އިޙްސާސްކުރެވެނީ ހަމަހިމޭންކަމާއި އެކަނިވެރިކަމެވެ. ދުނިޔެވީ މަޖަލާއި ސަކަރާތް ކެނޑިގެން ގޮއްސިއެވެ. ކިތަންމެ އަންނަން ބޭނުން ނުވިޔަސް މިތަނަށް ހަމަ ކޮންމެ މީހަކުވެސް ގެނެވޭނެއެވެ. މިތަނުން އޭނާގެ ލޯބިވާ އަހުލުންނާއި މިތުރުންނާ ވަކިވާން ޖެހޭނެއެވެ. އެއްކުރިހާ މުދާތައް ދޫކޮށްލަން ޖެހޭނެއެވެ. އޮންނަން ޖެހޭނީ ތިމާކުޅަ ޢަމަލަކާއެކީ އެކަނިމާއެކަންޏެވެ. މިއަދު ކާކުބާއެވެ؟ އަހުރެންބާއެވެ؟ ނުވަތަ ތިބާ ބާއެވެ؟

ތާބިޢީ ބޭކަލެއްކަމުގައިވާ ޙަސަނުލް ބަޞަރީ رَحِمَهُ اللهُ ޖަނާޒާއެއްގައި ބައިވެރިވެވަޑައިގެން ހުންނަވަނިކޮށް މީހަކު ސުވާލުކޮށްލިއެވެ. "މިއީ ކާކުގެ ޖަނާޒާއެއްތޯއެވެ؟" އެހިނދު ޖަވާބުދެއްވިއެވެ. "އަހަރެންނާއި ތިބާއެވެ." ތެދެކެވެ. އަހަރެންނާއި ތިބާއެވެ. އަހަރެންނާއި ތިބާގެ މައްޗަށް ޖަނާޒާގެ ކަންކަން ކުރެވި، ޤަބުރުސްތާނުގެ ގޮވެއްޗަށް ގެނައުމުގެ ދުވަސްވަނީ ދާދި ގާތުގައެވެ. ހަމަ ޔަޤީނުންވެސް އަހަރެންނާއި ތިބާގެ މައްޗަށް އެކަންކަން ކުރެވޭނެ ކަމީ ޝައްކެއް އޮތްކަމެއް ނޫނެވެ.

މިތަނުގައި މިވާ މީހުންނަކީ އަހަރެމެން ފަދައިން ދުނިޔޭގައި އުޅުނު މީހުންނެވެ. ދުނިޔަވީ ޙަޔާތުގެ އުފާވެރިކަމާއި މަޤްޞަދުތައް ޙާޞިލުކުރުމަށް ގަދައަޅައި މަސައްކަތްކުރި މީހުންނެވެ. އަހަރެމެން ފަދައިން ފޮނި އުއްމީދުތަކެއް ކުރި މީހުންނެވެ. ލިބުނު ބާރެއް ބޭނުންކޮށްގެން ދުނިޔެ އާރާސްތުކުރުމަށްޓަކައި އަވަދިނެތި އުޅުނު މީހުންނެވެ. ދުނިޔެ އަޅާފައި ދާންޖެހޭނެކަމުގެ މަތިން އެކި މިންވަރަށް ހަނދާންވެ ހަނދާންނެތިވެ އުޅުނު މީހުންނެވެ. ޢާލަމްތަކުގެ ވެރި ރަސްކަލާނގެ ރުއްސެވުން އަދައިގެން އެކި މިންވަރަށް އަޅުކަމުގައި އުޅުނު މީހުންނެވެ.

Advertisement

ވިސްނާލައްވާށެވެ! މިތަނުގައި މިވާ ކޮންމެ މީހަކަށްވެސް އެވަނީ މަރަކީ ކޮން އެއްޗެއްކަން އެނގިފައެވެ. އެބައިމީހުން އެތިބި ތަނުގައިވާ ފިތުނައާއި ލިބޭ ނިޢުމަތާއި ޢަޛާބު ޝައްކެތް ނެތް މިންވަރަށް ތަޖުރިބާކުރެވިފައެވެ. އެކަންކަން އިޙްސާސްކުރެވިފައެވެ. ކަންމިހެން ހުރިއިރު، އަމިއްލަ ނަފްސާ ސުވާލުކޮށްލާށެވެ! މިތަނުގައި މިވާ ކޮންމެ މީހަކަށްމެ ދުނިޔޭގެ ޙަޔާތަށް އައުމުގެ ކުޑަކުޑަ ފުރުޞަތެއް ލިބިއްޖެނަމަ އެބައިމީހުން ކުރާނީ ކޮންކަމެއްތޯއެވެ؟ ކުރިން އުޅުނުފަދައިން މާތް ﷲއަށް އުރެދި އުޅޭނެތޯއެވެ؟ ނަމާދުތަކަށް ގޮވާލެވޭއިރު ބީރުކަންފަތެއް ދީގެން ހުންނާނެތޯއެވެ؟ ހެޔޮޢަމަލުތައް ކުރުމާމެދު ޣާފިލުވެ، އަމިއްލަ އެދުންތަކަށް ތަބާވެ ފާޙިޝް ނުބައި ޢަމަލުތަކުގައި އުޅޭނެ ހެއްޔެވެ؟ ނޫނީ އެބައިމީހުންގެ ވަގުތުތައް ހޭދަކުރާނީ ނަމާދުކުރުމާއި، ޤުރްއާން ކިޔެވުމާއި، ހެޔޮކަންކަން މީސްތަކުންގެ ތެރޭގައި ފަތުރައި، ހެޔޮގޮތަށް މީހުންނަށް ގޮވާލައި ބައެއްކަމުގައި ނޫން ހެއްޔެވެ؟ އަހަރެމެންނަށް އެއްބަސްވެވޭ ޖަވާބަކަށް ވާނީ ހަމަގައިމުވެސް އެބައިމީހުން ފާފަތަކެއް ނުކުރާނެކަމެވެ. އަދި ޘަވާބާއި ދަރުމަ ހޯދުމަށް ކެނޑިނޭޅި މަސައްކަތްކުރާނެކަމެވެ. އަހަރެމެން މިދުނިޔޭގައި ވަގުތުތައް ހޭދަކުރާފަދައިން ވަގުތުތައް ހޭދަނުކުރާނެކަމެެވެ. ތައުބާވެ ޞާލިޙު ޢަމަލުތައް ކޮށްލަން އިތުރު ފުރުޞަތަކަށް އެއިގެ ތެރެއިން ހަމަކޮންމެ މީހަކުވެސް އިންތިހާއަށް އެދޭނެއެވެ. އިތުރު ނަމާދުތަކެއް ކޮށްލައި، މަތިވެރި ޛިކުރެއް ކޮށްލައި، އިތުރު ޞަދަޤާތެއް ކޮށްލާނެ ފުރުޞަތަކަށެވެ. ދުނިޔަވީ ޙަޔާތުގައި ކުޑަކުޑަ ވަގުތުކޮށްޅެއް ލިބިފައިވާ މީހެއްކަމުގައި ވާނަމަ ކިހާ ރަނގަޅުހޭ ހިތަށް އަރާނެއެވެ.

އެހެންނަމަވެސް ވިސްނާށެވެ! އެމީހުންނަކަށް ދެން ދުވަހަކުވެސް އެ ފުރުޞަތެއް ނުލިބޭނެއެވެ. ދުނިޔަވީ ޙަޔާތަކަށް ނާދެވޭނެއެވެ. މިތަނުގައި މިވާ އެންމެން އެ އެދޭ ފުރުޞަތު މިވަނީ އަހަރެމެންނަށް ލިބިފައެވެ. މި ދުނިޔަވީ ޙަޔާތުގައި މިވަގުތު ހުރުމުގެ ފުރުޞަތު ލިބިފައި މިވަނީ އަހަރެމެންނަށެވެ. ތައުބާވެ، ހެޔޮޢަމަލުކޮށް، ނަފްސު އިޞްލާޙުކޮށްލާނެ ފުރުޞަތު ލިބިފައި މިވަނީ އަހަރެމެންނަށެވެ. ވީއިރު، ފުރުޞަތުގެ ބޭނުން ހިފަންވީއެވެ. ކުރަން އޮތް ހެޔޮކަމެއްނަމަ އަވަހަށް ކުރަންވީއެވެ. ފާފައެއް ކުރެވޭނަމަ އަވަހަށް ތައުބާވާންވީއެވެ. ނަފްސު ނުބައި މަގަކުން ދާކަމުގައިވާނަމަ އިޞްލާޙުކުރަންވީއެވެ. ހެޔޮލަފާ ރަނގަޅުމީހަކަށް ވާންވީއެވެ. ބިމުގެ އަޑީގައި މިވާ ގޯއްޗަށް އަހަރެމެންވެސް ދާންޖެހުމުގެ ކުރިންނެވެ. ދާންޖެހޭނެ ވަގުތު ވަނީ ހަމަ ދާދި ގާތުގައެވެ.