މޯލްޑިވިއަން ޑިމޮކްރަޓިކް ޕާޓީ (އެމްޑީޕީ) ގެ ދަފްތަރުގައި ހިމެނޭ މެންބަރުންގެ ތެރެއިން 40,000 އެއްހާ މެންބަރުންނަަށް އެންގުމަކާއި ނުލައި ދަފްތަރުން އުނިކޮށް، ދަފްތަރު ގަޑުބަޑު ކޮށްފައިވާ ކަމަށް އެ ޕާޓީގެ ރައީސް، މުހައްމަދު ނަޝީދު ވިދާޅުވެއްޖެއެވެ. 

ނަޝީދު އެމްޑީޕީގެ ޗެއަރޕާސަން ފައްޔާޒު އިސްމާއިލްއަށް މިއަދު ފޮނުއްވެވި ސިޓީއެއްގައި ވިދާާޅުވީ، 2023 ވަނަ އަހަރުގެ ރިޔާސީ އިންތިހާބުގައި އެމްޑީޕީގެ ޓިކެޓްގައި ކުރިމަތިލާނެ ކެންޑިޑޭޓެއް ހޮވުމަށް ބާއްވާ ޕްރައިމަރީގައި އެމަނިކުފާނު ވާދަކުރައްވާ ކަމަށެވެ.

އަދި އެމްޑީޕީގެ ވޯޓުލާ ދަފުތަރުން ސާޅީސްހާހާ ގާތަަށް މެންބަރުން، އެ މެންބަރުންނަށް އެނގުމަކާނުލާ، ކުއްލިއަކަށް އުނިކުރުމުން ދަފުތަރު ވަނީ ގަޑުބަޑުވެފައި ކަމަށްވެސް ނަޝީދު ވިދާޅުވިއެވެ. 

"މިޕާޓީއަށް ހިތުން ރުހުމުން ގުޅިފައިވާ މެންބަރުންގެ ތެރެއިން %40 މެންބަރުންގެ ހައްގާއި ބައިވެރިވުން ގެއްލުވާލައި ބާއްވާ އިންތިޚާބަކީ 2023ގެ ރިޔާސީ އިންތިޚާބުގައި މިޕާޓީއަށް އިންތިހާއަށް ނޭދެވޭ އަސަރުކުރާކަމެކެވެ. އަދި އެއީ މިޕާޓީގެ މަސްލަހަތު ހިފެހެއްޓޭނެކަމެއް ނޫންކަމަށް އަޅުގަނޑު ދެކެމެވެ." ނަޝީދު ވިދާޅުވެފައިވެއެވެ. 

އެހެންކަމުން ރިޔާސީ ޕްރައިމަރީގައި ވޯޓުލާއިރު، އެޕާޓީގެ ވޯޓުލާ ދަފްތަރުގެ ގޮތުގައި މިހާތަަނށް ބަލަމުންއައި ދަފްތަރުގައި ހިމެނޭ މެންބަރުން ވޯޓުލުމުގެ ހައްގު ނުގެއްލޭނެކަން ކަށަވަރުކޮށްދެއްވުމަށް ނަޝީދު ވަނީ އެދިވަޑައިގެންފައެވެ.

އެމްޑީޕީގެ ދަފްތަރު ގަޑުބަޑު ކޮށް، ދަފްތަރުގައި އެހެން ޕާޓީގެ މެންބަރުންވެސް ހިމެނޭ ކަމަށް، ޕާޓީގެ ޗެއާޕާސަން އިންތިހާބުގެ ތެރެއިން މިނިސްޓަރު ފައްޔާޒު ވިދާޅުވެފައިވެއެވެ. އަދި ޗެއާޕާސަން ކަމަށް އިންތިހާބު ވުމާއި އެކު، ދަފްތަރު ގައި ތިބި އެހެން ޕާޓީ ތަކުގެ މެންބަރުން ދަފްތަރުން ވަކި ކުރައްވާނެ ކަމަށްވެސް އޭނާ ވިދާޅުވިއެވެ.