އެމްއެމްޕީއާރުސީ ޚިޔާނާތަާއި ވެންޓިލޭޓަރު ޚިޔާނާތައް ދައުވާކޮށް ހުކުމް ކުރުމުން އެ ފައިސާއަށް ވީގޮތް އެނގޭނެ ކަމަށް އެމްޑީީޕީގެ ރައީސް އަދި ރައްޔިތުންގެ މަޖިލީހުގެ ރައީސް މުހައްމަދު ނަޝީދު ވިދާޅުވެއްޖެއެވެ. 

އެމްއެމްޕީއާރުސީގެ ޚިޔާނާތާއި ވެންޓިލޭޓަރުގެ ޚިޔާނާތާއި ގުޅިގެން އެކަމުގެ ތުހުމަތުކުރެވޭ މީހުންނަށް ދައުވާ ނުކުރެވި ލަސްވާތީ ކަންބޮޑުވުން ފާޅުކޮށް ރައީސް ނަޝީދު ކުރެއްވި ޓުވީޓެއްގައި ވިދާޅުވީ، ރައީސުލްޖުމްހުރިއްޔާ އިބްރާހީމް މުހައްމަދު ޞާލިހުގެ ދައުރު ނިމެން ވީއިރުވެސް އެމްއެމްޕީއާރުސީގެ މައްސަލަ އާއި ވެންޓިލޭޓަރު ގެ މައްސަލަ އާއި ގުޅިގެން ކާމިޔާބު ތަހުގީގެއް ހިންގައި ދައުވާ އުފުލާފައި ނުވާކަމަށެވެ. 

"އެމްއެމްޕީއާރުސީ ޚިޔާނާތަާއި ވެންޓިލޭޓަރު ޚިޔާނާތައް ދައުވާކޮށް ހުކުމް އިއްވުމުން ފައިސާއަށް ވީގޮތް ސާފުވާނެ." ރައީސް ނަޝީދު ވިދާޅުވިއެވެ. 

Advertisement

ރައީސް ނަޝީދު ވަނީ މީގެ ކުރިން ވެސް އެތައް ފަހަރަކު ޚީޔާނާތުގެ މައްސަލަތައް ބަލަން ގޮވާލައްވާފައެވެ. އެގޮތުން އެމްއެމްޕީއާރްސީ ޚިޔާނާތުގެ މައްސަލަ ރަނގަޅަށް ތަހުގީގު ނުކުރެވޭނަމަ، ދައުލަތް ފެއިލް ވާނެ ކަމަށް މީގެ ކުރިން އެމަނިކުފާނު ވިދާޅުވިއެވެ. އަދި ވައްކަންކުރާ ސަރުކާރަކާ އެކީ އެމްޑީޕީ އޮންނާކަށް ނޭދޭނެ ކަމަށްވެސް އެމަނިކުފާނު ވަނީ ވިދާޅުވެފައެވެ.

އަދި މީގެ އިތުރުން ވެންޓިލޭޓަރު މައްސަލާގައި ދޫ ނުދެއްވާނެ ކަމަށް ވެސް ރައީސް ނަޝީދު މީގެކުރިންވެސް ވިދާފާޅުވެފައިވެއެވެ.

ސަރުކާރުގައި މި މައްސަލަ ތަހުގީގު ކުރަމުން ދަނީ، އެންޓި ކޮރަޕްޝަން ކޮމިޝަން (އޭސީސީ) އާއި، ފުލުހުންނާއި ޕްރޮސެކިއުޓާ ޖެނެެރަލް (ޕީޖީ) އޮފީސް ގުޅިގެން ޖޮއިންޓް އިންވެސްޓިގޭޝަނެއްގެ ގޮތުގައެވެ.