ދިވެހިރާއްޖޭގައި ދިރިއުޅޭ ކޮންމެ 5 މީހަކުން 4 މީހުން ފޯއް ނުވަތަ ސުޕާރި ދުފުމުގައި ބޭނުންކުރާ ކަމަށްް އެޗްޕީއޭ އިން ބުނެފިއެވެ. 

އެޗްޕީއޭއިން ނެރުނު ސްޓެޕް ސާވޭ 2022ގައި ބުނެފައިވާ ގޮތުން، ކޮންމެ 5 މީހަކުން 4 މީހުން ފޯއް ނުވަތަ ސުޕާރި ދުފުމުގައި ބޭނުންކުރެއެވެ. އަދި އޭގެ ތެރެއިންވެސް ދެބައި ކުޅަ އެއްބައި މީހުންނަނީ ކޮންމެ ދުވަހަކުވެސް ދުފުމުގައި ފޯއް/ސުޕާރި ބޭނުންކުރާ މީހުން ކަމަށް މި ސާވޭ އިން ދައްކާ ކަމަށް އެ އިދާރާއިން ބުނެއެވެ. 

ދުފުމުގައި، ސުޕާރީ، ފޯއް، ބިލެއް އަދި ހުނި ފަދަ ތަކެތި ބޭނުންކުރުމަކީ އަނގައިގެ އަދި ކަރުތެރޭގެ ކެންސަރު ޖެހުމަށް މަގުފަހިވާ ކަމެއް ކަމަށްވާއިރު އެތަކެތި ކެއުމުން ދުރުހެލިވުމަކީ މިފަދަ ނުރައްކާތެރި ބަލިތަކުން ސަލާމަތް ވުމަށް އެޅޭނެ ފިޔަވަޅެއް ކަމަށް އެޗްޕީއޭ އިން ބުނެއެވެ.

ދުނިޔޭގެ ސިއްހަތު ޖަމިއްޔާ، ޑަބްލިއުއެޗްއޯއިން ކޮށްފައިވާ ދިރާސާއެއްގެ އަލީގައި ބުނެފައިވަނީ ސުޕާރީގެ ސަބަބުން އަނގައިގެ ކެންސަރަށް މަގުފަހިވާ ކަމަށެވެ. ޑަބްލިއުއެޗްއޯގެ އޭޖެންސީއެއް ކަމަށްވާ އިންޓަނޭޝަނަލް އޭޖެންސީ ފޯ ރީސާޗް އޮން ކެންސާގެ އަނގައިގެ ހާއްސަ ޑޮކްޓަރެއް ކަމަށްވާ އަލޯކް ލަތީ ވިދާޅުވި ގޮތުގައި ސުޕާރީގައި އަލްކަލޮއިޑްސް އާއި ޕޮލިފެނޮލްސް ކިޔާ މާއްދާތަކެއް އެކުލެވެ އެވެ. މި މާއްދާތަކަކީ ކެންސަރަށް މަގުފަހި ކުރުވާ މާއްދާތަކެވެ.

މީގެ އިތުރުންވެސް، ދުފުމާއި ސުޕާރީ ކެއުމުގެ ސަބަބުން ނުރައްކާތެރި ކެންސަރުގެ އިތުރުން އަނގައިގެ ހަންގަނޑު ބޯވުމާއި ދަތުގެ މައްސަލަތައް ވެސް ދިމާވާކަމަށް ރާއްޖޭގެ ޑޮކްޓަރުންވެސް އަންނަނީ ބުނަމުންނެވެ. އަދި ދެވި ހިފުމަށް މަގުފަހިކޮށްދޭ ބައެއް މާއްދާތައް ވެސް ސުޕާރީ އާއި ދުފާ އެއްޗެހީގައި ހިމެނޭ ކަމަށް އެފަރާތްތަކުން ފާހަގަކުރެއެވެ. 

އެހެންކަމުން، ފޯއް އަދި ސުޕާރީ ގެ ބަދަލުގައި، ފޮނިތޮށި، ދިރި، ކަރަންފޫ އަދި ކާފޫރު ތޮޅި ބޭނުން ކުރުމަށް އެޗްޕީއޭ އިން އިލްތިމާސްކުރެއެވެ.