އަދުގެ ރައީސުލްޖުމްހުރިއްޔާ އިބްރާހީމް މުހައްމަދު ޞާލިހުގެ މި ސަރުކަާރުން ބާޒާރު ކޮތަޅަކަށްދޭ ގަދަރުވެސް، ދިވެހި ރައްޔިތުންނަށް ނުދޭ ކަމަށް ޖަމިއްޔަތުއްސަލަފްގެ ޗީފް މާކެޓިންގ އޮފިސަރ ޢަލީ ރަމީޒު ވިދާޅުވެއްޖެެއެވެ.

ޤަތަރުގައި މިހާރު ކުރިއަށްދާ ވޯލްޑްކަޕް ގެ މެޗެއް ބައްލަވައި ލެއްވުމަށް ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު އެ ގައުމަށް ވަޑައިގަންނަވަން ޤަޠަރުގެ އަމީރު ޝައިޚް ތަމީމް ބިން ޙަމަދް އަލްޘާނީ ދައުވަތު ދެއްވާފައިވާ ކަމަށާ, އެހެންކަމުން ވޯލްޑްކަޕް ގެ ފަހުގެ މެޗުތަކުން މެޗެއް ބައްލަވައި ލެއްވުމަށް ރައީސް ގަތަރަށް ވަޑައިގަންނަވާނެ ކަމަށް ރައީސް އޮފީހުން އިއްޔެ ބޭއްްވި ނޫސްވެރިންގެ ބައްދަލްވުމުގައި ތަރުޖަމާނު މިއުވާން މުހައްމަދު ވަނީ ވިދާޅުވެފައެވެ. 

އެކަމާއި ގުޅިގެން ސަރުކާރަށް ފާޑުވިދާޅުވެ ޢަކީ ރަމީޒު ކުރެއްވި ޓުވީޓެއްގައި ވިދާޅުވީ، ރައްޔިތުންނާއިމެދު ކުޑަވެސް ލޯތްބެއް އޮތްނަމަ، ރައްޔިތުން އަތުން ނަގާ ޓެކްސް ބޮޑުކޮށްފައި ވޯލްޑްކަޕް ބަލަން ރައީސް ވަޑައި ނުގަންނަވާނެކަމަށެވެ. 

Advertisement

"ބާޒާރު ކޮތަޅަކަށްދޭ ގަދަރުވެސް، މިއަދު ދިވެހި ރައްޔިތުންނަށް ނުދޭ" ޢަލީ ރަމީޒު ވިދާޅުވިއެވެ. 

ދައުލަތުގެ އާމްދަނީ އިތުރު ކުރުމަށް އަންނަ ޖަނަވަރީ މަހުން ފެށިގެން، ރައްޔިތުން އަތުން ނަގާ ޖީއެސްޓީ 6 އިންސައްތަ އިން 8 އިންސައްތައަށް އަދި ޓީޖީއެސްޓީ 12 އިންސައްތަ އިން 16 އިންސައްތަ އަށް ބޮޑު ކުރަން ސަރުކާރުން ވަނީ ނިންމާފައެވެ. އަދި މީގެ އިތުރުން ބާޒާރު ކުރާއިރު ދޭ ޕްލާސްޓިކް ކޮތަޅު ތަކުންވެސް 2 ރުފިޔާ ނެގަން މިހާރު ވަނީ ފަށާފައެވެ.

ދައުލަތަށް ލިބޭ އާމްދަނީ އިތުރުކުރުމަށް ސަރުކާރުން މިފަދައިން ރައްޔިތުން އަތުން ފައިސާ ހޯދަމުންދާއިރު، ސަރުކާރުން ދަތުރުތަކަށާއި ސިޔާސީ މަގާމްތަކަށް ކުރާ ޚަރަދުތައް މަދުކުރުން މާ ބުއްދިވެރި ކަމަށް ގިނަ ބަޔަކު ދެކެއެވެ.