ގޭބީސީތަކާއި އިމާރާތްތަކުން ކުނި ނެގުމުގެ އެއްވެސް ކަމެއްގެ ތެރެއަށް މާލެ ސިޓީ ކައުންސިލުން ނުވަންނާނެ ކަމަށާ، އެކައުންސިލުން ކުނި ނަގާނީ ހަމައެކަނި މާލޭގެ މަގު ތަކާއި އާއްމު ތަންތަނުން ކަމަށ މާލޭ ސިޓީ ކައުންސިލްގެ މޭޔަރު ޑރ. މުހައްމަދު މުއިއްޒު ވިދާޅު ވެއްޖެ އެވެ.
ލާމަރުކަޒީ ގާނޫނުގެ ދަށުން މަގުތަކާއި އާންމު ތަންތަން ސާފު ކުރުމަކީ ކައުންސިލުގެ ޒިންމާއެއް ކަމަށް ވާއިރު، އެ މަސައްކަތް މިހާރު ކުރަނީ ވެމްކޯއަށް އައުޓްސޯސް ކޮށްގެންނެވެ. ނަމަވެސް، ސިޓީ ކައުންސިލުން ވެމްކޯއާއެކު މާލެ އާއި ވިލިމާލޭގެ ކުނި ކެހުމާއި، އެ ކުނި ނެގުމާއި އުކާލުމަށް ވެފައިވާ އެއްބަސްވުމުގެ މުއްދަތު މި ޑިސެމްބަރު މަހުގެ 26 ވަނަ ދުވަހު ހަމަވުމުން އެއްބަސްވުން އާ ނުކުރަން ސިޓީ ކައުންސިލުން ވަނީ ނިންމާފަ އެވެ.
ސިޓީ ކައުންސިލްގެ އެ ނިންމުމާއި ގުޅިގެން ގިނަ ބައެއްގެ މެދުގައި ތަފާތު ގޮތްތަކަށް ވާހަކަތައް ފެތުރެމުންދާތީ އެކަން ސާފުކޮށް ދެއްވައި ޑރ.މުޢިއްޒު ވިދާޅުވީ ވެމްކޯ އާއި ސިޓީ ކައުންސިލާ ވެފައިވާ އެއްބަސްވުން ބާތިލު ނުކުރާ ކަމަށާ ނަމަވެސް މުއްދަތު ހަމަވުމުން އެގްރީމެންޓް ނިމުމަކަށް އަންނަނީ ކަމަށެވެ.
އަދި އެއްބަސްވުމުގެ މުއްދަތު ހަމަވުމުން ކައުންސިލުން ކުނި ނަގާނީ މަގުތަކާއި ޕާކުތަކާއި ފަޅުތެރެއާއި އާންމު ސަރަހައްދުތަކުން ކަމަށާ، އެހެން ނަމަވެސް، މާލޭގެ ގޭގެއިންނާއި އިމާރާތްތަކުން ކުނި ނެގުމުގެ އެއްވެސް ކަމެއްގެ ތެރެއަށް ސިޓީ ކައުންސިލުން ނުވަންނާނެ ކަމަށް ޑރ. މުޢިއްޒު ވަނީ ވިދާޅުވެފައެވެ.
މިއާއެކު މުޢިއްޒު ވިދާޅުވީ، ސިޓީ ކައުންސިލުން މަގުތަކާއި އާއްމު ތަންތަނުން ކުނި ނެގި ނަމަވެސް، އެ ނަގާ ކުނިވެސް ހަވާލު ކުރާނީ ވެމްކޯގެ ސައިޓާ ކަމަށާ ގޭޓް ފައިސާގެ ގޮތުގައި ވެމްކޯއަށް ފައިސާ ވެސް ދައްކާނެ ކަމަށެވެ. އެހެންކަމުން ކުނި އުކާލުމުގެ ކަންކަންވެސް ކުރާނީ ވެމްކޯގެ ބާޖުތަކުގައި މިހާރު ވެސް އެކަން ކުރާ އުސޫލުން އެ ކުންފުނިން ކަމަށް މުއިއްޒު ވިދާޅުވި އެވެ.
މީގެ އިތުރުން މުއިއްޒު ވިދާޅުވީ، ވެމްކޯގެ މުވައްޒިފުންގެ ގޮތުގައި މަގު ކުނިކަހާ އެއްވެސް މީހެއްގެ ވަޒީފާ މި ބަދަލާއެކު ގެއްލިއްޖެނަމަ ސިޓީ ކައުންސިލުން ކުރާ މަސައްކަތްތަކަށް އެ މުވައްޒިފަށް ފުރުސަތު ދޭނެކަމަށެވެ.
މާލެ އަދި ވިލިމާލެ ސާފުކުރުމުގެ މަސައްކަތަށް މިހާރު ވެމްކޯއާއި ހަވާލުކުރެވިފައިވީ ނަމަވެސް، ޕާކު ތަކާއި އާއްމު އެކި ތަންތަނުން ކުނި ނެގުމުގެ މަސައްކަތް މިހާރުވެސް ސިޓީ ކައުންސިލުން ކުރަމުންދެއެވެ. އޭގެ ސަބަބުން ސިޓީ ކައުންސިލްގެ އަތުން އިތުރު ޚަރަދެއް ދާއިރު، ވެމްކޯއާއި ހަވާލުކުރެވިފައިވާ އެ ޒިންމާ ރަނގަޅަށް އަދާކުރުމަށް ތަކުރާރުކޮށް އެދިފައިވާ ކަމަށާ، އެހެން ނަމަވެސް ހެޔޮ ބަދަލެއް އައިސްފައި ނުވާކަމަށް މުޢިއްޒު ވިދާޅުވިއެވެ.
ކުނި އުކާލުމުގެ މަސައްކަތުގައި ހަރަކާތްތެރިވާ މުވައްޒިފުންނަށް ވެމްްކޯއިން މިހާރު ވެސް އަހަރު 17.2 މިލިއަން ރުފިޔާ ހަރަދު ކުރާ ކަމަށާ ސިޓީ ކައުންސިލުން އެކަން ކުރާނަމަ 12 މިލިއަން ރުފިޔާއަށް ކުރެވޭނެ ކަމަށް ކައުންސިލުން މީގެ ކުރިން ވަނީ ބުނެފަ އެވެ.
Advertisement
This content is created and paid for by advertisers and does not involve Voice Journalists
