މިހާރު އޮތް، 19 ވަނަ ރައްޔިތުންގެ މަޖިލީހުގައި ތިބި އެމްޑީޕީގެ މެންބަރުންނަކީ ސައްހަ މެންބަރުން ކަމާއިމެދު ސުވާލު އުފެދޭ ކަމަށް މާލެ އަތޮޅު ކައުންސިލްގެ ރައީސް މުހައްމަދު ނިމާލް ވިދާޅުވެއްޖެއެވެ. 

ރޭ ބޭއްވި ޕީޕީއެމް/ޕީއެންސީގެ ޖޮއިންޓް ސެނެޓްގެ ބައްދަލުވުމުގައި ވާހަކަ ދައްކަވަމުން ނިމާލް ވިދާޅުވީ، ކުރީގެ ރައީސް ޔާމީން އަބްދުލްގައްޔޫމް 11 އަހަރަށް ޖަލަށް ލުމަށް ކުރިމިނަލް ކޯޓުން ކުރި ހުކުމުން އެނގިގެން ދިޔައީ ސަބަބުވެރި އިންސާނެއްގެ ސިކުނޑިއަކީ މޮޔައިންގެ ސިކުނޑި ކަމަށެވެ.  

މިއާއެކު އޭނާ ވިދާޅުވީ، މިއީ 2018 ވަނަ އަހަރުގެ ރިޔާސީ އިންތިހާބު އޮޅުވާލައިގެން އުފެދިފައިވާ ހަރާމް ސަރުކާރެއް ކަމަށެވެ.  އެހެންކަމުން މި ހަރާމް ސަރުކާރުން ރައްޔިތުންނަށް ރަނގަޅު ކަންތައް ތަކެއް ކޮށްދޭނެ ކަމަށް ގަަަަބޫލު ކޮށްގެން ނުވާނެ ކަމަށްވެސް އޭނާ ވިދާޅުވި އެވެ. 

2019 ވަނަ އަހަރުގެ މަޖިލިސް އިންތިހާބު ކައިރިވެފައި ވަނިކޮށް، ތަހުގީގަށް ނުފޫޒު ފޯރުވާ ކަމަށް ބުނެ ރައީސް ޔާމީން ހައްޔަރުކޮށް، މަޖިލީހުގެ މެޖޯރިޓީ އެމްޑީޕީން ނަގާފައިވާއިރު، މިހާރު އޮތް މަޖިލީހުގައި ތިބި އެމްޑީޕީގެ މެންބަރުންނަކީ ސައްހަ މެންބަރުން ކަމާއިމެދު ވެސް ސުވާލު އުފެދޭ ކަމަށް ނިމާލް ވިދާޅުވި އެވެ. 

"2019 ވަނަ އަހަރުގެ ރައްޔިތުންގެ މަޖިލިސް ބޯމަތިވެފައި އޮއްވައި، ތަހުގީގަށް ނުފޫޒު ފޯރުވާކަމަށް ބުނެ، އަޅުގަނޑުމެންގެ ރައީސް، ގެންގޮސް ހައްޔަރުކޮށް 45 ދުވަސް ވަންދެން ޖަލުގައި ނުހައްގުން ބާއްވާފައި، މަޖިލީހުގެ ވޯޓުލާން އެންމެ ދެތިން ދުވަހެއް ވެފައި އޮއްވައި، ގެއަށް ބަދަލުކޮށް އެމަނިކުފާނު ގޭގައި ބަންދުގައި ބަހައްޓައިގެން މަޖިލީހުގެ މެޖޯރިޓީ އެބޭފުޅުން މި ނެންގެވީ. އާދެ އަޅުގަނޑު ސުވާލު އުފެދޭ މިހާރު މިއޮތް 19 ވަނަ މަޖިލީހުގައި އެމްޑީޕީގެ ފަރާތުން ހޮވިފައިތިބީ ސައްހަ މެންބަރުން ކަމާއި ދޭތެރޭ ވެސް. އެއީ އެވަރުގެ ބޮޑު މަކަރާއި ހީލަތަކުން މަޖިލީހުގެ މެޖޯރިޓީ ނެންގެވީމާ." ނިމާލް ވިދާޅުވި އެވެ.

އެއަށްފަހުގައި ވެސް ރައީސް ޔާމީން 2 އަހަރަށްވުރެ ގިނަ ދުވަސް ވަންދެން ޖަލުގައި ބަންދުކުރައްވައިގެން މިސަރުކާރުން ގެންގުޅުއްވި ކަމަށާއި، އެ މުއްދަތުގެ ތެރޭގައިވެސް ސަރުކާރުން ކުރި ކަމަކީ އިންޑިޔާ އާއި އެކީގައި ގޮތް ނޭނގޭ އެގްރީމެންޓް ތަކެއް ހެދުން ކަމަށް ނިމާލް ވިދާޅުވި އެވެ.

އަދި، ރިޔާސީ އިންތިހާބު ބޯމަތިވެފައި ވަނިކޮށް އިދިކޮޅުގެ ރިޔާސީ ކެންޑިޑޭޓް ރައީސް ޔާމީން އަނެއްކާވެސް ޖަލަށް ލާފައިވާ ކަމަށާ، އެއީ އެމަނިކުފާނު އާއިލާގެ އިތުރުން، ހުރިހާ ދިވެހިންނަށް ލިބުނު ގެއްލުމެއް ކަމަށް ނިމާލް ވިދާޅުވި އެވެ.