އެމްޑީޕީގެ ރައީސް އަދި ކުރީގެ ރައީސް، ރައީސް މުހައްމަދު ނަޝީދު އެމްޑީޕީގެ ރިޔާސީ ޕްރައިމަރީގައި ވާދަކުރައްވާނެ ކަން ޢިއުލާން ކުރައްވައިފިއެވެ.
އަންނަ ޖަނަވަރީ މަހުގެ 28 ވަނަ ދުވަހުގައި އެމްޑީޕީގެ ރިޔާސި ކެނޑިޑޭޓު ކަނޑައެޅުމަށް ރިޔާސީ ޕްރައިމަރީ ބާއްވާނެކަން އެމްޑީޕީން މިއަދު ވަނީ އިއުލާން ކޮށްފައެވެ. އަދި، ޕްރައިމަރީގައި ވާދަކުރަން ބޭނުންވާ އެޕާޓީގެ މެންބަރުން، އެބޭފުޅުން ޕްރައިމަރީގައި ވާދަކުރުމަށް ތާއީދުކުރާ ޕާޓީގެ 500 މެންބަރުންގެ ތާއީދާއިއެކު 24 ޑިސެމްބަރ 2022 ވާ ހޮނިހިރު ދުވަހުގެ ހަވީރު 4:00 ގެ ކުރިން ޕްރައިމަރީއަށް ކުރިމަތިލުމަށް އެދޭފޯމް ފުރިހަމަ ކުރުމަށްފަހު ހުށައެޅުމަށް ވަނީ އެ ޕާޓީން އެދިފައެވެ.
އެކަމާއި ގުޅިގެން ރައީސް ނަޝީދު މިއަދު ކުރެއްވި ޓުވީޓެއްގައި ވަނީ، އެމަނިކުފާނު ރިޔާސީ ވާދަކުރައްވާނެ ކަމަށް ވިދާޅުވެ، އެމްޑީީޕީގެ އެންމެހައި މެންބަރުންވެސް އެމަނުކުފާނަށް ވޯޓުދެއްވުމަށް އެދިވަޑައިގަންނަވާފައެވެ.
ރައީސް ނަޝީދުގެ މިފަދައިން އިއުލާން ކުރެއްވުމާއި ގުޅިގެން، އެމްޑީީޕީގެ މެންބަރުންގެ ތެރެއިން އެމަނިކުފާނަށް ތާއިދުކުރާ މެމްބަރުން ވަނީ މަރުހަބާ ދަންނަވާފައެވެ. އޭގެ ތެރޭގައި މަޖިލީހުގެ ނައިބު ރައީސް އިވާ ވެސް ހިމެނިވަޑައިގަންނަވައެވެ.
އެމްޑީޕީގެ ޕްރައިމަރީގައި ބައިވެރިވުމުގެ ފުރުޞަތު މިހާރު ހުޅުވާލާފައިވާއިރު، ރައީސުލްޖުމްހުރިއްޔާ އިބްރާހީމް މުހައްމަދު ޞާލިހު ވެސް ވަނީ އެ ޕްރައިމަރީ ގައި ވާދަކުރައްވާނެ ކަމަށް ވިދާޅުވެފައެވެ.
Advertisement
This content is created and paid for by advertisers and does not involve Voice Journalists
