2022 ވަނަ އަހަރުގެ ބީބީސީ ސްޕޯޓްސް ޕާސަނަލިޓީގެ ވޯލްޑް ސްޕޯޓްސް ސްޓާ އޮފް ދަ އިޔާގެ މަގާމް އާޖެންޓީނާއަށް ވޯލްޑް ކަޕް ކާމިޔާބުކޮށްދިން ކެޕްޓަން ލިއޮނަލް މެސީ ލިބިއްޖެއެވެ..

އުމުރުން 35 އަހަރުގެ މެސީގެ ކެޕްޓަން ކަމުގެ ދަށުން އާޖެންޓީނާ އިން ވަނީ ގަތަރުގައި 36 އަހަރަށް ފަހު ފުރަތަމަ ފަހަރަށް ވޯލްޑް ކަޕް ފުޓްބޯޅަ މުބާރާތް ކާމިޔާބުކޮއްފައެވެ. މީގެ އިތުރުން ފުރާންސްގެ ޕެރިސް ސެއިންޓް ޖާމަން (ޕީއެސްޖީ) ގެ ފޯވާޑް ވަނީ އޭނާގެ ފަސް ވަނަ ވޯލްޑް ކަޕްގައި ހަތް ލަނޑު ޖެހުމުގެ އިތުރުން މުބާރާތުގެ އެންމެ މޮޅު ކުޅުންތެރިއާގެ މާގާމް ވެސް ހޯދާފައެވެ.

މިދިޔަ އަހަރު ބީބީސީ ސްޕޯޓްސް ޕާސަނަލިޓީ އޮފް ދަ އިޔާގެ އެވޯޑް ލިބުނު ރަޗެލް ބްލެކްމޯރ

ބާސެލޯނާގެ ކުރީގެ ތަރި މެސީ އަކީ މިހާތަނަށް ދުނިޔޭގައި އުފެދުނު އެންމެ މޮޅު އެއް ފުޓްބޯޅަ ކުޅުންތެރިޔާގެ ގޮތުގައި ގިނަ ބަޔަކު ގަބޫލުކުރެ އެވެ.ވޯލްޑް ކަޕް ފައިނަލް މެޗުގައި ޕެނަލްޓީ ޖަހައިގެން 4-2 ފުރާންސް ބަލިކޮށް އާޖެންޓީނާ ތަށި އުފުލާލި އިރު މި މެޗުގައި މެސީ ދެ ލަނޑު ކާމިޔާބުކުރުމުގެ އިތުރުން ޕެނަލްޓީ ޝޫޓްގައި އާޖެންޓީނާ ޓީމުގެ ފުރަތަމަ ޕެނަލްޓީ ކާމިޔާބުކޮށްދިނީވެސް މެސީ އެވެ.

ބީބީސީ ސްޕޯޓްސް ޕާސަނަލިޓީސްގެ ވޯލްޑް ސްޕޯޓްސް ސްޓާ އޮފް ދަ އިޔާގެ އެވޯޑަކީ ކޮންމެ އަހަރަކުވެސް އެއަހަރަކު ދުނިޔޭގެ ފެންވަރުގައި ބޭއްވެ ކުޅިވަރު މުބާރާތްތަކުގެ ތެރެއިން އެންމެ ފާހަގަކޮށްލެވޭ ކާމިޔާބީއެއް ހޯދާ ކުޅިވަރު ކުޅުންތެރިއަކަށް ބީބީސީ ސްޕޯޓްސް އިން އެކުލަވާލާ ޕެނަލަކުން ދޭ އެވޯޑެކެވެ. 2021 ވަނަ އަހަރުގެ މި އެވޯޑް ލިބުނީ  އައިރިޝް ޖޯކީ ރަޗެލް ބްލެކްމޯރ އަށެވެ.