ތިލަފުށީ ފަޅުގައި އަޅާފައިވާ އުޅނަދުތަކާއި، އެ ފަޅަށް ފެތިފައިވާ އުޅނަދުތައް ނަގައި އެތަކެތި ނައްތާލުމުގެ ހައްގު ހައުސިން ޑިވެލޮޕްމަންޓު ކޯޕަރޭޝަން (އެޗްޑީސީ) އަށް ލިބިގެންވާކަމަށް ޝަރީއަތުން ކަނޑައަޅަން ޖެހޭ ސަބަބެއް ނެތްކަމަށް ސިވިލް ކޯޓުން ބުނެފިއެވެ. 

ތިލަފުށީ ފަޅުގައި އަޅާފައިހުރި އުޅަނދުތައް ނެގުމަށް އަންގައި އެޗްޑީސީން ވަނީ މީގެ ކުރިން ފަސް ފަހަރު އިއުލާނު ކޮށްފައެވެ.

އެތައް ފަހަރަކު އިއުލާނު ކުރުމުން ވެސް އުޅަނދުތައް ނަގާފައިނުވާތީ އެޗްޑީސީން ވަނީ އެ މައްސަލަ ސިވިލް ކޯޓަށް ހުށައަޅާފައެވެ. އެޗްޑީސީއިން ކޯޓުގައި އެދިފައިވަނީ ތިލަފުށީ ފަޅުގައި އަޅާފައިވާ އަދި އެ ފަޅަށް ފެތިފައިވާ އުޅަނދުތައް ނަގައި ނައްތާލުމުގެ ހައްގު އެ ކޯޕަރޭޝަނަށް ލިބިގެންވާކަމަށް ކަނޑައަޅައި ދިނުމަށެވެ. 

Advertisement

އެ މައްސަލައާއި ގުޅިގެން ސިވިލް ކޯޓުން ކަނޑައަޅާފައިވަނީ ތިލަފުށީ ފަޅުގައި އަޅާފައި ހުރި އުޅަނޑުތަކާއި، އެ ފަޅަށް ފެތިފައިވާ އުޅަނދުތައް ނަގައި ފަޅު ހުސްކުރުމަށް އެޗްޑީސީއަށް ކޯޓު އަމުރެއް ބޭނުން ނުވާނެކަމަށެވެ.

އަދި އެ އުޅަނދުތައް ނައްތާލުމާއި ގުޅޭގޮތުން ޝަރީއަތުން ގޮތެއް ކަނޑައަޅަން ޖެހޭ ޝަރުއީ އަދި ގާނޫނީ ސަބަބެއްވެސް އެޗްޑީސީއަށް ދެއްކިފައި ނުވާކަމަށް ސިވިލް ކޯޓުން ވަނީ ކަނޑައަޅާފައެވެ.