ގުޅިފަޅުގައި ހުންނަ ވިލިމާލެ ބްރިޖް މަސައްކަތްކުރާ މީހުންގެ އެކެމަޑޭޝަން ބްލޮކުގައި އަލިފާނުގެ ހާދިސާއެއް ހިނގައިގެން އެމްއެންޑީއެފް ފަޔަރ އެންޑް ރެސްކިއު ސަރވިސްއިން ހަރަކާތްތެރިވާން ފަށައިފިއެވެ.

އެމްއެންޑީއެފުން ބުނީ، މި ހާދިސާގެ ރިޕޯޓް އެމްއެންޑީއެފް ފަޔަރ އެންޑް ރެސްކިޔު ސަރވިސްއަށް ލިބުނީ ދަންވަރު 00:31 ހާއިރުއެވެ. އަދި ހާދިސާގެ ރިޕޯޓް ލިބުމާއެކު އެފްއާރުއެސްގެ ފަޔަރމަނުން އެ ސަރަހައްދަށް ގޮސް އަލިފާން ނިއްވުމުގެ މަސައްކަތް ފަށާފައިވާ ކަމަށެވެ.

މިގޮތުން އެފްއާރުއެސްގެ ފަޔަރމަނުން ކުރި މަސައްކަތުން އެތަނުގައި ރޯވި އަލިފާން ނިއްވާލެވިފައި ވަނީ 01:52 ހާއިރު ކަމަށާ، އަލިފާނުގެ ޙާދިސާގައި އެކެމަޑޭޝަން ބްލޮކްވަނީ އެއްކޮށް އަނދާހުލިވެފައި ކަމަށްވެސް އެމްއެންޑީއެފުން ބުނެއެވެ.

Advertisement

މި އެކެމަޑޭޝަން ބްލޮގުގައި 465 މީހުން ދިރިއުޅޭކަމަށް އެމްއެންޑީއެފަށް މަޢުލޫމާތު ލިބިފައިވާކަމަށް ވެސް އެ އިދާރާއިން ބުނެއެވެ.

މި ޙާދިސާގައި އަނިޔާވި މީހުންގެ މައުލޫމާތު ހިއްސާކުރަމުން ދިވެހި ފުލުހުންގެ ޚިދުމަތުން ބުނީ، އަނިޔާވި މީހުންގެ ތެރެއިން 13 މީހަކު އައިޖީއެމްއެޗް ހޮސްޕިޓަލަށް އަދި 63 މީހުން ހުޅުމާލޭގައި ހުންނަ ޓްރީޓޮޕް ހޮސްޕިޓަލަށް ގެންދެވިފައިވާ ކަމަށެވެ. އަދި އެމީހުންގެ ތެރޭގައި ސީރިއަސް އަނިޔާވެފައިވާ 6 މީހަކު ހިމެނޭ ކަމަށްވެސް ފުލުހުން ބުނެފައިވެއެވެ.

މައުލޫމާތު ލިބޭގޮތުގައި އެމްޓީސީސީގެ މި އިމާރާތަކީ މިހާރު އެފްކޮންގ ބޭނުން ކުރަމުން އަންނަތަނެކެވެ.