އެސްޓީއޯ ގައްދޫ ކައުންސިލް ފުޓްސަލް ޗެލެންޖުގައި ގްރޫޕު ބީގައި މިރޭ ވާހިރާ އެފްސީ އާއި އުތުރުކޮޑާ ކުޅުނު މެޗު ވާހިރާ އެފްސީއިން ކާމިޔާބުކޮށްފި އެވެ.

މިރޭ ގައްދޫ ފުޓްސަލް ގްރައުންޑުގައި ކުޅުނު މިމެޗު ވާހިރާއިން ކާމިޔާބުކުރީ 3-2 ގެ ނަތީޖާއަކުންނެވެ. ވާހިރާ އެފްސީ ގެ ކުޅުންތެރިންގެ އެވަރެޖް އުމުރަކީ 19 އަހަރެވެ. އުތުރުކޮޑާ އަކީ ހުވަދު އަތޮޅުގައި ފާހަގަކޮށްލެވޭ ވަރުގަދަ ކުޅުންތެރިންތަކަކާއި އެކު މި މުބާރާތަށް ނުކުތް ޓީމެކެވެ.

މިރޭގެ މެޗުގައި ދެޓީމުގެ ފަރާތުންވެސް ވަރަށް މޮޅު ކުޅުމެއް ފެނިގެން ގޮސްފައިވެއެވެ. މެޗުގައި ފުރަތަމަ ލީޑް ނެގީވެސް ވާހިރާ އެފްސީ އިންނެވެ. ފުރަތަމަ ހާފުގައި ވާހިރާގެ (ޖ.12) ވަނީ މެޗުގެ ފުރަތަމަ ގޯލް ކާމިޔާބުކޮށް އެޓީމަށް ލީޑު ނަގާދީފައެވެ. ނަމަވެސް އެގޯލަށް މާގިނަ އިރުތަކެއް ނުވެ އުތުރުކޮޑާގެ (ޖ.66) ސަދަގަތުﷲ ޝަފީގް ވަނީ ގޯލެއް ކާމިޔާބުކޮށް އެޓީމަށް ނަތީޖާ ހަމަހަމަކޮށްދީފައެވެ.  ފުރަތަމަ ހާފު ނިމިގެން ދިޔައީ 1-1 ގެ ނަތީޖާއަކުން ދެޓީމު އެއްވަރުވެގެންނެވެ.

މެޗުގެ ދެވަނަ ހާފު ބޮޑަށް ޑޮމިނޭޓްކުރީ ވާހިރާއިންނެވެ. ނަތީޖާއެއްގެ ގޮތުން މި ހާފުގައި އެޓީމުން ވަނީ ކައިރިކައިރީގައި ދެގޯލް ކާމިޔާބުކޮށް ލީޑު ފުޅާކޮށްފައެވެ. މި ދެގޯލް އެޓީމަށް ކާމިޔާބުކޮށްދިނީ ލައިޝް އިބްރާހިމް އާއި އަހުމަދު ރައިމް އެވެ. މެޗުގެ ފަހު ފަސް މިނެޓުގެ ތެރޭގައި އުތުރުކޮޑާއިން ވަނީ ނަތީޖާ އަނބުރާލުމަށް ވަރަށް މަސައްކަތްކޮށްފައެވެ. އެގޮތުން އެޓީމުގެ މުލްހަމް އިބްރާހިމްގެ ވަނީ ގޯލެއް ކާމިޔާބުކޮށް ނަތީއްޖާގެ ފަރަގު ކުޑަކޮށްފައެވެ.

މި މެޗުގެ ކިންގް އޮފްދަ މެޗަކަށް ހޮވިފައިވަނީ ވާހިރާގެ ފުރަތަމަ ގޯލް ކާމިޔާބުކޮށްދިން ލައިޝް އިބްރާހިމް އެވެ.

މިރޭގެ މެޗުން ލިބުނު ތިން ޕޮއިންޓާއި އެކު ވާހިރާ އެފްސީ އޮތީ ގުރުޕް އޭ ގެ ތިން ވަނާގައެވެ. މި ގުރޫޕްގެ އެއްްވަނާގައި އޮތީ ތިން ޕޮއިންޓާއި ފައިދާ 11 ގޯލާއެކު ފެނަކައެވެ. ދެ މެޗުން ލިބުނު ތިން ޕޮއިންޓާއި ފައިދާ 8 ގޯލާއެކު ދެވަނަގައި އޮތީ މި މެޗުން ބަލިވި އުތުރުކޮޑާއެވެ.