މިދިޔަ އަހަރު މާލެއިން އަތުލައިގަތް 119 ކިލޯގެ ޑްރަގުގެ މައްސަލައިގައި ހައްޔަރުކޮށް، ޝަރީއަތް ނިމެންދެން ބަންދުކޮށްފައިހުއްޓާ ދޫކޮށްލި ގދ. ހޯނޑެއްދޫ އަލޯރާ، އަހުމަދު މުޖާހިދު އަނެއްކާވެސް ޝަރީއަތް ނިމެންދެން ބަންދު ކުރުމަށް ހައިކޯޓުން ހުކުމްކޮށްފި އެވެ.

މިދިޔަ އަހަރު ޑިސެމްބަރު 12 ގައި މާލޭގެ މަގުމަތިން ޓެކްސީއެއް ހުއްޓުވައި، ޓެކްސީންނާއި އިތުރު ކާރަކާއި ސައިކަލެއްގައި ފޮރުވާފައި ހުއްޓާ އަތުލައިގަތް 119 ކިލޯގެ ޑްރަގުގެ މައްސަލައިގައި ދައުލަތުން ދައުވާކުރަނީ ގދ. ހޯނޑެއްދޫ ތިން މީހުން ކަމަށްވާ އަލީ ޒުބައިރާއި އަހުމަދު ސުނައިނާއި އަހުމަދު މުޖާހިދުގެ މައްޗަށެވެ.

އެ ތިން މީހުން ޝަރީއަތް ނިމެންދެން ބަންދުގައި ބަހައްޓަން ނިންމީ މިދިޔަ މާޗް މަހު 9 ގަ އެވެ. އެހެންނަމަވެސް އެމީހުންގެ ތެރެއިން މުޖާހިދު، މި ނޮވެމްބަރު މަހުގެ 23 ވަނަ ދުވަހު ކްރިމިނަލް ކޯޓުން ވަނީ ދޫކޮށްލާފައެވެ. އެހެންވެ ދައުލަތުން އެ މައްސަލަ ހައިކޯޓުގައި އިސްތިއުނާފު ކުރީ އެވެ.

އެ މައްސަލައިގައި ހައިކޯޓުން ކުރި ހުކުމުގައި ވަނީ ދަށު ކޯޓު ސެކްޝަނުގެ ދާއިމީ ފަނޑިޔާރަކު ނެތުމާއި އެކަށީގެންވާ އަވަސް މިނެއްގައި ޝަރީއަތް ކުރިޔަށް ދިއުން އެއީ ކުށުގެ ތުހުމަތުވާ މީހާ ނުވަތަ ދައުވާ އުފުލާފައިވާ މީހާ ބަންދުން ދޫކޮށްލަން ޖެހޭ ގާނޫނީ އަދި ޝަރުއީ ސަބަބެއް ނޫން ކަމަށެވެ. އެގޮތުން މައްސަލައިގައި ދާއިމީ ފަނޑިޔާރެއް ނެތިއްޖެ ހާލަތެއްގައި ގާނޫނުގައި އަމަލު ކުރުމަށް އޮންނަ ގޮތް ފާހަގަކޮށް ހުކުމުގައި ބުނެފައި ވަނީ ދެން މައްސަލަ ކުރިޔަށް ގެންދަން ޖެހޭނީ އެހެން ފަނޑިޔާރަކާއި ހަވާލުކޮށްގެން ކަމަށެވެ.

އެހެން ކަމުން، ހައިކޯޓުގެ ހުކުމުގައި ވަނީ ދަށު ކޯޓުން މުޖާހިދު ދޫކޮށްލުމަށް ނެރުނު އަމުރު ބާތިލުކޮށް އޭނާ ބަންދު ކުރުމަށް ކޯޓުން އޭގެ ކުރިން ނެރުނު އަމުރު އަލުން އިޔާދަކޮށް އެ ތަންފީޒު ކުރުމަށެވެ.