މިދިޔަ ބުރާސްފަތި ދުވަހު ގުޅިފަޅުގައި ހުންނަ ތިލަމާލެ ބްރިޖުގެ މަސައްކަތްކުރާ އެފްކޮންސް ކުންފުނީގެ މުވައްޒަފުންގެ އެކޮމޮޑޭޝަން ބްލޮކެއްގައި ހިނގި އަލިފާނުގެ ހާދިސާއަށްފަހު ނުފެންނަކަމަށް ރިޕޯޓުކުރި އެފްކޯންސް އިންފްރާސްޓްރަކްޗާގެ މުވައްޒަފު ހޯދުމުގެ މަސައްކަތް މިހާރު ފަށާފައިވާކަމަށް ފުލުހުން ބުނެފިއެވެ. 

ބުރާސްފަތި ދުވަހު ހިނގި އެ ހާދިސާއަށްފަހު އެފްކޯންސް ކުންފުނީގެ މުވައްޒަފެއް މަދުކަމަށް މެނޭޖުމަންޓާއި މައުލޫމާތު ހިއްސާ ކުރި ނަމަވެސް، މިއަދާއި ހަމަޔަށް އެކަމާއި ގުޅިގެން އެއްވެސް ފިޔަވަޅެއް އަޅާފައި ނުވާކަން ފާހަގަކޮށް އެ ކުންފުނީގެ މުވައްޒަފުން ވަނީ ގުޅިފަޅުގައި އިހުތިޖާޖުކޮށްފަ އެވެ. 

އަދި ގެއްލުނު މީހާ ހޯދާދީ، މުވައްޒަފުންގެ ރައްކާތެރިކަން ކަށަވަރުކޮށްދިނުމަށްވެސް މުޒާހަރާގެ ބައިވެރިން ވަނީ އަޑުއުފުލާފައެވެ. 

އެކަމާއި ގުޅިގެން ފުލުހުން ބުނީ ގުޅިފަޅުގައި ހިނގި އަލިފާނުގެ ހާދިސާއަށްފަހު މީހަކު ގެއްލިފައިވާކަމަށް ރިޕޯޓުކޮށްފައިވާކަމަށާއި، އެމީހާ ހޯދުމުގެ މަސައްކަތް މިހާރު ކުރަމުންދާކަމަށެވެ. 

އެގޮތުން އެ ހާދިސާ ހިނގި އިމާރާތުގެ ވަށައިގެންވާ ސަރަހައްދު އިތުރަށް ބަލަމުންދާކަން ފުލުހުން ވަނީ ހާމަކޮށްފައެވެ. 

ބުރާސްފަތި ދުވަހުގެ ރޭ ގުޅިފަޅުގައި ހިނގި އަލިފާނުގެ ހާދިސާގެ އަނިޔާވި 76 މީހުންނަށް ޓްރީޓޮޕް ހިސްޕިޓަލާއި އައިޖީއެމް ހޮސްޕިޓަުން ވަނީ ފަރުވާދީފައެވެ. ފަރުވާ ދިން މީހުންގެ ތެރެއިން 6 މީހުންގެ ހާލު ސީރިއެސްކަމަށް ފުލުހުން ވަނީ ބުނެފައެވެ. 

އެ ހާދިސާއަށްފަހު އެތަނުގައި ދިރިއުޅޭ ފަރާތްތައް ވަގުތީ ހިޔާއަށް ބަދަލުކޮށްފައިވާއިރު، އެކު ޖުމްލަ 465 މީހުން އެތަނުގައި ދިރިއުޅެމުންދާކަމަށް މައުލޫމާތު ލިބެއެވެ.