މީގެ ކުރިން 58 ފަހަރު ހައްޔަރުކުރި މީހަކުު, އަނެއްކާވެސް އޮފީހެއްގެ ތިޖޫރި ފަޅަން ހުއްޓައި ހައްޔަރު ކޮށް ބަންދުކޮށްފިއެވެ. 

އައްޑޫ ސިޓީ ފޭދުއަށް ނިސްބަތްވާ އުމުރުން 40 އަހަރުގެ އެ މީހާ މީގެ ފަސް ދުވަސް ކުރިން ހައްޔަރު ކޮށްފައިވަނީ ކޯސްޓްލައިން ކުންފުނީގެ އޮފީހުގެ ތިޖޫރީ ފަޅާލަން އުޅެނިކޮށް ކަމަށް ފުލުހުން ބުނެފައިވެއެވެ.

އޭނާގެ މައްޗަށް ކޮށްފައިވަނީ، ވައްކަންކުރުމާއި ހުއްދަނޫން ތަނަކަށް ވަނުމުގެ އިތުރުން މުދަލަށް ގެއްލުން ދިނުމުގެ ކުށުގެ ތުހުމަތެވެ.  

މަގުމަތީގައި ދިރިއުޅެމުންދިޔަ އެ މީހާ ބުނީ އެތަނަށް އޭނާ ވަނީ ނިދަން ކަމަށާއި އަދި އެއީ ގުދަނެއް ކަމަށެވެ. ނަމަވެސް އެއީ އޭނާ ވަނުމަށް ހުއްދަ އޮތްތަނެއް ނޫން ކަމަށް ފުލުހުން ބުނެފައިވާއިރު، އެއީ އޭނާ ނިދަން ހަމަޖެހިފައިވާ ތަނެއް ނޫން ކަމަށްވެސް ފުލުހުން ބުނެފައި ވެއެވެ.

މީގެ އިތުރުން، އޭނާ ހައްޔަރު ކުރީ ކޯސްޓްލައިން ކުންފުނީގެ އޮފީހުގެ ތިޖޫރި ތަޅާ އަޑުއިވިގެން އެތަނުގައި މަސައްކަތް ކުރާ މުވައްޒަފެއް ފުލުހުންނަށް ރިޕޯޓް ކުރުމާއި ގުޅިގެން އެތަނަށް ގޮސް ކަމަށް ފުލުހުން ބުނެފައިވެއެވެ. އަދި އެތަނުގެ ތެރެއިން ތިން މީހަކު ހުއްޓުވާފައިވާ ކަމަށް ފުލުހުން ބުނެފައިވާއިރު، ވައްކަން ކުރުމަށް ބޭނުން ކުރާ އާލާތްތައްވެސް ފެނިފައިވާ ކަމަށް ފުލުހުން ކޯޓުގައި ބުނެފައި ވެއެވެ. އޭގެ ތެރޭގައި ދެ ދަތްގަނޑާއި، ދެ ކަށިގަނޑާއި، އެއް ވަޑާން ކަށީގެ އިތުރުން އެއް ގްރޭންޑަރާއި، ދެ ގްރޭންޑަރުބުރާއި ތިން އަންގި ޖޯޑު ފެނިފައިވާ ކަމަށް ފުލުހުން ބުނެފައި ވެއެވެ.

އޭގެ އިތުރުން އޭނާ އަތުން އެ އޮފީހުގެ މާސްޓަރ ކާޑެއްވެެސް ފެނިފައިވާ ކަމަށް ފުލުހުން ބުނެފައި ވެއެވެ.

ފުލުހުން ކޯޓަށް ދީފައިވާ މައުލޫމާތަށް ބަލާއިރު، އޭނާއަކީ މިހާތަނަށް 58 ފަހަރު ހައްޔަރުކޮށްފައިވާ މީހެކެވެ. އަދި 19 ފަހަރަށް އޭނާ ބަންދުކޮށްފައި ވެއެވެ.