ޑިޖިޓަލް ކޮންޓެންޓް ހަދާ ފަރާތްތަކަށް "ނަސޭހަތް" ޖަމިއްޔާއިން ވަރަށް ޚާއްސަ ހަދިޔާއެއް ފޯރުކޮށްދީފިއެވެ.

ދީނީ އެކިއެކި ވީޑިއޯ ތަކާއި އެނޫންވެސް ވީޑިއޯ ތައްޔާރުކުރާ ފަރާތްތަކަށް، މިއުޒިކް ފްރީ ބެކްގްރައުންޑް އަޑުތަކެއް ފޯރުކޮށްދިނުމުގެ މަގުސަދުގައި ނަސޭހަތް ޖަމިއްޔާއިން މިވަނީ ހައިކޮލިޓީ، ބެކްގްރައުންޑް ސައުންޑް ތަކެއް ނެރެފައެވެ. "ފްރީ އިސްލާމިކް ބެކްގްރައުންޑް ސައުންޑް 2022" ގެ ނަމުގައި ނަސޭހަތުން މިއަދު ނެރުނު މި ޕެކުގައި ޖުމުލަ 39 ސައުންޑް ޓްރެކް ހިމެނެއެވެ. އަދި މިހުރިހާ ސައުންޑް ޓްރެކް އެއްވެސް ހިލޭ ޑައުންލޯޑު ކޮށްގެން ބޭނުން ކުރުމުގެ ފުރުސަތު ރާއްޖެއާއި ބޭރު ގައުމުގެވެސް އެންމެހާ ފަރާތްތަކަށް ހުޅުވާލެވިފައިވާ ކަމަށް އެ ޖަމިއްޔާ އިން ބުނެއެވެ.

މީގެ އިތުރުން ނަސޭހަތުން ބުނީ، މިވަގުތަށް 39 ސައުންޑް ޓްރެކްސް ނެރެފައި ވީނަމަވެސް އުއްމީދަކީ ކުރިއަށް އޮތް ތަނުގައި އިތުރު ޓްރެކްސް ނެރެ، ޖުމުލަ 100 ބެކްގްރައުންޑް ތައްޔާރުކުރުން ކަމަށެވެ. 

ނަސޭހަތް ޖަމިއްޔާއިން އުފައްދާފައިވާ މި މިއުޒިކް ފްރީ ސައުންޑް ޓެރެކް ތަށް ތައްޔާރުކުރުމަށް ވަރަށް ގިނަ ފަރާތްތަކުން މާލީ ގޮތުންނާއި އެނޫންވެސް ގޮތް ގޮތުން އެހީވެފައިވާ ކަން ފާހަގަކޮށް، އެޖަމިއްޔާއިން ވަނީ އެ ހުރިހާ ފަރާތްތަކަށް ވަރަށް ބޮޑަށް ޝުކުރު އަދާކޮށްފައެވެ.

މި ޕްރޮޖެކްޓް ގެ އިތުރުން ވެސް ނަސޭހަތް ޖަމިއްޔާއިން މިނޫންވެސް އެތައް ޕްރޮޖެކްޓެއް މިހާރުވެސް އަންނަނީ ހިންގަމުންނެވެ. އެގޮތުން، "އާބާރް އެމްވީ" އާއި ގުޅިގެން ފެނަށް ބޭނުންޖެހިފައިވާ މުސްލިމު އާއިލާ އަކަށް ފެންވަޅެއް ހަދިޔާ ކުރުމުގެ ފުރުސަތު އާއްމުންނަށް ވަނީ ހުޅުވާލާފައެވެ.

މި ޕްރޮޖެކްޓް ގެ ދަށުން، އިންޑިއާ އަދި ނޭޕާލްގައި -/5000 ރުފިޔާއަށް ފެންވަޅެއް ބިނާ ކުރެވޭ އިރު، ބަންގްލަދޭޝްގައި -/6500 ރުފިޔާއަށް އަދި ރޮހިންޖާ ރެފިއުޖީ ކޭމްޕެއްގައި -/7500 އަށް ފެންވަޅު ބިނާކުރެވޭނެއެވެ. ނަސޭހަތް ޖަމިއްޔާއާއި ގުޅިގެން އެ ތަންތަނުގައި ފެންވަޅު ބިނާ ކުރަން ބޭނުންވާ ފަރާތްތަކުން ނަސޭހަތުގެ ފޭސްބުކް ޕޭޖަށް މެސެޖު ކުރުމުން ނުވަތަ 7478882 ގުޅާލުމުން އެކަމާއި ގުޅޭ އިތުރު މައުލޫމާތު ލިބިގެންދާނެކަމަށްވެސް އެ ޖަމިއްޔާ އިން ބުނެއެވެ.

ފެންވަޅު ޕްރޮޖެކްޓާއި އެކު، ރަށްރަށުގައި ދީނީ ހޭލުންތެރިކަން އިތުރުކުރުމަށް، އާއްމު ތަންތަނުގައި ހަރުކުރާ ކެންވަސް ހެދުމުގެ މަސައްކަތް ވެސް އެ ޖަމިއްޔާ އިން އަންނަނީ ކުރަމުންނެވެ. މިފަދަ އެތައް ޚިދުމަތް ތަކެއް ދީނީ ރޮގުން ކުރަމުންދާއިރު، މި ޕްރޮޖެކްޓް ތަކާއި އެ ނޫންވެސް ކުރިއަށް ހުރި ޕްރޮޖެކްޓް ތަކަށް މާލީގޮތުން އެހީ ފޯރުކޮށްދިނުމަށް އަންނަނިވި އެކައުންޓަށް ފައިސާ ޖަމާކުރުމަށް އެ ޖަމިއްޔާ އިން އެދެއެވެ. މި ގޮތުން އެ ޖަމިއްޔާއަށް ލިބޭ އެންމެހައި ފައިސާވެސް ހޭދަކުރަމުންދާނީ ދީނީ ހޭލުންތެރިކަން އިތުރުކުރުމަށް ކުރަމުންގެންދާ މަސައްކަތްތަކަށް ކަމަށްވެސް ނަސޭހަތުން ބުނެއެވެ.

ބީ.އެމް.އެލް އިސްލާމިކް އެކައުންޓު: 7770000085163

އެކައުންޓް ނަން: NASEYHAI

ނަސޭހަތަކީ އާއްމުންގެ މެދުގައި ދީނީ ހޭލުންތެރިކަން އިތުރުކުރުމުގެ ގޮތުން 2013 ވަނަ އަހަރުން ފެށިގެން ހަރަކާތްތެރިވަމުން އަންނަ ޖަމިއްޔާއެކެވެ. އެގޮތުން އެ ޖަމިއްޔާގެ އިންސްޓަގްރާމް ޕޭޖާއި، ފޭސްބުކް، ޓުވީޓާ, ވައިބާ, ޓެލެގްރާމް އަދި ޔޫޓިއުބް ޗެނަލް މެދުކޮށްވެސް ދީނީ އެކި ޕޯސްތަކާއި ވީޑިއޯ ކްލިޕް ތައް އަންނަނީ އާއްމުންނަށް ފޯރުކޮށްދެމުންނެވެ.