އެކަކު އަނެކަކު ދެކެ ރުޅިއައިސް، ވާހަކަ ނުދައްކައި ނުތިބުމަށް މިއަދުގެ ޚުތުބާގައި ނަސޭހަތްތެރިވެއްޖެއެވެ. 

އިސްލާމީ ވަހުދަތާއި އެއްބައިވަންތަ ކަމުގެ މުހިންމުކަން މައުޟޫއަށް މިއަދު އިއްވާފައިވާ ޚުތުބާގައި ބުނީ، އަހަރެމެންގެ މެދުގައި ވަޙްދަތު ޤާއިމުކުރުމަށް ބޭނުންވާނަމަ އިސްލާމްދީނުގެ އަޚްލާޤުން އަހަރަމެންގެ ޒީނަތްތެރިވާން ޖެހޭކަމަށެވެ.

އަދި އެއްބަޔަކު އަނެއް ބަޔަކަށް އަޅާފައި ހެޔޮފޯރުވައި ރަޙްމަތްތެރިކަމާއި އެކުވެރިކަން ޤާއިމުކޮށް، އެއްބަޔަކު އަނެއް ބަޔަކާ ގުޅިގެން އުޅެން ޖެހޭކަމަށް ޚުތުބާގައި ބުނެފައިވެއެވެ.

މިއާއެކު ޚުތުބާގައި ބުނީ، އިސްލާމީ ވަޙްދަތާއި އީމާންކަމުގެ އުޚުއްވަތްތެރިކަން ޤާއިމު ކުރެވޭނީ، އަރައިރުންތަކާއި، ދެބަސްވުންތަކާއި، ބައިބައިވުމުން އެކަހެރިވެ ތިބެ، އަމިއްލަ މަސްލަހަތުތަކާއި، ދުންޔަވީ މަންފާތަކަށް ވުރެ، މުޖުތަމައާއި ޤައުމާއި، އުއްމަތުގެ މަސްލަހަތުތައް އިސްކޮށްގެން ކަމަށެވެ.

"ތިޔަބައިމީހުންގެ މެދުގައިވާ އިސްލާމީ އުޚުއްވަތްތެރިކަމުގެ މަތިން ހަނދުމަކުރާށެވެ! ތިޔަބައިމީހުންގެ މުޖުތަމަޢުގައި އޮތް ޒަމާންވީ ރީތި އަޚްލާޤިއްޔާތަށް ތަބާވެ ތެދު ބުނާށެވެ! ދޮގު ނަހަދާށެވެ! މުޖުތަމަޢު ބައިބައިވެ ނިކަމެތިވެދާނެ އެއްވެސް ކަމެއް ނުކުރާށެވެ! ލޮބުވެތި ރަސޫލާ ހަދީޘް ކުރައްވާފައިވާ ފަދައިން، ކޮންމެ މީހަކުވެސް ހެޔޮކަމުގެ ތަޅުތަނޑިއަކަށް ވާށެވެ! އަދި ނުބައި ކަންތަކުގެ ތަޅަކަށް ވާށެވެ! އެކަކު އަނެކަކު ދެކެ ރުޅިއައިސް، ވާހަކަ ނުދައްކައި ނުތިބޭށެވެ! އެންމެ ރަނގަޅު މީހަކީ އިސްވެ ވާހަކަ ދައްކާ މީހާއެވެ." ޚުތުބާގައި ބުނެފައިވެއެވެ. 

މިއާއެކު ޚުތުބާގައި ބުނީ، މުސްލިމުންގެ މެދުގައި މި އެއްބައިވަންތަކަމާއި އުހުވަތްތެރިކަން ނެތިދިއުމުން އިސްލާމީ ދައުލަތުގެ ގޮށްތައް މޮހި ބާރުތައް ނިކަމެތިވެ ކަފާސްވެ، ދުޝްމަނުން އަހަރުމެންގެ މައްޗަށް ތަފާތު ގޮތްގޮތަށް ބާރުފޯރުވަން ފެށިކަމަށެވެ.

އަދި އިސްލާމީ އުއްމަތާއި މިއަދު ކުރިމަތިވެފައިވާ މުސީބާތްތައް ގިރާކޮށްފައި ދެވޭވަރުގެ ގާބިލްކަން އިސްލާމީ އުއްމަތުގެ ވަހުދަތުގައްޔާ އެއްބަނޑު އެއްބަފާ ކަމުގެ ގެތުންތަކުގައި ހުރިކަން ފާހަގަކޮށް ޚުތުބާގައި ބުނީ، އެކަމަށްޓަކައި އެންމެ ފުރަތަމަ ކުރަންޖެހޭ ކަމަކީ އިސްލާމީ ވަހުދަތަށް ބޭނުންވާ ބިންގާ ވަރުގަދަ ކުރުން ކަމަށެވެ.