ވެރިއެއްގެ ކިބައިން އެންމެ ދެކެން ބޭނުންވާ ސިފަތައް އެމްޑީީޕީގެ ރައީސް، އަދި ކުރީގެ ރައީސް މުހައްމަދު ނަޝީދުގެ ހުރި މިންވަރަށް އިތުރު އެއްވެސް މީހެއްގެ ކިބައިން ފެނިފައިނުވާ ކަމަށް ރައްޔިތުންގެ މަޖިލީހުގެ އުނގޫފާރު ދާއިރާގެ މެންބަރު މުހައްމަދު ވަހީދު (ވައްޑެ) ވިދާޅުވެއްޖެއެވެ.
ނަޝީދު އެމްޑީޕީގެ ރިޔާސީ ޕްރައިމަރީގައި ވާދަކުރައްވާނެ ކަން ޢިއުލާން ކުރައްވައި، އެ ޕާޓީގެ އެންމެހައި މެމްބަރުންވެސް އެމަނިކުފާނަށް ވޯޓު ދެއްވުމަށް އެދުމާއި ގުޅިގެން، ވައްޑެ ކުރެއްވި ޓުވީޓެއްގައި ވަނީ ނަޝީދަށް ވަރަށް ބޮޑަށް ތައުރީފް ކުރައްވާފައެވެ.
އެގޮތުން ވައްޑެ ވިދާޅުވީ، ވެރިއެއްގެ ކިބައިން އޭނާ އެންމެ ދެކެން ބޭނުންވަނީ ވާނުވާ ދަތުމާ، ކަންކުރާނެ ތަސައްވުރެއް އޮތުމާ، އެޔާ އެއްގޮތަށް ގަދައަޅާ މަސައްކަތް ކުރުމާއި، ފިސާރި މުރާލިވުން ކަމަށެވެ.
"މިކަންކަން ރައީސް ނަޝީދުގެ ކިބައިން ފެންނަ ވަރާ ގާތަށްވެސް އެހެން މީހަކު ކިބައިން އަދި ނުފެނޭ." ވައްޑެ ވިދާޅުވިއެވެ.
އެމްޑީޕީ ބެހިފައިވާ ދެ ފެކްޝަނުގެ ތެރެއިން، ރައީސް ނަޝީދުގެ ފެކްޝަނުގައި ހިމެނިވަޑައިގަންނަވާ ވައްޑެ އަކީ ރައީސުލްޖުމްހުރިއްޔާ އިބްރާހީމް މުހައްމަދު ޞާލިހު އަށާއި، އަދުގެ ސަރުކާރަށް ވަރަށް ބޮޑަށް ފާޑުވިދާޅުވާ ބޭފުޅެކެވެ.
އެގޮތުން، އަދުގެ ސަރުކާރު ހިންގާ މައި ޕާޓީ އަކީ އެމްޑީޕީ ނަމަވެސް، ސަރުކާރުގައި އެމްޑީޕީގެ އެއްވެސް ސިފައެއް ނެތް ކަމަށްވެސް އޭނާ އަންނަނީ ބުނަމުންނެވެ.
Advertisement
This content is created and paid for by advertisers and does not involve Voice Journalists
