ހަތަރު ކުޑަކުދިން ހިމެނޭހެން ޗަޑް ގެ ސަހަރާއެއްގެ ތެރެއިން 27 މީހުންގެ ހަށިގަނޑު ފެނިފައިވާ ކަމަށް، އިންޓަނޭޝަނަލް އޯގަނައިޒޭޝަން އޮފް މައިގްރޭޝަން (އައިއޯއެމް) އިން ބުނެފިއެވެ.
އައިއޯއެމް އިން މައުލޫމާތު ދީފައިވާ ގޮތުގައި، ސަހަރާގައި މަރުވެފައި އޮއްވާ ފެނުނު އެމީހުންނަކީ، ޗަޑްގެ ދެކުނުގެ އަވަށަކުން، ޕިކްއަޕް ޓްރަކެއްގައި މެޑިޓަރޭނިއަން ސަރަހައްދުގެ ގައުމަކަށް ހިޖުރަކުރުމަށް އެއް އަހަރާއި ބައިގެ ކުރިން ދަތުރުފެށި ބައެކެވެ. އަދި އެމީހުން މަރުވެފައިވަނީ، އެމީހުން ދަތުރު ކުރަމުން އައި ޓްރަކު ހަލާކުވެ، ހިނގާފައި އުޅެން ޖެހުމުގެ ސަބަބުން، އެ ބޮޑު ސަހަރާތެރެއަށް ގެއްލި، ބޯނެ ފެންފޮދެއް ނެތި, ކަރުހިއްކުމުގެ ސަބަބުން ކަމަށްވެސް އައިއޯއެމް އިން ލަފާކޮށްފައިވެއެވެ.
ޗަޑް ގައި ހުންނަ ބޮޑު ސަހަރާ އަކީ މެޑިޓަރޭނިއަން ސަރަހައްދުގައި ހުންނަ ގައުމުތަކަށް ހިޖުރަ ކުރާ ގިނަ ބަޔަކު ހުރަސްކުރާ ސަހަރާއެކެވެ.
ފާއިތުވި އަށް އަހަރުތެރޭގައި، ހިޖުރަ ކުރާ މީހުންގެ ތެރެއިން 5,600 އަށްވުރެ ގިނަ މީހުން ސަހަރާތަކުގެ ތެރެއަށް ގެއްލިފައި ނުތަ މަރުވެފައިވާ ކަމަށް އައިއޯއެމްގެ ރިޕޯޓް ތައް ބުނެއެވެ. އޭގެ ތެރެއިންވެސް 110 މީހުން މަރުވެފައި ވަނީ ޗަޑްގެ އެ ސަހަރާތެރޭގައި ކަަމަށް އެ އޯގަނައިޒޭޝަނުން ބުނެފައިވެއެވެ.
"ހަމައެކަނި މި އަހަރުވެސް 150 އަށްވުރެ ގިނަ މީހުން ހިޖުރަ ކުރުމުގެ ތެރެއިން ސަހަރާ ތަކަށް ގެއްލިގެން މަރުވެފައިވޭ. މިފަހުން ހިނގި މި ހިތާމަވެރި ހާދިސާއާއި ގުޅިގެން، މަރުވެފައިވާ ފަރާތްތަކުގެ އާއިލާތަކަށް ތައުޒިޔާ ކިޔަން" އައިއޯއެމް އިން ބުނެފައިވެއެވެ.
Advertisement
This content is created and paid for by advertisers and does not involve Voice Journalists
