މާލެ ސަރަހައްދުގެ ގޭގެއިން ނެރޭ ކުނި ނެގުމަކީ ވެމްކޯގެ ޒިންމާއެއް ނަމަވެސް، ގޭގެއިން މަގުމަތީގައި ބަހައްޓާފައި ހުރި ކުނިތައް ވެމްކޯއިން ރޭގައި ނަގާފައި ނުވަނީ ގަސްތުގައި ކަމަށް މާލެސިޓީ ކައުންސިލްގެ މޭޔަރު ޑރ. މުހައްމަދު މުއިއްޒު ވިދާޅުވެއްޖެއެވެ.
ސިޓީ ކައުންސިލުން ވެމްކޯއާއެކު މާލެ އާއި ވިލިމާލޭގެ ކުނި ކެހުމާއި، އެ ކުނި ނެގުމާއި އުކާލުމަށް ވެފައިވާ އެއްބަސްވުމުގެ މުއްދަތު މި ޑިސެމްބަރު މަހުގެ 26 ވަނަ ދުވަހު ހަމަވުމުން އެއްބަސްވުން އައު ކޮށްފައެއް ނުވެއެވެ.
އެހެންކަމުން، މާލެއާއި ވިލިމާލޭގެ މަގުތަކާއި ޕާކުތަކާއި ފަޅުތެރެއާއި އާންމު ސަރަހައްދުތަކުން ކުނި ނެގުމުގެ މަސައްކަތް ސިޓީ ކައުންސިލުން ކުރަމުންދާއިރު، މާލޭގެ ގޭގެއިންނާއި އިމާރާތްތަކުން ކުނި ނެގުމަކީ އަދިވެސް ވެމްކޯގެ ޒިންމާއެކެވެ.
ނަމަވެސް، ރޭގައި، މާލޭގެ ގޭގެއިން މަގުމަތީގައި ބަހައްޓާފައި ހުރި އެގޭގެއިގެ ކުނި ވެމްކޯއިން ނުނަގާ ކަމަށާ، އެ ކުންފުނިން އެފަދައިން ކަން ކުރީ ގަސްތުގައި ކަމަށް މުއިއްޒު ވަނީ ވިދާޅުވެފަ އެވެ.
އަދި އެ ގޮތުން ގޭގެއިން ނެރެފައިވާ ކުނީގެ 10 ޓަނު ކުނި މިހާރުވެސް މަގުތަކުން ނަގާފައިވާ ކަން ފާހަގަކޮށް މުއިއްޒު ވިދާޅުވީ، މާލޭގެ މަގުތައް ސާފުކޮށް ބެހެއްޓުމަށް ކުރަންޖެހޭ ހުރިހާ ކަމެއް އެ ކައުންސިލުން ކުރާނެ ކަމަށެވެ.
މާލޭގެ މަގުތަކާއި އާއްމު ތަންތަން ސާފުކޮށް ބެހެއްޓުމަށް ކުރަންޖެހޭ ކަންކަން ކުރުމުގައި އާއްމުންގެ އެއްބާރުލުން ދިނުމަށް ވެސް މުއިއްޒު ވަނީ އެދިވަޑައިގެންފަ އެވެ.
Advertisement
This content is created and paid for by advertisers and does not involve Voice Journalists
