އިސްލާމް ދީނާއި ޤައުމުގެ މިނިވަންކަމާއި މެދު ވިސްނާ ޤައުމު ސަލާމަތްކުރަން ބޭނުންވާނަމަ 2023 ވަނަ އަހަރުގެ ރިޔާސީ އިންތިޚާބުގަ ރައީސް ޔާމީންއަށް ޤައުމު ހަވާލުކުރަންޖެހޭ ކަމަށް ޕީޕީއެމްގެ ނައިބު ރައީސް ޑރ. މުޙައްމަދު މުޢިއްޒު ވިދާޅުވެއްޖެއެވެ.

ޕީޕީއެމްގެ ޖަގަހަ ޖަލްސާގައި ވާހަކަފުޅު ދައްކަވަމުން ޑރ.މުޢިއްޒު ވަނީ ރައީސް ޔާމީންގެ ސަރުކާރާއި ރައީސް ސޯލިހުގެ ސަރުކާރުގެ ތަފާތުތައް ބަޔާންކޮށްދެއްވާފައެވެ.

މުޢިއްޒު ވިދާޅުވީ ދެސަރުކާރުގެ ތަރައްޤީގެ ތަފާތު ރައްޔިތުންނަށް މިހާރު އިޙުސާސު ކުރެވޭނެކަމަށެވެ.

އެހޮތުން، މުއިއްޒު ވިދާޅުވީ ރައީސް ޔާމީންގެ ވެރިކަމުގެ ދައުރަށް ހަތަރު އަހަރު ފުރި، 2017 ވަނަ އަހަރުގެ ޑިސެމްބަރު އައިއިރު ސިނަމާލެ ބްރިޖު ޕްރޮޖެކްޓުގެ 70 ޕަސެންޓު އޮތީ ނިމިފައި ކަމަށެވެ. ނަމަވެސް މި ސަރުކާރުން އަޅާ ތިލަމާލެ ބްރިޖުގެ އެއް ޕަސެންޓުވެސް އަދި ނުނިމޭ ކަމަށެވެ.

"އެހެންވީމަ މީ ރައީސް ޔާމީންގެ ތަރައްގީއަށް، އެ ލީޑަރޝިޕަށް މި ގައުމު މިހާރު ބޭނުންވެފައި އޮތް ވަރު ދޭހަކޮށްދޭ ހަމަ ކުޑަކުޑަ އެހެންނަމަވެސް މުހިންމު މިސާލެއް،" މުއިއްޒު ވިދާޅުވި އެވެ.

"މީ ދެވަނަ ފަހަރަށް ތަހަންމަލް ކުރެވޭނެ ފަދަ ވެރިކަމެއް ނޫން. ދީނާ ގައުމަށް ވިސްނާނަމަ، ގައުމު ސަލާމަތް ކުރަން ބޭނުންވާނަމަ އެބަޖެހޭ ރައީސް ޔާމީނަށް މިއަންނަ އަހަރު އިންތިހާބުގައި ގައުމު ހަވާލުކުރަން."

މިއާއިއެކު ޑރ. މުޢިއްޒު ވިދާޅުވީ މިވެރިކަމަކީ ދިވެހި ރައްޔިތުންނަށް ހެދުނު ގޯހެއް ކަމަށާއި، އޭގެ ސަބަބުން ފަސް އަހަރުގެ ތަރައްގީ ގެއްލިގެން ގޮސްފައިވާއިރު، މި ހެދުނު ގޯސް ކުރިއަށްއޮތްތަނުގައި ރަނގަޅު ކުރުމުގެ މަސައްކަތް ކުރެއްވުމަށް އިލްތިމާސް ކުރައްވާފައެވެ.