ހުޅުމާލޭގައި ހުންނަ ގާޒީ ސްކޫލްގައި ކޮރަޕްޝަނާއި ފުރައްސާރައިގެ މައްސަލަތައް އޮތް ކަމަށް ބުނެ، އެ ސްކޫލްގެ މުވައްޒަފުންތަކެއް މިއަދު ސްކޫލްގައި އިހްތިޖާޖުކޮށްފިއެވެ.
ހެނދުނު ދަންފަޅީގެ ކިޔެވުން ނިމުނު ވަގުތު ކުރިއަށް ދިޔަ އިހްތިޖާޖުގައި ޓީޗަރުން ބައިވެރިވީ އެކި ޝުއޫރުތައް ލިޔެފައިވާ ބޯޑުތައް ހިފައިގެންނެވެ.
މުޒާހަރާގެ ބައިވެރިން ވަނީ އެ ސްކޫލުގެ ޑެޕިއުޓީ ޕްރިންސިޕަލް އައިމިނަތު ރިޔާޒާ އާއި އެ ސްކޫލުގައި ކުރިން މަސައްކަތް ކުރި އެހެން ދެ މުވައްޒަފެއްގެ ކޮރަޕްޝަންގެ މައްސަލަތަކެއް ފާހަގަކޮށްފައެވެ.
އެގޮތުން، ބެލެނިވެރިން އެ ސްކޫލަށް ހަދިޔާކުރި ޓީވީތަކުގެ ތެރެއިން ބައެއް ޓީވީތައް ވީނުވީއެއް ނޭނގި ގެއްލިފައިވާ ކަމާއި، ކިޔަވައިދެމުން ދިޔަ ވަގުތު ކްލާސްރޫމްގެ ތެރެއަށް ފަންކާ ވެއްޓި އެކަމުގެ ސަބަބުން ދަރިވަރުން ބިރުވެރިކަމެއްގެ ތެރޭގައި އުޅެން ޖެހުން ފަދަ ޝުއޫރުތައް ޓީޗަރުން ފާޅުކޮށްފައިވެއެވެ.
މީގެ އިތުރުން، ޣާޒީ ސްކޫލުގައި ކުރިން މަސައްކަތް ކުރި އެޑްމިނިސްޓްޜޭޓަރު ޝިޔާޒާގެ މައްޗަށް ގިނަ ގިނަ ކޮރަޕްޝަންގެ ތުހުމަތުތަކެއް އެ ސުކޫލުގެ މުވައްޒަފުން ކުރާއިރު، އޭގެ ތެރޭގައި، ސްކޫލުގެ ސެކިއުރިޓީ ނުހައްގުން ގަވައިދާ ހިލާފަށް ބަޔަކާއި ހަވާލުކުރުމާއި ސްކޫލުގެ ޕީޓީއޭއިން ހިންގާފައިވާ ހަރަކާތްތަކުން ލިބުނު ފައިސާ ސްކޫލުގެ ބަޖެޓަށް ނުވަނުން ހިމެނެއެވެ.
އަދި ޝިޔާޒާ ކޮރަޕްޝަންގެ އަމަލުތައް ހިންގިއިރު، އެޑިއުކޭޝަން މިނިސްޓްރީން އެކަމާ މެދު ފިޔަވަޅު ނާޅާ ކަމަށާއި، އޭގެ ބަދަލުގައި އޭނާ އަށް މިނިސްޓްރީގެ ބޮޑު ވަޒީފާއެއް ދިން ކަމަށް ވެސް ބައެއް ޓީޗަރުން ބުނެފައިވެއެވެ. އަދި އޭގެ އިތުރުން، އެޑްމިނިސްޓްރޭޓިވް އޮފިސަރުގެ މަގާމުގައި އޭނާ ހުރި އިރު މެޑިކަލް ސެޓްފިކެޓުތައް ފޯޖުކޮށް، ސްކޫލްގެ ސާވާ ހެކުކޮށް ގިނަ ކަންކަން ހިންގާފައިވާ ކަމަށްވެސް ތުހުމަތު ކޮށްފައިވެއެވެ.
އޭގެ އިތުރުން ސްކޫލު މަރާމާތުކުރަން އަންނަ ފަރާތްތަކުން ސްކޫލުގެ މުވައްޒަފުންނަށް ޖެއްސުން ކުރުމާއި ސްކޫލުގެ ޑެޕިއުޓީ ޕްރިންސިޕަލް ރިޔާޒާ އަމިއްލައަށް ގަވައިދުތަކެއް ކަނޑައެޅުމާއި މަސައްކަތުގެ ބިރު ދައްކާފައިވާ ކަމަށާ، އަދި ސްކޫލުގައި މަސައްކަތް ކުރި ޑްރައިވަރަކު މުވައްޒަފުންގެ އަތުން ފައިސާ ނަގައި ފަހުން ނުދޭކަން ވެސް އިހްތިޖާޖުގެ ބައިވެރިން ވަނީ ފާހަގަކޮށްފައެވެ.
ޣާޒި ސުކޫލުގެ މި މައްސަލަ އާއި ގުޅިގެން އެޑިއުކޭޝަން މިނިސްޓްރީން ވަނީ، އެ ސުކޫލުގައި ކުރިއަށް ދިޔަ އިހްތިޖާޖު ގެ ބައިވެރިން ވާހަކަ ދައްކާފައިވަނީ ހަގީގަތާއި ޚިލާފަށް ކަމަށާ، އެހެން ކަމުން އެ މުވައްޒަފުން މުޒާހަރާ ކުރި މައްސަލަ ބަލަން ފަށާފައިވާ ކަމަށް ބުނެފައެވެ.
Advertisement
This content is created and paid for by advertisers and does not involve Voice Journalists
