މެޖިސްޓްރޭޓް އެއްގެ ސުލޫކީ މައްސަލަ ބެލުމުގެ ތެރެއިން އިތުރު ދެ މެޖިސްޓްރޭޓް އެއްގެ ސުލޫކީ މައްސަލައެއް ފެންމަތިވެ އެ މައްސަލަ ބަލަން ޖުޑީޝަލް ސަރވިސް ކޮމިޝަނުން ނިންމައިފިއެވެ.
ޖޭއެސްސީީން މިފަހަރު ސުލޫކީ މައްސަލަ ބަލަން ނިންމާފައިވަނީ ސ.ޖުޑީޝަލް ދާއިރާގެ އިސްމެޖިސްޓްރޭޓް އަލްއުސްތާޛު މުޙައްމަދު ހާޝިމް އާއި ސ.ހިތަދޫ މެޖިސްޓްރޭޓް ކޯޓުގެ މެޖިސްޓްރޭޓް އަލްއުސްތާޛާ ޒިޔާދާ ޠާހިރުގެއެވެ.
އެކަމާއި ގުޅިގެން އިތުރު ތަފްސީލް ދެމުން ޖޭއެސްސީީން ބުނީ، އެ ދެ ފަނޑިޔާރުންގެ ސުލޫކީ މައްސަލައެއް ފެންމަތިވީ، ސ.ހިތަދޫ މެޖިސްޓްރޭޓް ކޯޓުން ބަންދާމެދު ގޮތެއް ނިންމުމަށް ބޭއްވި މައްސަލައަކަށްފަހު އެ ނިންމުމާ ގުޅޭ ގޮތުން ނޫސްބަޔާނެއް ނެރުމުގައި ފަނޑިޔާރުންގެ ސުލޫކީ މިންގަނޑާ ޚިލާފަށް ސ.ހިތަދޫ މެޖިސްޓްރޭޓް ކޯޓުގެ މެޖިސްޓްރޭޓް އަލްއުސްތާޛު ރަފީޢުއްދީން އަޙްމަދު ޢަމަލުކޮށްފައިވާކަމަށް ބެލެވޭތީ 02 މާރޗް 2022 ވަނަ ދުވަހު ތަޚްޤީޤު ކުރަން ފެށި މައްސަލައިގެ ތަޙްޤީޤުގެ ތެރެއިން ކަމަށެވެ.
އެގޮތުން އަލްއުސްތާޛު މުޙައްމަދު ހާޝިމް އާއި އަލްއުސްތާޛާ ޒިޔާދާ ޠާހިރުވެސް މި ތުހުމަތުގައި ސުލޫކީ މިންގަނޑާ ޚިލާފަށް ޢަމަލުކޮށްފައިވާކަމަށް ބެލެވޭތީ، އެ މައްސަލަ ބެލުމަށް 2022 ނޮވެމްބަރ 27 ވީ އާދީއްތަ ދުވަހު ބޭއްވި ޖުޑީޝަލް ސަރވިސް ކޮމިޝަނުގެ 85 ވަނަ ޖަލްސާގައި ނިންމާ ކޮމިޓީއެއް އެކުލަވާލައިފައިވާ ކަމަށް ޖޭއެސްސީީން ބުނެފައިވެއެވެ.
Advertisement
This content is created and paid for by advertisers and does not involve Voice Journalists
