ޣާޒީ ސުކޫލުގައި ކޮރަޕްޝަނުގެ މައްސަލަތަކާއި މުވައްޒަފުންނަށް ބިރު ދެއްކުމުގެ މައްސަލަ ތައް އިންތިހާއަށް ގިނަވެފައިވާ ކަމަށް ބުނެ އިހްތިޖާޖު ކުރި އެ ސުކޫލުގެ މުވައްޒަފުންގެ މައްސަލަ ބަލަން ފަށާފައިވާ ކަމަށް އެޑިޔުކޭޝަން މިނިސްޓްރީން ބުނެފިއެވެ.  

ޣާޒީ ސްކޫލުގެ ޑެޕިއުޓީ ޕްރިންސިޕަލް އައިމިނަތު ރިޔާޒާ އާއި އެ ސްކޫލުގައި ކުރިން މަސައްކަތް ކުރި އެހެން ދެ މުވައްޒަފެއްގެ ކޮރަޕްޝަންގެ މައްސަލަތަކަކާއި، އަދި ސުކޫލު މުވައްޒަފުންނަށް ބިރު ދައްކާ މައްސަލަތަކަކާއި ގުޅިގެން މިއަދު އެ ސުކޫލުގެ ބައެއް ޓީޗަރުން ވަނީ އިހްތިޖާޖު ކޮށްފައެވެ. 

އެގޮތުން، ބެލެނިވެރިން އެ ސްކޫލަށް ހަދިޔާކުރި ޓީވީތަކުގެ ތެރެއިން ބައެއް ޓީވީތައް ވީނުވީއެއް ނޭނގި ގެއްލިފައިވާ ކަމާއި، ކިޔަވައިދެމުން ދިޔަ ވަގުތު ކްލާސްރޫމްގެ ތެރެއަށް ފަންކާ ވެއްޓި އެކަމުގެ ސަބަބުން ދަރިވަރުން ބިރުވެރިކަމެއްގެ ތެރޭގައި އުޅެން ޖެހުން ފަދަ ޝުއޫރުތައް ޓީޗަރުން ފާޅުކޮށްފައިވެއެވެ.

އަދި އެ ސްކޫލުގެ އެޑްމިނިސްޓްރޭޓަރަކަަށް ހުރި ޝިޔާޒާ ކޮރަޕްޝަންގެ އަމަލުތައް ހިންގިއިރު، އެޑިއުކޭޝަން މިނިސްޓްރީން އެކަމާ މެދު ފިޔަވަޅު ނާޅާ ކަމަށާއި، އޭގެ ބަދަލުގައި އޭނާ އަށް މިނިސްޓްރީގެ ބޮޑު ވަޒީފާއެއް ދިން ކަމަށް ވެސް ބައެއް ޓީޗަރުން ބުނެފައިވެއެވެ.

މިކަމާއި ގުޅިގެން މިނިސްޓްރީން މިއަދު ނެރުނު ބަޔާނުގައި ބުނީ، ގާޒީ ސްކޫލުގެ އެކި ކަންކަމާއި ގުޅިގެން ހުށަހެޅުނު ޝަކުވާތައް މިނިސްޓްރީން ބެލިއިރު ފައިސާ ބެލެހެއްޓުމާއި ގުޅުންހުރި މައްސަލަތަކެއް ފާހަގަކުރެވިފައިވާ ކަމަށެވެ. އަދި އެކަމާއި ގުޅިގެން ހެދި އޮޑިޓުން ވެސް މާލިއްޔަތު ގަވާއިދާއި ހިލާފަށް ކަންކަން ހިނގާފައިވާކަން ފާހަގަކުރެވުނު ކަން މިނިސްޓްރީން ފާހަގަކޮށްފައިވެއެވެ.

އަދި އެމައްސަލާގެ ރިޕޯޓު ނިމިފައިވަނިކޮށް، ސްކޫލުގެ ދެ މުވައްޒަފަކާއި ގުޅޭ ފޯޖުކުރުމުގެ މައްސަލައަކާއި، ސްކޫލަށް ލިބުނު ޓީވީއެއް މުވައްޒަފަކު ގެއަށް ގެންދިޔަ މައްސަލައެއް ވެސް ފެންމަތިވެފައިވާ ކަމަށާ، އެއީ ޖިނާއީ ކުށެއް ހިމެނޭ މައްސަލައަކަށްވުމުން އެ ދެ މައްސަލަވެސް ބަލަމުންދަނީ ފުލުހުންނަށް ހުށަހަޅައިގެން ކަމަށް މިނިސްޓްރީން ބުންޏެވެ.

މިމައްސަލަތައް ފެންމަތިވެފައިވަނިކޮށް އެމައްސަލަތަކާއި ގުޅިގެން ތުހުމަތުކުރެވޭ އެޑްމިނިސްޓްރޭޓަރު މިނިސްޓްރީގެ ޑިޕާޓުމެންޓަށް ބަދަލުކޮށްފައިވަނީ، ސިވިލް ސާވިސްގެ ގަވާއިދާއި އެއްގޮތަށް ކަމަށް މިނިސްޓްރީން ބުންޏެވެ.

މިނިސްޓްރީން އެބަދަލު ގެނެސްފައިވަނީ، ސިވިލް ސާވިސް ގަވާއިދުގައި ބުނާ، ”އިދާރީގޮތުން ގެނެވޭ ބަދަލެއްގެ ސަބަބުން ސަރުކާރު އޮފީހެއްގެ ހިންގުމަށް އެދެވޭ ބަދަލެއް ގެނެވިދާނެ ކަމަށް މިނިސްޓަރަށް އިސްވެރިއަކަށް ގަބޫލުކުރެވުން “ މި މާއްދާއަށް ރިއާޔަތް ކޮށް ކަމަށްވެސް މިނިސްޓްރީގެ ބަޔާނުގައި ވެއެވެ. 

މިނިސްޓްރީން ބުނީ، އެމައްސަލާގައި ކުރިއަށްދަނީ މުވައްޒަފު ޖަވާބުދާރީ ކުރެވުމުގެ މަރުހަލާ ކަމުން، ސްކޫލުގެ އެޑްމިނިސްޓްރޭޓިވްގެ މަގާމުގައި އެފަރާތް ހުރުމަކީ އެކަމުން ސްކޫލަށް އިތުރު މައްސަލަތައް ކުރިމަތިވެދާނެ ކަމެއް ކަމަށް ފާހަގަކުރެވިގެން އެ ބަދަލު ގެނައީ ސްކޫލުގެ ޕްރިންސިޕަލަށް ފޯނުން ގުޅައި މަޝްވަރާ ކުރުމަށް ފަހު ކަމަށެވެ.

”އެޑްމިނިސްޓްރޭޓަރު މިނިސްޓްރީގެ ޑިޕާޓުމެންޓަކަށް ވަގުތީގޮތުން ބަދަލުކުރެވުނީ ދެވުނު ޕްރޮމޯޝަނެއްގެ ގޮތުގައެއް ނޫނެވެ. އަދި އެފަރާތުގެ ވަޒީފާ މިނިސްޓްރީއަށް ބަދަލު ކުރުމުގެ ގޮތުގައެއް ނޫނެވެ. “މިނިސްޓްރީގެ ބަޔާނުގައި ބުނެފައި ވެެއެވެ.

މިނިސްޓްރީގެ ބަޔާނުގައި އެހެން ބުނެފައިވީނަމަވެސް އޭނާ ހުރީ މިނިސްޓްރީގެ ކޮން މަގާމެއްގައި ކަމެއް މިނިސްޓްރީން ސާފުކޮށެއް ނުދެ އެވެ. 

މިއާއެކު މިނިސްޓްރީގެ ބަޔާނުގައި ބުނީ، އެ އެޑްމިނިސްޓްރޭޓިވް އޮފިސަރުގެ މައްސަލަ ބަލަމުންދާކަން ސްކޫލަށް އަންގާފައިވަނިކޮށް، މިއަދު އިހުތިޖާޖު ކުރި ޓީޗަރުންގެ މައްސަލަ ބަލަން ފަށާފައިވާ ކަމަށެވެ. 

”މިގޮތަށް އަޅުގަނޑުމެން އަމަލުކުރަމުން ދަނިކޮށް އަދި މިނިސްޓްރީން އަޅަމުންދާ ފިޔަވަޅުތައް ސްކޫލު ހިންގެވުމާއި ހަވާލުވެ ހުންނެވި ފަރާތާއި ހިއްސާކުރަމުން ގެންދަނިކޮށް، އެޑްމިނިސްޓްރޭޓަރަށް ޕްރޮމޯޝަނެއް ދީފައިވާ ކަމަށް ބުނެ ސްކޫލުގެ މުވައްޒަފުންތަކެއް އިހުތިޖާޖުކުރި މައްސަލަ މިހާރު އަޅުގަނޑުމެން ބަލަން ފަށާފައިވާ ވާހަކަވެސް ދެންނެވީމެވެ، “ މިނިސްޓްރީގެ ބަޔާނުގައި ވެެއެވެ.

އަދި އެފަދަ ވާހަކަތައް ފެތުރުމާއި ގުޅިގެން ހިތާމަ ކުރާ ކަމަށްވެސް މިނިސްޓްރީގެ ބަޔާނުގައި ބުނެފައިވެއެވެ.