ފަސް މިލިއަން ޑޮލަރު އިންވެސްޓުކޮއްގެން ގިރާވަރު ފަޅުގައި ރެޒިޑެންޝަލް ސިޓީއެއް ތަރައްގީ ކުރާނެ އިންވެސްޓަރުން ހޯދުމަށް އިކޮނޮމިކް މިނިސްޓްރީއިން އިއުލާނުކޮށްފި އެވެ.
ރައީސުލްޖުމުހޫރިއްޔާ އިބްރާހިމް މުހައްމަދު ސާލިހު ނެރުއްވާފައިވާ ގަރާރެއްގައި ބުނެފައިވާގޮތުން، އެ މަނިކުފާނު މި ފުރުސަތު ހުޅުވާލާފައިވަނީ ދައުލަތުގެ އާންމު މަންފާއައްޓަކައި ބޭނުންވާ އިގްތިސާދީ ސިޔާސަތުތަކެއް ހާސިލު ކުރެއްވުމުގެ މަގުސަދުގައެވެ.
އެހެންކަމުން މަޝްރޫޢުތައް ހަވާލު ކުރެވޭ ފަރާތްތަކުން އެންމެ މަދުވެގެން އިންވެސްޓު ކުރަންޖެހޭ އަދަދުތައް ވަނީ ކަނޑައަޅާފައެވެ. އެގޮތުން މި މަޝްރޫއުއަށް އިންވެސްޓް ކުރެވޭނެ އެންމެ ދަށް އަގަކީ ފަސް މިލިއަން ޑޮލަރު ނުވަތަ 77 މިލިއަން ރުފިޔާ ކަމަށް ކަނޑައަޅުއްވާފައި ވެއެވެ.
އެކަމާއި ގުޅޭގޮތުން އިކޮނޮމިކް މިނިސްޓްރީއިން ކުރި އިއުލާނުގައި ނުބެފައިވަނީ ކްރޮސް ސަބްސިޓީގެ އުސޫލުން އެތަން ރެސިޑެންޝަލް ސިޓީއަކަށް ތަރައްގީ ކުރަން ހުޅުވާލައިފައިވާ ކަމަށެވެ.
އިއުލާނުގައި ބުނެފައިވާ ގޮތުގައި އެންމެ މަދުވެގެން އިންވެސްޓު ކުރެވޭނީ 5 މިލިއަން ޑޮލަރެވެ. އަދި ހުށައަޅާ އަދަދުން ބިމު ކުލި ކަނޑާނެކަމަށް ބުނެފައިވެއެވެ.
މި އަހަރުގެ ރިޔާސީ ބަޔާނުގައި މާލެ ރައްޔިތުންނަށް ގޯތި ދިމުނަށް ހުޅުމާލެއިން މަދުވެގެން 1000 ގޯއްޗާއި ގުޅީފަޅުން މަދުވެގެން 2000 ގޯތި އަދި ގިރާވަރު ފަޅު ހިއްކައިގެން އެ ބިމުންވެސް ގޯތި ދިނުމަށް ނިންމާފައިވާކަމަށް ރައީސް ސާލިޙް ވަނީ އިއުލާނުކުރައްވާފަ އެވެ.
Advertisement
This content is created and paid for by advertisers and does not involve Voice Journalists
