ގަތަރު ވޯލްޑް ކަޕް ކާމިޔާބުކުރުމަށްފަހު ވޯލްޑް ކަޕް ޓްރޮފީ އުފުއްލާލި އިރު ލިއޮނެލް މެސީ ލައިގެން ހުރި ބިޝްޓް ގަތުމަށް އޮމާންގެ ގާނޫނު ހަދާ މަޖިލީހުގެ މެމްބަރަކު "އެއް މިލިއަން ޑޮލަރު" ހުށަހަޅައިފި އެވެ.
ބިޝްޓް އަކީ ސަގާފީގޮތުން އަރަބި އަމީރުންގެ އިއްޒަތް ފުރިހަމަކޮށްދޭ ޚާއްސަ އެއްޗެކެވެ. ގަދަރުވެރިކަމާއި ޝަރަފާއި އިއްޒަތް ރަމްޒުކޮށްދޭ އެއްޗެކެވެ. ތަށި ހަވާލު ކުރުމުގެ ކުރިން ފީފާގެ ރައީސް ޖިއާންނި އިންފަންޓީނޯ އާއި ގަތަރުގެ އަމީރު ޝައިޚު ތަމީމް ބިން ހަމަދު ބިން ޚަލީފާ އާލްޘާނީ، އާޖެންޓީނާގެ ޖޯޒީގެ މަތިން މެސީގެ ގައިގައި ބިޝްޓް ލެއްވުމުންގެ ސަބަބުން މެސީގެ އާޖެންޓީނާ ޖޯޒީގެ ބޮޑުބައެއް ފޮރުވުނެވެ. މިކަމާއި ހުރެ ހުޅަނގުގެ މީޑިއާތަކުން ވޯލްޑްކަޕް އިންތިޒާމުކުރި ފަރާތަށް ވަރަށް ބޮޑަށް ފާޑުކިޔާފައިވެއެވެ.
އޮމާންގެ ގާނޫނު ހަދާ މަޖިލީހުގެ މެންބަރެއްކަމަށްވާ އަހުމަދު އަލް ބަރްވާނީ ކުރެއްވި ޓުވީޓެއްގައި ވިދާޅުވެފައިވަނީ 2022 ވަނަ އަހަރުގެ ވޯލްޑް ކަޕް ގަތަރު ކާމިޔާބު ކުރެއްވުމުން އޮމާންގެ ސުލްތާނުން ތިޔަބޭފުޅުންނަށް މަރުހަބާ ދަންނަވާ ކަމަށެވެ. އަދި "ޢަރަބި ބިޝްތަކީ، ޝަޚްޞިއްޔަތާއި ބުއްދީގެ ރަމްޒެކެވެ. އެ ބިޝްޓްގެ ބަދަލުގައި އެއް މިލިއަން ޑޮލަރު ހުށަހަޅާކަމަށެވެ.
އޭނާ ފަހުން އެގައުމުގެ ނެޝަނަލް ނޫހަށް ދިން އިންޓަވިއުއެއްގައި ބަރްވާނީ ބުނީ އެއް މިލިއަން ޑޮލަރަކީ މެސީގެ ހަފުތާއެއްގެ މުސާރައަށް ވުރެ ކުޑަ އެއްޗެއްކަމަށާއި އެއަގު އިތުރުކުރަން ތައްޔާރައްހުރިކަމަށެވެ. އަދި އޭނާ އެމަންޒަރު ދަނޑުގައި ހުރެގެން ބެލިކަމަށާއި އެ ބިޝްޓް ބޭނުންވަނީ އެވަގުތުކޮޅު ހަނދާނެއްގެ ގޮތުގައި ރައްކާކޮއްފައި ބޭއްވުމަށްކަމަށެވެ.
Advertisement
This content is created and paid for by advertisers and does not involve Voice Journalists
