގައި ހަރަކާތްތެރިވާ އެކިއެކި ޖަމިއްޔާތަކާއި މަޝްވަރާ ކުރައްވާފައިވާ ކަމަށެވެ. އެ ބައްދަލުވުމުގެ ތެރެއިން ހުޅުމާލޭގަޔާއި، ހުޅުމާލޭ ދެވަނަ ފިޔަވަހީގައި ދިމާވާ ދަތިތަކާއި ގުޅޭގޮތުން މަޝްވަރާ ކުރެވިގެން ގޮސްފައިވާ ކަމަށް ވެސް ވިދާޅުވިއެވެ. 

"އެނގިވަޑައިގަންނަވާނެ، އެތައްހާސް ރައްޔިތުންގެ އާބާދީއަކަށް ފޭސް 2 ތަރައްގީ ކުރެވިގެންދިޔައިރު އެކަށިގެންވާ ޕްލޭނެއް ނެތި މީގެ ކުރީ ސަރުކާރުން އެކަން ކޮށްފަ އެއޮތީ. ހިޔާ ޓަވަރު ތަކުގައި މީހުން ދިރިއުޅެންގެށިއިރު، އެ ސަރަހައްދަށް ބޭނުންވާ އެހެނިހެން ގާއިމްކުރުމުގެ އެކަށީގެންވާ ޕްލޭނެއް ނެތުމާއި އެއްކޮށް، އެ ޕްލޭން ހަދައި އެކަން ތަންފީޒުކުރުމުގެ މަސައްކަތް ސަރުކާރުން ކުރަމުން މިދަނީ. އެކަމުގައި، ޓަވަރު ތަކުގައި ދިރިއުޅޭ އާއްމު ރައްޔިތުންގެ ވެސް ޚިޔާލާއި މަޝްވަރާ އާއި އެއްކޮަށް އެކަން ކުރަމުން މިދަނީ." މިއުވާން ވިދާޅުވިއެވެ. 

Advertisement

އެގޮތުން، އެސަރަހައްދުގައި ދިރިއުޅޭ މީހުންނަށް އެކަށީގެންވާ ސިއްހީ ފަރުވާ ހޯދޭނެ މަގު ތަނަވަސް ކޮށްދިނުމުގެ ގޮތުން ކްލިނިކެއް ގާއިމް ކުރުމުގެ މަސައްކަތް ކުރިއަށްދާ ކަމަށާއި، އަދި ޒުވާނުންނަށްވެސް އެކަށީގެންވާ ޚިދުމަތް ތަކެއް ގާއިމް ކުރުމަށް އާ އެތަނުގައި ޔޫތު ސެންޓަރެއް ގާއިމް ކުރިކަމަށް އޭނާ ވިދާޅުވިއެވެ.

ޔޫތު ސެންޓަރުގެ އިތުރުން އުމުރުން ދުވަސްވީ މީހުން އެކީ އެއްތަން ވެލައި، ވާހަކަދައްކާ ހިތްހަމަޖައްސާލުމަށް، އެ ސަރަހައްދުގައި އެލްޑާލީ ސެންޓަރެއް ގާއިމް ކުރުމުގެ މަސައްކަތާއި، ސަރަހައްދުގެ ސަލާމަތާއި ރައްކާތެރިކަން ކަށަވަރުކުރުމަށް ވެސް ގިނަ މަސައްކަތް ތަކެއް ކުރުމުގެ އިތުރުން، ކަރަންޓް ކެނޑޭ މައްސަލަ ހައްލު ކުރުމަށް ވެސް މަސައްކަތް ތަކެއް ކުރެވެމުންދާ ކަމަށް މިއުވާން ވިދާޅުވިއެވެ. 

މީގެ އިތުރުންވެސް ފޭސް 2 ތަރައްގީ ކުރި އިރު، ކުރީ ސަރުކާރުގެ ޕްލޭންއެއް ނެތް ކަމާއި، އެހެންކަމުން މިސަރުކާރުން ޕްލޭން ހަދައިގެން ގިނަ ކަންކަން އެ ސަރަހައްދަށް ކޮށްދެމުންދާކަން ހާމަކޮށްދެއްވުމަށް މިއުވާން ވަނީ މަސައްކަތް ކުރައްވާފައެވެ. 

މިއުވާން މިފަދައިން ވިދާޅުވި ނަމަވެސް ރައީސް ޔާމީނުގެ ވެރިކަމުގައި ފޭސް 2 ތަރައްޤީކުރާނެ ގޮތާ ގުޅޭ ގޮތުން 2015 ވަނަ އަހަރުގައި އާންމުކޮށްފައިވާ ޕުލޭންތަކިގައި އެ ސަރަހައްދުގައި ޤާއިމުކުރާނެ ސުކޫލުތަކާއި، ހޮސްޕިޓަލުތަކާއި، އަދި މަގުތައް ހަދާނެ ގޮތާއި އިތުރު ވަސީލަތްތައް ޤާއިމުކުރާނެ ގޮތް ހާމަކޮށްފައިވެއެވެ. އޭގެ އިތުރަށް އެ ސަރަހައްދުގައި ސަފާރީއާއި ޔޮޓުފަހަރު ބަނދަރުކުރެވޭ ގޮތަށް ޔޮޓް މެރީނާއެއް ތަރައްޤީކުރަން ޕުލޭނުކޮށްފައި އޮތެވެ.