240 ޓަނުގެ މަސް ރައްކާކުރެވޭނެ އިތުރު 3 ބޯޓު މިފްކޯއިން ގަނެފިއެވެ. 

އެކަމާއި ގުޅޭގޮތުން މިފްކޯގެ މެނޭޖިންގ ޑިރެކްޓަރު އިސްމާއިލް ފައުޒީ ވިދާޅުވީ މިހާރު ކުރަމުންދަނީ އެ ބޯޓުތައް ރަޖިސްޓްރީ ކުރުމުގެ މަސައްކަތް ކަމަށެވެ. 

މަސްވެރިން ބާނާ މަސް ކިރުމުގައި ބޮޑެތި ގޮންޖެހުންތަކެއް ދިމާވެފައިވާކަން ފާހަގަކޮށް، މަސްވެރިން ގިނަ ޝަކުވާތަކެއް ކުރަމުން ދިއުމާއި ގުޅިގެން، މިދިޔަ އޭޕްރިލް މަހުގައި ފިޝަރީސް މިނިސްޓަރު ޑރ ހުސެއިން ރަޝީދު ވަނީ މަސް ކިރުވާ، މަސް ގަނެވޭނެ އިތުރު ގޮތްތަކެއް ހޯދުމަށް ސަރުކާރުން މަސައްކަތް ކުރަމުންދާކަމަށް ވިދާޅުވެފައެވެ. 

އަދި ސަރުކާރުގެ މަސް ކުންފުންޏަށް މަސް ގަންނަ އަދަދު އިތުރުކުރުމަށާއި ފިނިކުރި މަސް ބެހެއްޓޭނެ ޖާގަ އިތުރުކުރުމުގެ މަޝްރޫއުތަކެއް ފަށާފައިވާކަމަށް މިނިސްޓަރު ވިދާޅުވިއެވެ. 

އެގޮތުން ސަރުކާރުން ކުރަމުންދާ މަސައްކަތްތަކުގެ ތެރޭގައި ކޫއްޑޫގެ ބަނދަރު ބޮޑުކުރުމާއި، ކޯލްޑް ސްޓޯރޭޖް ކެޕޭސިޓީ އިތުރުކުމުުގެ މަސައްކަތް ހިމެނެއެވެ. އެ މަޝްރޫއުގެ ދަށުން ކޫއްޑޫގެ ކޯލްޑް ސްޓޯރޭޖަށް އިތުރުކުރާ 4،000 ޓަނާއެކު ޖުމުލަ 6،000 ޓަނަށް ޖާގަ އިތުރު ކުރަން އޮތީ ހަމަޖެހިފަ އެވެ.

އޭގެ އިތުރުން ބޭރުގެ ބޯޓުތަކަށް މަސް ކިރުވުމުގެ އިންތިޒާމުތައް ހަމަޖެއްސުމުގެ މަސައްކަތްވެސް ކުރަމުން އަންނަކަމަށް ސަރުކާރުން ވަނީ ބުނެފައެވެ.