ޓެރަރިޒަމުގެ ނުރައްކާތެރި ހަމަލާއެއް ދިނުމަށް ރޭވިކަމުގެ ތުހުމަތުގައި ފުލުހުން އައްޑޫ ސިޓީން ހައްޔަރުކުރި އެކަކު ބަންދުގައި ބަހައްޓަން އެކަށީގެންވާ މިންވަރަށް ހެކި ނެތުމުން ހައިކޯޓުން އޭނާ މިނިވަންކޮށްފިއެވެ.

އައްޑޫ ސިޓީގައި ހަރުކަށި ފިކުރު ގަބޫލުކުރާ ފަރާތްތަކުން ޓެރަރިސްޓް ޖަމާއަތެއްކަމަށްވާ އިސްލާމިކް ސްޓޭޓްއަށް ތާއީދުކޮށް، ގޮވާތަކެތި ބޭނުންކޮށްގެން ދިވެހިރާއްޖޭގައި ޓެރަރިޒަމްގެ ހަމަލާއެއްދީ، ގައުމީ ސަލާމަތަށް ނުރައްކާކުރުމަށް ރާވަމުންދިޔަކަމުގެ ތުހުމަތުގައި 2022 ނޮވެމްބަރ 11 ވަނަ ދުވަހުން ފެށިގެން އައްޑޫ ސިޓީއާއި، މާލެއާއި، ކ.ގުރައިދޫގައި ހާއްސަ އޮޕަރޭޝަނެއް ކުރިއަށް ގެންގޮސް 14 މީހަކު ވަނީ ހައްޔަރުކޮށްފަ އެވެ. 

މި މައްސަލާގައި ހައްޔަރުކުރި މީހުންގެ ތެރެއިން 6 މީހަކު ޝަރީޢަތްނ ނިމެންދެން ބަންދުކުރަން ދަށު ކޯޓުން އަމުރުކުރިއެެވެ.

Advertisement

އެ ނިންމުން އިސްތިއުނާފުކުރުމުން ޝަރީޢަތް ނިމެންދެން ބަންދުކޮށްފައި ތިބި މީހުންގެ ތެރެއިން ސ.މަރަދޫފޭދޫ، އާޒާ، މުޙައްމަދު ޤައިސް މިއަދު ހައިކޯޓުން މިނިވަންކޮށްފައިވެއެވެ.

ޤައިސްގެ ފަރާތުން ހައިކޯޓުގައި ބަންދު އަމުރު އިސްތިއުނާފުކުރީ އޭނާ ބަންދުގައި ބަހައްޓަން އަމުރުކުރީ އެއްވެސް ހެއްކެއް ޤަރީނާއެއް ހުށަނާޅާ ހަމައެކަނި ފުލުހުންގެ އިންޓެލިޖެންސް ރިޕޯޓެއްގައި ހުރި މައުލޫމާތަށް ބިނާކޮށްކަމަށްވާތީ އެއީ ޤާނޫނާ ޚިލާފު ނިންމުމެއްކަމަށް ބަޔާންކޮށެވެ.

އެ މައްސަލަ ހައިކޯޓުގައި ބެއްލެވި ފަނޑިޔާރުންގެ އިއްތިފާޤުން ނިންމަވާފައިވަނީ ހަމައެކަނި އިންޓެލިޖެންސް ރިޕޯޓަކަށް ބިނާކޮށް މީހަކު ބަންދުގައި ނުބެހެއްޓޭނެކަމަށެވެ. އަދި ޤައިސް ބަންދުގައި ބަހައްޓަން ނިންމާފައިވަނީ އިތުރު އެއްވެސް ހެއްކެއް ނެތި އިންޓެލިޖެންސް ރިޕޯޓަށް ބިނާކޮށް ކަމުގައިވާތީ އޭނާ ބަންދުކުރި އަމުރު ހައިކޯޓުން ބާތިލުކުރިއެވެ.