ޕީއެސްއެމް, އެމްޑީޕީގެ ހަރުގެއަކަށް ބަދަލުވެއްޖެ ކަމަށާ ރައްޔިތުން އެވާހަކަ ދައްކާ ކަމަށް އިދިކޮޅު ޕީޕީއެމް/ޕީއެންސީ ކޯލިޝަނުން ބުނެފިއެވެ. 

ދައުލަތުގެ މީޑިއާ ސިޔާސީކޮށް، ރައީސް ޞާލިހު ޕްރޮމޯޓްކޮށް، އިދިކޮޅަށް އެއްވެސް ފުރުސަތެއް ނުދީ ޕަބްލިކް ސަރވިސް މީޑިއާގެ ޤާނޫނާ ޚިލާފަށް ޢަމަލުކުރަމުންދާތީއާއި، ޕީއެސްއެމް ހިންގާގޮތާމެދު ރައްޔިތުންގެ ހުރި ކަންބޮޑުވުންތަކާއި މުވައްޒަފުންނަށް ބިރުދައްކާ، މުވައްޒަފުން ނިކަމެތި ކުރަމުންދާތީއާއި، ރިޔާސީ އިންތިޚާބު ބޯމަތިވާއިރު އެމްޑީޕީ ބޭނުންވާގޮތަށް ޕީއެސްއެމް ހިންގަމުންދާތީ، މިކަންކަމުގެ ކަންބޮޑުވުން ފާޅުކުރުމަށް ޕީއެސްއެމްގެ ސީއީއޯ ޢަލީ ހާލިދާއި ބައްދަލުކުރުމަށް އިދިކޮޅު ގެ ޓީމުން މިއަދު ވަނީ ޕީއެސްއެމްއަށް ގޮސްފައެވެ. 

"ޕީއެސްއެމް އަކީ މިހާރު އެމްޑީީޕީގެ ހަރުގެއަކަށް ބަދަލު ވެއްޖެ. މިއީ އެންމެ ބޮޑު ކަންބޮޑުވުމަކީ. ރައްޔިތުން އެވާހަކަ އެބަ ދައްކާ. ގައުމުގެ ހާލަތު އޮތީ އޮންނާނެ ގޮތަކަށް އޮއްވައި، މި މީހުން ދައްކަނީ އެހެން ވާހަކައެއް. މުޅިން މި ވަގު ސަރުކާރު ޕްރޮމޯޓް ކުރުމުގެ މަސައްކަތް މިކުރަނީ. އެއްވެސް ކަމެއް ކުރާ ސަރުކާރެއް ނޫން މިއީ. ރައްޔިތުންގެ ފައިސާ "ފެލާލަނީ". އަލީ ޚަލިދާއި ބައްދަލު ކުރުމަށް ދިޔުމަށް ފަހު ނޫސްވެރިންނާއި ބައްދަލުކުރައްވައި ވާހަކަ ދައްކަވަމުން އަދުރޭ ވިދާޅުވިއެވެ.

Advertisement

މީގެ އިތުރުން ވެސް، އަދުރޭ ވަނީ ވޯލްޑްކަޕު ރާއްޖޭގެ ރަށްތަކަށް ދެއްކުމުގެ ކަންކަން ސަރުކާރުން ކުރި ގޮތުން ހިތްހަމަ ނުޖެހުން ފާޅުކުރައްވާފައެވެ. އެގޮތުން، މީގެ ކުރިން އަހަރު ތަކުގައި، ދައުލަތުގެ މީޑިއާއިން ވޯލްޑްކަޕު ދައްކާއިރު، މިފަހަރު ރާއްޖެ ޓީވީއަށް އެކަން ހަވާލު ކުރުމާއި ގުޅިގެން އެކަމަށްވެސް އޭނާ ވަނީ ފާޑުވިދާޅުވެފައެވެ. 

މިއާއެކު، އަދުރޭ ވަނީ ޕީއެސްއެމްގައި މަސައްކަތް ކުރާ މުވައްޒަފުންނާއި ދޭތެރޭގައި އެ ކުންފުނީގެ ސީއީއޯ އަލީ ޚާލިދު ކަންކަން ކުރަމުންދާ ގޮތާއި މެދު ކަންބޮޑުވުން ފާޅުކުރައްވާފަ އެވެ.

އަދި ޕީއެސްއެމްގެ ސީއީއޯ ޢަލީ ޚާލިދާއި ބައްދަލުކުރައްވައި އިދިކޮޅު ގެ ހުރި ކަންބޮޑުވުންތައް ފާޅުކުރައްވަން ދިޔުމުން، އޭނާ ދިޔައީ "ފިލަން" ކަމަށް ވެސް އަދުރޭ ވިދާޅުވިއެވެ. 

"މިތަން އޮތީ ދަރާ ވިކިފައި. މިތަނުގައި ހުރި ލާރިތަކަށް ވީގޮތެއް ނޭނގެ. މިކަހަލަ ބައިވަރު ކަންބޮޑުވުންތަކެއް ހުރީމާ އަޅުގަނޑުމެން މިތަނަށް މިއައީ. އައިސް އަޅުގަނޑުމެން ބައްދަލުވުމަށް އެދުނީމާ ވަލު ދޮރާށިން ފިލައިގެން ރައްކާވެގެން އެ ދިޔައީ." އަދުރޭ ވިދާޅުވިއެވެ.