އެމްޑީޕީގެ ރައީސް އަދި ރައްޔިތުންގެ މަޖިލީހުގެ ރައީސް، މުހައްމަދު ނަޝީދު، ރަށުގައި ނެތިސް، ޕްރައިމަރީ އަށް އިއުލާން ކުރުމާއި ގުޅިގެން ރައްޔިތުންގެ މަޖިލީހުގެ މެދުހެންވޭރު ދާއިރާގެ މެންބަރު ޢަލީ އާޒިމް ނުރުހުން ފާޅުކުރައްވައިފިއެވެ. 

އަންނަ ޖަނަވަރީ މަހުގެ 28 ވަނަ ދުވަހުގައި އެމްޑީޕީގެ ރިޔާސި ކެނޑިޑޭޓު ކަނޑައެޅުމަށް ރިޔާސީ ޕްރައިމަރީ ބާއްވާނެކަން އެމްޑީޕީން މިއަދު ވަނީ އިއުލާން ކޮށްފައެވެ. 

އަދި މިޕްރައިމަރީގައި ވާދަކުރަން ބޭނުންވާ އެޕާޓީގެ މެންބަރުން، އެބޭފުޅުން ޕްރައިމަރީގައި ވާދަކުރުމަށް ތާއީދުކުރާ ޕާޓީގެ 500 މެންބަރުންގެ ތާއީދާއިއެކު 24 ޑިސެމްބަރ 2022 ވާ ހޮނިހިރު ދުވަހުގެ ހަވީރު 4:00 ގެ ކުރިން ޕްރައިމަރީއަށް ކުރިމަތިލުމަށް އެދޭފޯމް ފުރިހަމަ ކުރުމަށްފަހު ހުށައެޅުމަށް ވަނީ އެ ޕާޓީން އެދިފައެވެ. 

އެހެންކަމުން ޕްރައިމަރީ އަށް ވާދަކުރުމަށް ފޯމް ލާން ލިބެނީ އެންމެ ފަސް ދުވަހެވެ. 

މިކަމާއި ގުޅިގެން ނުރުހުން ފާޅުކުރައްވައި ޢާޒިމް މިއަދު ކުރެއްވި ޓުވީޓެއްގައި ވިދާޅުވީ، ރައީސް ނަޝީދު ޕްރައިމަރީ ގައި ވާދަކުރައްވާނެކަން އިއުލާން ކުރައްވާފައިވަނިކޮށް، އެމްޑީީޕީގެ ޕްރައިމަރީ އަށް ކުރިމަތިލާން އިއުލާނު ކޮށްފައިވަނީ އެމަނިކުފާނު ރަށުގައިވެސް ނެތީސް ކަމަށެވެ. އަދި ޕްރައިމަރީ އަށް ވާދަކުރުމަށް ފޯމް ލާން ދީފައިވަނީވެސް އެންމެ 5 ދުވަސް ކަމަށް އޭނާ ވިދާޅުވިއެވެ. 

"ކޮންމެކަމެއް ތިހާ ހުތުރުކޮށް ކުރަން އުޅުމުން ނަތީޖާ މާ ރަގަޅެއް ނުވާނެ." ޢާޒިމް ވިދާޅުވިއެވެ. 

އެމްޑީޕީގެ ރިޔާސީ ޕްރައިމަރީގައި ވާދަކުރައްވާނެކަން ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙާއި އެ ޕާޓީގެ ރައީސް، ރައީސް މުޙައްމަދު ނަޝީދުވެސް ވަނީ އިއުލާނުކުރައްވާފައިވެއެވެ. އެކަމާއި ގުޅިގެން އެ ޕާޓީ ވަނީ ދެ ފެކްޝަނަކަށް ބެހިގެން ގޮސްފައެވެ.