ފ ނިލަންދޫ އާސާރީ މިސްކިތުގަ ހުރި މަހާނަ ގާތަކަށް ގެއްލުން ދިން މައްސަލަ ބަލަން ފުލުހުންނަށް ހުށަހަޅައިފައިވާކަމަށް ނެޝަނަލް ސެންޓަރ ފޯރ ކަލްޗަރަލް ހެރިޓޭޖް އިން ބުނެފި އެވެ.
ނިލަންދޫ އާސާރީ މިސްކިތުގެ ގޯތިތެރޭގައި ހުރި ޒަމާންވީ މަހާނަ ގާާތަށް ހަލާކުކޮށް ބޮޑެތި ގެއްލުން ތަކެއް ދިން މައްސަލަ އެއް އިއްޔެ ވަނީ ފެންމަތިވެފައެވެ.
އެކަމާއި ގުޅިގެން ނެޝަނަލް ސެންޓަރ ފޯރ ކަލްޗަރަލް ހެރިޓޭޖް އިން މިއަދު ކުރި ޓުވީޓެއްގައި ބުނީ، އެ މައްސަލަ ތަހުޤީޤުކޮށްދެއްވުމަށް އެދި އެ މަރުކަޒުން ފުލުހުންނަށް މިހާރު ހުށަހަޅާފައިވާ ކަމަށެވެ.
އަދި އެކަމާއި ގުޅޭ އިތުރު މަޢުލޫމާތު ހިއްސާކޮށްދެއްވުމަށް ކައުންސިލުގައި އެދިފައިވާ ކަމަށްވެސް އެ އެ ސެންޓަރުން ބުނެއެވެ.
މީގެ އިތުރުން ނިލަންދޫ ކައުންސިލުގެ ފަރާތުންވެސް އެ މައްސަލަ ފުލުހަށް ހުށަހަޅުއްވާފައިވާ ކަމަށް އެ ސެންޓަރަށް މައުލޫމާތު ލިބިފައިވާ ކަމަށް ބުނެފައިވެއެވެ.
ނިލަންދޫގެ އާސާރީ މިސްކިތުގެ ގޯތިތެރޭގައި، ގިނަ އަދަދެއްގެ މީހުން ވަޅުލާފައިވެ އެވެ. ބައެއް ލިޔުންތަކުން އެނގޭ ގޮތުގައި، އެ ތަނުގައި ބައެއް ހާފިޒުންގެ މަހާނަ އާއި އެ ދުވަސްވަރު ފާހަގަކޮށްލެވޭ އިތުރު މީހުންގެ މަހާނަތައް ވެސް ހުރެ އެވެ.
ސަގާފީ ތަރިކައަށް ގެއްލުންދިނުމާއި އިހުމާލުވުމަކީ މިހާރު ޖިނާއީ ކުށެކެވެ. އެކަމުގެ އަދަބެއްގެ ގޮތުން 10،000ރ. އާއި އެއް މިލިއަން ރުފިޔާއާ ދެމެދުގެ އަދަދަކުން ޖޫރިމަނާކުރުމުގެ އިތުރުން އެ ކުށަކަށް ގާނޫނުލްއުގޫބާތުގެ ދަށުން އަދަބެއް ކަނޑައަޅާ ނަމަ، އެ މީހެއްގެ މައްޗަށް ޖިނާއީ ދައުވާ ކުރެވޭނެ އެވެ.
Advertisement
This content is created and paid for by advertisers and does not involve Voice Journalists
