މި ދުވަސްވަރަކީ ގެސްޓްހައުސް ތަކަށް ފަތުރުވެރިން ގިނަވަމުން އަންނަ ދުވަސްވަރުތަކަށް ވާއިރު، ކްރިސްމަސް ދުވަސް ފަދަ ޣައިރު ދީންތަކުގެ ޢީދުތައް ފާހަގަކުރުމުގެ ގޮތުން އެއްވެސް ކަމެއް ރަށުގައި ނުކުރުމަށް ދަނގެތީ ކައުންސިލުން އަންގައިފިއެވެ. 

ދަނގެތީ ކައުންސިލުން ނެރުނު ބަޔާނެއްގައި ބުނީ، ރަށަށް ޒިޔާރަތްކުރާ ފަތުރުވެރިން ގިނަވުމަކީ ޖުމްލަކޮށް ރަށުގެ ގިނަ ބަޔަކަށް އެކަމުގެ ނަފާ ލިބިގެންދާ، އަދި ރަށުގެ ޢުމްރާނީ ތަރައްޤީއަށް ވެސް ވަރަށް ބޮޑު ކުރިއެރުން ތަކެއް ލިބޭނެ ކަމެއް ކަމަށެވެ. އެހެން ކަމުން ރަށުގެ ސާފުތާހިރުކަމަށް ސަމާލުކަންދީ، ރަށަށް އަންނަ ފަތުރުވެރިންނަށް ހިތްހެޔޮ ކޮށް ހިތުމަށްވެސް އެ ކައުންސިލުން ވަނީ އެދިފައެވެ.

މިއާއެކު ދަނގެތީ ކައުންސިލުން ވަނީ، ފަތުރުވެރިން ގެންނަ ފަރާތްތަކުން ދިވެހި ރާއްޖޭގެ ޤާނޫނުތަކާއި ޤަވާޢިދުތަކާއި އެއްގޮތަށް ޢަމަލު ކުރުމަށް ފަތުރުވެރިނަށް ހަނދާންކޮށްދީ އިރުޝާދު ދިނުމަށްވެސް އަންގާފައެވެ. 

Advertisement

"އެގޮތުން، ޤާނޫނު ނަމްބަރު 94/6 ދިވެހި ރައްޔިތުންގެ ދީނީ އެއްބައިވަންތަކަން ޙިމާޔަތްކުރުމާއިބެހޭ ޤާނޫނުގެ ދަށުން ހެދިފައިވާ ދިވެހި ރައްޔިތުންގެ ދީނީ އެއްބައިވަންތަކަން ޙިމާޔަތްކުރުމުގެ ޤަވާޢިދު (R-40/2022) ގެ 9 ވަނަ މާއްދާ ސާފުވާނެ ގޮތަށް އެފަދަ ފަރާތްތަކަށް ރަނގަޅަށް އިރުޝާދު ދިނުމަށް ދަންނަވަމެވެ. އެ ޤަވާއިދުގެ 9 ވަނަ މާއްދާގައި ވާގޮތުން "ދިވެހިރާއްޖޭގައި ދިރިއުޅޭ ޣައިރު މުސްލިމުންނާއި، ދިވެހިރާއްޖެއަށް ޒިޔާރަތްކުރާ ޣައިރު މުސްލިމުން ފާޅުކަން ބޮޑުގޮތެއްގައި އެމީހުންގެ ދީނީ ޝިޢާރުތައް ފާޅުކުރުމާއި ޢާންމު ތަންތާނގައި ޖަމާޢަތް ހަދައިގެން އެފަދަ ދީނީ ޙަރަކާތްތައް ހިންގުމާއި، އެމީހުންގެ އެފަދަ އެއްވެސް ޙަރަކާތެއްގައި ދިވެއްސަކު ބައިވެރިވުމަކީ މަނާ ކަމެކެވެ." މިގޮތުން، ކްރިސްމަސް ދުވަސް ފަދަ ޣައިރު ދީންތަކުގެ ޢީދުތައް ފާހަގަކުރުމުގެ ގޮތުން މި ރަށުގައި އެއްވެސް ހަރަކާތެއް ނުހިންގުމަށް ދަންނަވަމެވެ." ދަނގެތީ ކައުންސިލްގެ ބަޔާނުގައި ވެއެވެ. 

މިއާއެކު އެކައުންސިލުން ވަނު، މީހުން ދިރިއުޅޭ ރަށްރަށުގައި އުޅޭއިރު، ދިވެހިރާއްޖޭގައި ޓޫރިސްޓު ގެސްޓްހައުސް ހިންގުމާއިބެހޭ ޤަވާޢިދާއި އަދި އެ ކައުންސިލުން ޢާންމުކޮށްފައިވާ ހެދުން އެޅުމުގެ މިންގަނޑާ އެއްގޮތަށް ޢާންމު އިޖްތިމާޢީ މިންގަނޑަށް ފެތޭ ފަދަ ހެދުމެއްގައި އުޅުމަށް ފަތުރުވެރިންނަށް އިރުޝާދުދީ އެގޮތަށް ޢަމަލު ކުރޭތޯ ބަލައި، އެކަން ޔަޤީން ކުރަން އަންގާފައެވެ.

ކްރިސްމަސް ފަދަ ޣައިރުދީން ތަކުގެ ޢީދު ފާހަގަކުރުން އިސްލާމް ދީނާއި ރާއްޖޭގެ ގާނޫނު އަސާސީން މަނާ ކުރާއިރުވެސް މި ފަހަކަށް އައިސް ރަށްރަށުގައިވެސް އެފަދަ ކަންކަން ފާހަގަކުރަމުންދާތަން ފެނެއެވެެ. މިފަދަ ކަންކަން ޒުވާން ޖީލުތަކަށް ފެނި، އެކަމަށް އެއްގޯސްވުމަކީ އިޖުތިމާއީ ފޭރާން ހަލާކުވެގެންދާނެ ކަމެއް ކަމަށް ގިނަ ބަޔަކު ދެކެއެވެ.