މި ސަރުކާރަކީ ކޮރަޕްޓު ސަރުކާރެއް ކަމަށް ރައްޔިތުންގެ ގިނަ ބަޔަކު ގަބޫލުކުރާކަމަށް ރައްޔިތުންގެ މަޖިލީހުގެ ވިލިމާލޭ ދާއިރާގެ މެމްބަރު އަހުމަދު އުޝާމު ވިދާޅުވެއްޖެއެވެ.
އުޝާމު މިފަދައިން ވިދާޅުވެފައިވަނީ، ކޮރަޕްޝަންގެ ކިތަންމެ ކުޑަ އަމަލެއް ހިންގަންވެސް ރުހިވަޑައި ނުގަންނަވާކަމަށް ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު ވިދާޅުވި ވިދާޅުމަށް ރައްދުދެއްވާ ކުރެއްވި ޓްވީޓެއްގައެވެ.
ރައީސް ސޯލިހަށް ރައްދުދެއްވާ އުޝާމު ކުރެއްވި ޓްވީޓުގައި ވަނީ އެމަނިކުފާނަށް ގިނަ ސުވާލުތަކެއްވެސް އަމާޒު ކުރައްވާފައެވެ.
ކޮރަޕްޝަންގެ އަމަލުތަކަށް ރުހިވަޑައި ނުގަންނަވާއިރު، ދައުވާލިބޭ ފަރާތްތަކާ، ކޮރަޕްޓަންގެ ބޮޑެތި ތުހުމަތުތަކުގައި ތަހުގީގު ކުރެވޭ ފަރާތްތައް މި ސަރުކާރުގެ ކެބިނެޓާއި ކުންފުނިތަކުގެ އެންމެ އިސް މަގާމުތަކުގައި ގިނަ އަދަދަކަށް ތިބެނީ ކީއްވެތޯ އުސާމު އެއްސެވިއެވެ.
އެއާއެކު އޭނާ ވިދާޅުވީ މި ސަރުކާރަކީ މިހާތަނަށް އުފެދުުނު އެންމެ ކޮރަޕްޓު ސަރުކާރުކަމަށް ރައްޔިތުންގެ ގިނަ ބަޔަކު ގަބޫލުކުރާ ކަމަށެވެ.
މި ސަރުކާރުގެ ތެރެއިން ފެންމަތިވި އެންމެ ބޮޑު ކޮރަޕްޝަންގެ މައްސަލައަކީ ކޯވިޑްގެ އެންމެ ނުރައްކާތެރި ހާލަތުގައި ފަރުވާދިނުމަށް ކަމަށް ބުނެ ވެންޓިލޭޓަރުތަކެއް ގަތުމުގެ ނަމުގައި ހިންގި ކޮރަޕްޝަނެވެ.
މިހާތަނަށް އެ މައްސަލައާއި ގުޅިގެން އެއްވެސް މިހަކާއި މެދު ފިޔަވަޅު އަޅާފައި ނުވާއިރު، އެ ޚިޔާނާތުގެ ތެރެއިން ދައުލަތަށް ގެއްލުނު އެންމެ ރުފިޔާއެއްވެސް ހޯދިފައެއް ނުވެއެވެ. އަދި ގެންނަން ބުނި ވެންޓިލޭޓަރުތައްވެސް ގެނެވިފައެއް ނުވެއެވެ.
Advertisement
This content is created and paid for by advertisers and does not involve Voice Journalists
