އެޗްޑީސީއާއި އެމްއައިޓީޑީސީ ގުޅިގެން ބޯޓިންގް ދާއިރާއިން ޒުވާނުން ބިނާކުރުމަށް 10 ޖާގަ ހުޅުވާލުމަށްފަހު 10 ފަރާތަކަށް އެކަމުގެ ލިޔުން ހަވާލުކޮށްފައެވެ.

އެޗްޑީސީން ބުނީ، މިކަމުގެ އެންމެ ބޮޑު އެއް މަގުސަދަކީ، ހަރުދަނާ އަދި ހުނަރުވެރި ޒުވާނުން މުޖުތަމައުގައި ބިނާކުރުން ކަމަށާ، މި ޕްރޮގޮރާމް ފުރިހަމަކުރުމުން ދުނިޔޭގެ ކޮންމެތާކުވެސް މޮޓޯބޯޓު އޮޕަރޭޓްކުރެވޭ ރޯޔަލް ޔޮޓިން އެސޯސިއޭޝަންގެ ލައިސެންސް ހޯދުމުގެ ފުރުސަތު ލިބިގެންދާނެ ކަމަށެވެ. 

މި ޕްރޮގްރާމްގައި ބައިވެރިވުމަށް ފުރުޞަތު ހުޅުވާލާފައި ވަނީ އުމުރުން 18 އަހަރާއި 35 އަހަރާއި ދެމެދު އުމުރުފުރައިގެ ދިވެހި ޒުވާނުންނަށެވެ. އަދި ތައުލީމީދާއިރާއިން އެންމެ މަތީ ފެންވަރަކަށް ގްރޭޑް 10 ނިންމާފައިވާންޖެހެއެވެ. އަދި ބައިވެރިވާ ފަރާތަކީ ފަރިތަކަމާއިއެކު އިގެރޭސީއިން ވާހަކަ ދެއްކޭނެ މީހެއް ކަމުގައިވާންޖެހެއެވެ. މި ޕްރޮގްރާމްގައި ބައިވެރިވާ ފަރާތްތަކުން ވޯޓަރސްޕޯޓްސްއިން ތަޖުރިބާ ލިބިފައިވާ ފަރާތްތަކަށް އިސްކަން ދެވިފައިވާ ކަމަށް އެޗްްޑީސީން ބުނެފައިވެއެވެ.

Advertisement

އެޗްޑީސީން އިތުރަށް ބުނީ، މި ޕްރޮގްރާމްގައި ބައިވެރިވާ ފަރާތްތަކަށް 2 ދުވަހުގެ ތިއެރެޓިކަލް ޓްރެއިނިންގ އެއް ދެވިގެންދާނެ ކަމަށާ، އަދި ރާއްޖެއިން ބޭރުގައި 10 ހަފްތާގެ ޕްރެކްޓިކަލް ސެޝަންތައްވެސް ކުރިޔަށް ގެންދިއުމަށް ހަމަޖެހިފައިވާ ކަމަށެވެ. މީގެ އިތުރުން މި ޕްރޮގްރާމް ފުރިހަމަކުރާ ފަރާތްތަކަށް ގަލްފް ގައުމެއްގައި މަސައްކަތްކުރުމުގެ ފުރުސަތުވެސް ލިބިގެންދާނެކަމަަށްވެސް އެ ކޯޕަރޭޝަނުން ބުނެއެވެ.

މިއީ ރާއްޖޭގެ މާހައުލާއި ގުޅޭ، އަދި އެޗް.ޑީ.ސީގެ ކުރިއަށް ރޭވިފައި ހުރި ބޮޑެތި މަޝްރޫޢޫތަކުން އުފެދޭނެ ވަޒީފާތަކަށް ހުނަރުވެރިން ތަމްރީން ކުރުމަށް ކުރެވިގެންދާ މަސައްކަތެއް ކަމަށްވެސް ބުނެފައިވެއެވެ.