އިދިކޮޅު އިއްތިހާދުގެ ލީޑަރު އަދި ރިޔާސީ ކެނޑިޑޭޓު ރައީސް ޔާމީނުގެ މައްޗަށް ދައުލަތުން އުފުލާފައިވާ ދައުވާތަކާ ގުޅިގެން، ދައުވާކޮށްފައިވާ އެހެން ބައެއް ޚަޞްމުން ރައީސް ޔާމީނާ ދެކޮޅަށް ހެކިބަސްދީފިނަމަ އެ ފަރާތްތަކާ ދެކޮޅަށް ދައުވާނުކުރާނެކަމަށް ފުލުހުންގެ އިސްވެރިން ވިދާޅުވެފައިވާކަމަށް ރައީސް ޔާމީނުގެ ވަކީލުން ތުހުމަތުކުރައްވައިފިއެވެ.

މިއަދު ރައީސް ޔާމީނުގެ ޤާނޫނީ ވަކީލުންގެ ޓީމުގެ ފަރާތުން ބޭއްވި ނޫސްވެރިންގެ ބައްދަލުވުމެއްގައި އެމަނިކުފާނުގެ ވަކީލު އަލީ ޝާހު ވިދާޅުވީ, ސިޔާސީ ފަރާތްތަކަށް އުފުލޭ ދައުވާ ތަކާއި ގުޅިގެން، ފުލުހުންގެ އިސްވެރިންގެ ގޮތުގައި ތިބި ބައެއް ބޭފުޅުން، ބައެއް ޚަޞްމުންނަށް ވަކި ގޮތަކަށް ބަޔާން ދިނުމަށް އަންގަވަމުންދާ ކަމަށެވެ.

"ވަކި ގޮތަކަށް ރައީސް ޔާމީން ފުރޭމްކުރުމަށްޓަކައި ކަންކަންކުރުމަށާއި، އަދި އެގޮތަށް ބަޔާން ދީފިކަމަށް ވާނަމަ އެ ފަރާތްތަކުގެ މައްޗަށް ދައުވާނުކުރާނެކަމަށް ބުނެ، އެފަދަ ކަންކަން ހިންގާފައި އެބަހުރި. އެފަދަ ބައެއް އޯޑިއޯތައްވެސް އެބަހުރިމެ. އެ އޯޑިއޯތައްވެސް ހުރިކަން އަޅުގަނޑު ހިތުން މިހާރު ފުލުހުންނަށްވެސް އެނގޭނެ،" ޝާހު ވިދާޅުވިއެވެ.

އެހެންކަމުން، އެކަންކަމަށް ބަލާއިރު ދައުލަތުގެ ރަނގަޅު ނިޔަތެއް މިފަދަ މައްސަލަތަކުގައި ނެތްކަން އެނގޭ މިންވަރަށް ހެކި މިހާރު ތިލަވެފައިވާ ކަމަށެވެ.

މިއާއެކު އޭނާ ވަނީ ދިވެހި މުޖުތަމައުގެ މިހާރުގެ ހާލަތުންވެސް އެކަން ހާމަވާ ކަމުގެ މިސާލު ދައްކަވާފައެވެ. އެގޮތުން، ޖިންސީ ކުށުގެ ތުހުމަތުތައް ސިޔާސީ އެތައް ފަރާތްތަކަށް ކުރެވިފައިވާ ކަމަށާ، ބަނގުރަލުގެ މައްސަލަތަކުގެ ތުހުމަތު ސިޔާސީ އެތައް ފަރާތްތަކެއްގެ މައްޗަށް، ޚާއްސަކޮށް މަޖިލީހުގެ ބައެއް މެންބަރުންގެ މައްޗަށް ކުރެވޭއިރު، ދައުލަތުގެ މުއައްސަސާތަކުގައި ތިބި ވެރިން ބަނގުރަލާއި އޫރުގެ ފޮޓޯ ނަގައި އެ ގެންގުޅޭ މަންޒަރުވެސް ފާޅުވަމުންދާކަން އޭނާ ފާހަގަކުރެއްވިއެވެ. އަދި އެއީ އަންނަން އޮތް ޖީލުތަކަށް ދޭ ވަރަށް ނުރައްކާތެރި މެސެޖެއް ކަމަށްވެސް ވިދާޅުވިއެވެ. 

އެހެން ނަމަވެސް އެފަދަ ފަރާތްތަކުގެ މައްސަލަތައް ނުބަލައި ފުލުހުންނާއި ޕީޖީން އެކަން ވަންހަނާ ކުރުމަށް މަސައްކަތް ކުރަމުންދާ ކަމަށްވެސް އޭނާ ތުހުމަތުކުރެއްވިއެވެ. 

މިއާއެކު ޝާހު ވަނީ އެމްއެމްޕީއާރުސީގެ މައްސަލަ އެތައް ބައެއްގެ މައްޗަށް ކުރެވޭ އިރުވެސް އެކަން ނުބެލޭ ކަމަށާ، އެހެން ކަމުން ހަމަހަމަ ކަމެއް ނުފެންނަ ކަމަށް ވިދާޅުވެފައެވެ.

އެގޮތުން އޭނާ ވަނީ ޔޫތު އެންޑް ސްޕޯޓްސް މިނިސްޓަރު އަޙްމަދު މަހުލޫފުގެ މައްޗަށް އުފުލާފައިވާ ރިޝްވަތު ޤަބޫލުކުރުމުގެ ދައުވާގެ މައްސަލަ ކުރިއަށްނުގެންގޮސް މަޑުޖައްސާފައި އޮތް އޮތުން ފާހަގަކުރައްވާފައެވެ. 

"މަހުލޫފުގެ މައްޗަށް ހިންގުނު ޝަރީޢަތްތައް ކިހިނެއްތޯވީ، އޭނާގެ އެކައުންޓަށް ލާރި ޖަމާވުމާއި، ޖަމާވި ގޮތް ނުދެއްކުމާއި، އެއީ އެމްއެމްޕީއާރުސީގެ ފައިސާކަން ރަނގަޅަށް ސާފުވާއިރު ކޮން ކަމެއްތޯ ބެލުނީ ކުރެވުނީ؟ ދެން ކޮން ވާހަކައެއްތޯ މި ދައްކަނީ؟،" ޝާހު ސުވާލުކުރެއްވިއެވެ.

ޝާހުގެ އިތުރުން ރައީސް ޔާމީނުގެ ވަކީލު ޝިޔާޒު ވަނީ ރައީސް ޔާމީނުގެ މައްޗަށްކުރާ ދައުވާތަކަކީ ސްކްރީން ޕްލޭއެއްގެ ގޮތަށް ސީންތަކެއް ރާވައިގެން ކުރާ ދައުވާތަކެއް ކަމަށާ، އެ ދައުވާތައް ކުރަނީ މައްސަލައިގެ ކިތާބީ ހެކީގެ ތެރެއިން ދައުލަތުން ބޭނުންވާ އެއްޗެއް ހާމަކޮށް ބޭނުންނުވާ އެއްޗެއް ފޮރުވައިގެން ކަމަށާއި، ފޮރުވާފައި ހުންނަ ކަންކަމާއި ތަކެތި ހާމަވަނީ މުޅިންވެސް ޝަރީޢަތުގެ މަރުހަލާގައި ކަމަށް ވިދާޅުވިއެވެ.