ކުރީގެ ރައީސުލްޖުމްހޫރިއްޔާ އަދި އިދިކޮޅު އިއްތިހާދުގެ ލީޑަރު ރައީސް ޔާމީނުގެ މައްޗަށް ދައުވާކޮށްފައިވާ އާރަށް މައްސަލާގައި ރިޝްވަތު ގަބޫލުކުރުމުގެ ކުށާއި، މަނީ ލޯންޑަރިންގެ ކުށް އެމަނިކުފާނުގެ މައްޗަށް ސާބިތުވާ ކަމަށް ކަނޑައަޅައި އެމަނިކުފާނުގެ މައްޗަށް އިއްވާފައިވާ 11 އަހަރުގެ ޖަލު ހުކުމް ހިމެނޭ ރިޕޯޓް އަދިވެސް ދޫނުކުރާ ކަމަށް ވިދާޅުވެ އެމަނިކުފާނުގެ ވަކީލުން ކަންބޮޑުވުން ފާޅުކޮށްފިއެވެ.

ސުޕްރީމް ކޯޓުން މިދިޔަ އަހަރުގެ ޖަނަވަރީ 18 ވަނަ ދުވަހު ނެރުނު ޕްރެކްޓިސް ޑައިރެކްޝަންގައި ބުނެފައި އޮންނަނީ ކޮންމެ ކޯޓަކުންވެސް ބަލައި ނިންމާ މައްސަލައެއްގައި ހުކުމް އިއްވާ ދުވަހު، އެ މައްސަލައިގެ ހުކުމަށް ވާސިލުވި ސަބަބާއި ހުކުމް ހިމެނޭގޮށް ތައްޔާރުކޮށްފައިވާ "ޝަރީއަތް ނިމުނު ގޮތް" (ޖަޖްމެންޓް) ގެ އަސްލެއް އެ މައްސަލަ ބެލި ފަނޑިޔާރު ނުވަތަ ފަނޑިޔާރުންގެ ސޮޔާއެކު، އެމައްސަލައިގައި ހިމެނޭ ކޮންމެ ފަރާތަކަށްވެސް ހަވާލު ކުރަން ވާނެ ކަމަށެވެ.

ޖިނާއީ އިޖުރާއަތުގެ ގާނޫނުގެ 157 ވަނަ މާއްދާގައި ބުނެފައި އޮންނަނީ ފަނޑިޔާރު ޙުކުމް އިއްވުމަށްފަހު، ހިސާބު ޖެހުމުގައި އަރާފައިއޮތް އޮޅުމެއް ނުވަތަ ލިޔުމުގައިވާ ޢިމްލާކުށެއް ނުވަތަ ހާމަކަންބޮޑު ގޮތެއްގައި އޮޅިގެން އުނިވެފައިވާ ތަނެއް އިޞްލާޙުކުރުން ފިޔަވައި ޙުކުމަށް އެއްވެސް ބަދަލެއް ގެނެސްގެންނުވާނެއެވެ.

Advertisement

ނަމަވެސް އަދިވެސް ޔާމީނަށް އިއްޔެ އިއްވި ހުކުމާއި ގުޅޭ ލިޔުންތައް ކްރިމިނަލް ކޯޓުން ވަކީލުންނާއި ހަވާލެއް ނުކުރެއެވެ. އެކަމާއި ގުޅިގެން ވަކީލުން އަންނަނީ ކަންބޮޑުވުން ފާޅުކުރަމުންނެވެ.

އެގޮތުން ހުކުމުގެ ކޮޕީ ނުދެނީ އަދިވެސް ހުކުމް ލިޔާތީތޯ ޔާމީންގެ ވަކީލުންގެ ޓީމްގައި ހިމެނޭ އާދަމް ޝަމީމް ވަނީ ސުވާލު ކުރައްވާފައެވެ. އޭނާ ކުރެއްވި ޓްވީޓެއްގައި ވިދާޅުވީ "ސަބަބުވެރި އިންސާނެއްގެ ވިސްނުމުން ވިސްނާއިރު، މައްސަލައިގެ ހުކުމް ކުރުމަށްފަހު ހުކުމްގެ ކޮޕީ ނުދީ މިހާ ގިނައިރުވާންޖެހޭ ސަބަބެެއް ނެތް." ކަމަށެވެ.

ވަކީލުންގެ ޓީމްގައި ހިމެނޭ ކުރީގެ ނައިބު ރައީސް ޑރ.މުހައްމަދު ޖަމީލް އަހްމަދު ވަނީ ހުކުމް އިއްވީ ހުކުމް ލިޔެ ނުނިމެނީސްތޯ ސުވާލު ކޮށްފައެވެ.

"ކްރިމިނަލް ކޯޓުން މިވަރުގެ ބޮޑު 11 އަހަރުދުވަހުގެ ޖަލު ޙުކުމް އިއްޔެ ކުރީގެ ރައީސެއްގެ މައްޗަށް އިއްވިއިރު އަދިވެސް ރިޕޯޓް ނުލިބޭ. ކޯޓަށް ހާޒިރުވީ 9 ޖެހިއިރު. ޝަރީޢަތް ފެށީ 12 ޖަހަން ކައިރި ވެފައި ހުއްޓާ. ޙުކުމް މިއިއްވީ ރިޕޯޓް ތައްޔާރުނުކޮށް ތިބެބާ؟ މިއީ އިންސާފު؟" ޖަމީލް ވިދާޅުވިއެވެ.

މީގެ އިތުރުން، ރައީސް ޔާމީންއަށް އިއްވާފައިވާ ހުކުމް ހަވާލު ނުކޮށް، އިއްޔެގެ ޝަރީއަތްވެސް ޔޫޓިއުބުން މިހާރު ފޮހެލާފައިވާއިރު، އެކަމާއި ވެސް އެމަނިކުފާނުގެ ވަކީލުން އަންނަނީ ނުރުހުން ފާޅުކުރައްވަމުންނެވެ. އަދި ހުކުމާއި ގުޅޭ ލިޔެކިޔުންތައް ހަވާލުނުކުރާތީ ވަކީލުންގެ ޓީމުން ކްރިމިނަލް ކޯޓަށް ވަޑައިގެންނެވުމަށް ހަމަޖެހިފައިވާ ކަމަށްވެސް މައުލޫމާތު ލިބިފައިވެއެވެ.