ތިމާގެ މުސްލިމް އަޚާ، ކާނެ ބޯނެ އެއްޗެއް ނެތިފައި، ނުވަތަ ލާނެ އާފޭރާމެއް ނެތިފައި، ނުވަތަ ޙަޔާތުގެ މުހިއްމު ބޭނުމެއް ނުފުދިފައި ހުއްޓައި، އޭނާގެ ބޭނުން ފުއްދައިދީފިނަމަ، ޤިޔާމަތްދުވަހު މާތްﷲ ތިމާގެ ބޭނުންތައް ފުއްދަވައި ދެއްވާނެ ކަމަށް މިއަދުގެ ޚުތުބާގައި ބުނެފިއެވެ.
"އިސްލާމްދީނަކީ އެކުވެރިކަމުގެ ދީން" މައުޟޫއަށް މިއަދު ގެނެސްދިން ޚުތުބާގައި ބުނީ، އަޅުގަނޑުމެން މުސްލިމުންނަކީ، އެއްބަނޑު އެއްބަފާ އުޚުއްވަތްތެރި ބަޔަކަށް ވީހިނދު، އެކަކު އަނެކަކަށް ދިމާވާ ކަންކަމުގައި އެހީތެރިވެ ހެއު ފޯރުވުމަކީ ވެސް އިސްލާމީ އުޚުއްވަތްތެރިކަމުގެ ވަރަށް މުހިއްމު ކަމެއް ކަމަށެވެ.
އެގޮތުން އެކަކުގެ ބޭނުންތައް ދަނެ، ތިމާގެ އަމިއްލަ ޙަޔާތް ބާއްޖަވެރިކުރަން އެދޭ ފަދައިން ތިބާގެ މުސްލިމް އަޚާގެ ޙަޔާތަށް އާރޯކަމާއި ބާއްޖަވެރިކަން ގެނައުމަށް މަސައްކަތްކުރަން ޖެހޭ ކަމަށްވެސް ޚުތުބާގައި ބުނެފައިވެއެވެ.
"ތިމާގެ މުސްލިމް އަޚާ، ކާނެ ބޯނެ އެއްޗެއް ނެތިފައި، ނުވަތަ ލާނެ އާފޭރާމެއް ނެތިފައި، ނުވަތަ ޙަޔާތުގެ މުހިއްމު ބޭނުމެއް ނުފުދިފައި ހުއްޓައި، އޭނާގެ ބޭނުން ފުއްދައިދީފިނަމަ، ޤިޔާމަތްދުވަހު މާތްﷲ ތިބާގެ ބޭނުންތައް ފުއްދަވައި ދެއްވާނެއެވެ." މިއަދުގެ ޚުތުބާގައި ބުނެފައިވެއެވެ.
މިއާއެކު ޚުތުބާގައި ބުނީ، ކޮންމެ އިންސާނަކީވެސް އެހެން މީހުންގެ އެހީތެރިކަމާއި އަޅައިލުން ބޭނުންވާނެ މީހެއް ކަމަށެވެ. ވުމާއެކު، މުޞީބާތާއި ތަކުލީފުގެ ވަގުތުގައި، އެހެން މީހުންގެ ހިތާމަތަކުގައި ބައިވެރިވާންޖެހެއެވެ. އެފަދަ ވަގުތުތަކުގައި އެ މީހުންނަށް އެހީތެރިވެ، އަޅާލުމަކީ އަޅުގަނޑުމެންގެ މައްޗަށް ވާޖިބު ކަމެއް ކަމަށާ، އެއީ އީމާންކަން ފުރިހަމަވުމުގެ ރަމްޒެއްގެ އިތުރުން މުއުމިނުންގެ ސިފައެއް ކަމަށްވެސް ޚުތުބާގައި ބުނެފައިވެއެވެ.
Advertisement
This content is created and paid for by advertisers and does not involve Voice Journalists
